.
ပအိုဝ်းကိုယ်ပိုင်အုပ်ချုပ်ခွင့်ရဒေသ၊ နောင်တရားမြို့ အနီးပတ်ဝန်းကျင်ရှိ စိုက်ပျိုးရေး လုပ်ငန်းများတွင် အဝီစိတွင်းရေ တူးဖော်၍ ရေသွင်းစိုက်ပျိုးသည့် စနစ်ကို ပိုမိုတွင်ကျယ်စွာ စိုက်ပျိုးလာကြကြောင်း သိရသည်။
.
“လူဦးရေနဲ့ မြေယာက မမျှတော့ဘူး ဒီမှာတော့ နွေ၊ မိုး၊ ဆောင်း သုံးရာသီလုံး စိုက်ပျိုးရေးလုပ်ငန်း လုပ်တယ်။ အဝီစိတူးလို့ မရတဲ့ နေရာမှာတော့ မိုးရေကို အားကိုးတယ်၊ အဝီစိတွင်း တူးလို့ရတဲ့ နေရာဆိုရင် တူးပြီး နွေရာသီမှာ အာလူးနဲ့ အခြားကုန်စိမ်းတွေ စိုက်တယ် မိုးကိုပဲ အားကိုးနေလို့ မရတော့ဘူး။” ဟု အဝီစိတွင်း တူးဖော်၍ စိုက်ပျိုးရေးလုပ်ငန်း ဆောင်ရွက်နေသည့် တောင်သူတစ်ဦးက ပြောသည်။
.
နောင်တရားမြို့ ပတ်ဝန်းကျင် လယ်ယာမြေများတွင် ယခင်က နောင်တရားချောင်းကို အားပြု၍ နွေရာသီ စိုက်ပျိုးရေးလုပ်ငန်း ဆောင်ရွက်ခဲ့သော်လည်း ယခုအခါ အဆိုပါချောင်းမှာ ရေခန်းခြောက်လျက်ရှိသောကြောင့် အဝီစိတွင်းရေ တူးဖော်ပြီး စိုက်ပျိုးသည့်စနစ်ကို အသုံးပြု၍ တွင်တွင်ကျယ်ကျယ် စိုက်ပျိုးလာကြခြင်း ဖြစ်သည်။
.
အဝီစိတွင်း တူးဖော်ရာတွင် ပေ ၃၀၀ အထိ တူးဖော်ရလေ့ ရှိပြီး တူးဖော်မှု လုပ်အားခအဖြစ် တစ်ပေလျှင် ငွေကျပ် ၃၀၀၀ နှုန်း ကျသင့်ကြောင်းနှင့် အဝီစိတွင်း တူးဖော်ရာ၌ ရေထွက်ရှိမှုမှာ နေရာဒေသအလိုက် အခြေအနေ မတူညီကြောင်း သိရသည်။
