ညောင်ရွှေမြို့နယ်၊ ဒုံတခေါ့ကျေးရွာတွင် မြစိမ်းရောင်စီမံကိန်း ရန်ပုံငွေ ထုတ်ချေး

ကမ္ဘောဇတိုင်း

.

ညောင်ရွှေမြို့နယ်၊ နောင်တောကျေးရွာအုပ်စု၊ ဒုံတခေါ့ကျေးရွာတွင် ယနေ့ ဇန်နဝါရီလ ၁၉ ရက်၊ နံနက်ပိုင်းက မြစိမ်းရောင်ကျေးရွာစီမံကိန်း ရန်ပုံငွေ ကျပ်သိန်း ၄၀၀ ကျော်အား ထုတ်ချေးပေးခဲ့ကြောင်း သိရသည်။

.

.

ကျေးလက်နေတောင်သူများ အလုပ်အကိုင်အခွင့်အလမ်းနှင့် မိသားစုဝင်ငွေ တိုးပွားလာခြင်းဖြင့် ကျေးလက်ဒေသ ဆင်းရဲနွမ်းပါးမှု လျှော့ချရန်နှင့် တိုးပွားလာသော ရန်ပုံငွေများဖြင့် ကျေးရွာအတွက် အမှန်တကယ် လိုအပ်နေသော ဖွံ့ဖြိုးရေးလုပ်ငန်းများကို ကျေးရွာများမှ ကိုယ်တိုင်ဆောင်ရွက်နိုင်ရေးအတွက် စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ မြစိမ်းရောင်ကျေးရွာစီမံကိန်း ချေးငွေများကို ထုတ်ချေး ပေးနေခြင်းဖြစ်ကြောင်း သိရသည်။

.

ထိုသို့ ထုတ်ချေးပေးရာတွင် ဒုံတခေါ့ကျေးရွာအတွင်းရှိ အတိုးဆပ်ကာလ ၄ လတစ်ကြိမ်၊ အတိုး ၅၀ ပြားနှုန်းဖြင့် ပဉ္စမ အကြိမ် ထုတ်ချေးပေးရန်အတွက် ချေးငွေအောင်မြင်သည့် စိုက်ပျိုးရေးလုပ်ကိုင်သူ ၁၂၅ ဦးတို့အား ရန်ပုံငွေကျပ် ၄၇၂ သိန်း ထုတ်ချေးပေးခဲ့ခြင်းဖြစ်ကြောင်း သိရသည်။

.

အဆိုပါ မြစိမ်းရောင်ရန်ပုံငွေ ထုတ်ချေးပေးမှုကို ညောင်ရွှေမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ မြို့နယ်ဦးစီးမှူး ဦးသိန်းထိုက်နှင့် ဝန်ထမ်းများက ကွင်းဆင်းကြီးကြပ်ပြီး လိုအပ်သည်များကို မြစိမ်းရောင်ကျေးရွာ ကော်မတီဝင်များနှင့် ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

.

​ညောင်​ရွှေမြို့နယ်တွင် ၂၀၁၃-၂၀၁၄ ခု ဘဏ္ဍာနှစ်မှ ၂၀၂၀-၂၀၂၁ ဘဏ္ဍာနှစ်အထိ မြစိမ်း​ရောင်စီမံကိန်း​ကျေးရွာ ၆၆ ယူနစ်ဖြင့် ​ကျေးရွာ ၈၂ ရွာတွင် အ​ကောင်အထည်​ဖော်လျက်ရှိ​ကြောင်း သိရသည်။

.