□ စောဦး (ရတနာမြေ)
.
Christian Aid ၏ ပံ့ပိုးမှုဖြင့် စိမ်းလန်းဘဝ လူမှုဖွံ့ဖြိုးမှုအဖွဲ့ (Glad) နှင့် မိတ်ဆွေကောင်း လူမှုကူညီရေးအသင်းတို့ ပူးပေါင်း၍ COVID-19 ရောဂါ ကာကွယ်ထိန်းချုပ်ရေးအသိပညာပေးခြင်းနှင့် ထောက်ပံ့ပေးအပ်ခြင်းကို ဇန်နဝါရီလ ၁ ရက်၊ နံနက်ပိုင်းက နမ္မတူမြို့နယ် ဆန်ခါ၊ နမ့်ဆီလင်းကျေးရွာတို့၌ ဆောင်ရွက်ခဲ့ကြောင်း သိရသည်။
.
မိတ်ဆွေကောင်း လူမှုကူညီရေးအသင်းမှ ဦးအောင်ဆန်းမြင့်၊ မနန်းအေးနွမ်းတို့က ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသည့် COVID-19 ရောဂါ ကာကွယ်ထိန်းချုပ်ရေး အသိပညာပေးခြင်းအား မြန်မာဘာသာဖြင့် လည်းကောင်း၊ ရှမ်းဘာသာဖြင့် လည်းကောင်း ဟောပြောခဲ့ပြီး လက်သန့်စင်အောင် ဆေးကြောနည်းသရုပ်ပြကာ ရေမလိုလက်သန့် ဆေးရည်ဖြင့် လက်ဆေးစေခြင်း၊ ပါးစပ်နှင့်နှာခေါင်းစည်း (Mask)များ၊ အသိပညာပေး ဗွီနိုင်းများနှင့် လက်ကမ်းစာစောင်များကို အခမဲ့ဖြန့်ဝေပေးခဲ့ကြောင်း သိရသည်။
.
ထို့အပြင် ကျေးရွာ တစ်ရွာချင်းစီအတွက် ခြေနင်းလက်ဆေးဘေစင် ၁ စုံ၊ Hand Speaker ၁ ခု၊ Memory Stick ၁ ခု၊ ရေမလို လက်သန့်ဆေးရည်များနှင့် လက်ဆေးဆပ်ပြာခဲ ၇၀၀ ခဲတို့အား ထောက်ပံ့ပေးအပ်ခဲ့ကြောင်း မိတ်ဆွေကောင်းလူမှုကူညီရေးအသင်းထံမှ သိရသည်။
