​အေးသာယာ တပ်​ထောက်ခံပွဲ အနီးသို့ NLD အလံကိုင်၍ သွား​ရောက်ခဲ့သဖြင့် အထိန်းသိမ်း ခံရသူများ အာမခံ ရရှိ

တောင်ကြီးမြို့နယ်၊ ​​အေးသာယာမြို့၊ ​နောင်အင်​ဘောလုံးကွင်း အတွင်း ပြုလုပ်​နေသည့် တပ်မ​တော် ​ထောက်ခံပွဲ အနီးသို့ NLD ပါတီအလံ ကိုင်​ဆောင်၍ သွားရောက်ခဲ့သဖြင့် ထိန်းသိမ်း ဖမ်းဆီး ခံခဲ့ရ​သော ​ဒေးဗစ်ရှမ်း​လေး အပါအဝင် လူငယ် ၃ ဦး​သည် ယ​နေ့ ဇန်နဝါရီလ ၂၂ ရက်၊ ည​နေပိုင်းတွင် အာမခံ ရရှိခဲ့​ကြောင်း သိရသည်။

.

" လက်ရှိ​တော့ ကျွန်​တော်တို့ကို အာမခံ ​ပေးထားတယ်။ ငြိမ်းစုစီ ၁၉ နဲ့ပဲ အမှုဖွင့်ထားတယ်ဗျ။ အင်္ဂါ သို့မဟုတ် ဗုဒ္ဓဟူး​နေ့​တော့ တရားရုံး တင်မယ်လို့ ​ပြောတယ်ဗျ။ ကျွန်​တော်တို့ အခုပဲ အိမ် ပြန်​ရောက်ပါပြီ။ သူတို့(ရဲတပ်ဖွဲ့) က​တော့ ဘာမှ မ​ပြောဘူး၊ အဲကိစ္စနဲ့ ပတ်သက်ပြီး သူတို့မှာလည်း တချို့အပိုင်း​တွေမှာ ဖိအား ရှိရင် ရှိမယ်လို့ ထင်တယ်ဗျ၊ အဲဒါ​ကြောင့်မို့ ကျွန်​တော်တို့ကို မဖြစ်မ​နေ အမှု ဖွင့်လိုက်ရတာလို့ ထင်တယ်။ "ဟု အမှုဖွင့် အ​ရေးယူခံရသူ ​ဒေးဗစ်ရှမ်း​လေးက က​မ္ဘောဇတိုင်းသို့ ​ပြောသည်။

.

၂၀၁၆ ခုနှစ်၊ အောက်တိုဘာလ ၄ ရက်က ပြည်ထောင်စုလွှတ်တော် ဥပဒေအမှတ် (၃၈) ဖြင့် ပြဌာန်းခဲ့သည့် ငြိမ်းချမ်းစွာ စုဝေးခွင့်နှင့် ငြိမ်းချမ်းစွာ စီတန်းလှည့်လည်ခွင့်ဆိုင်ရာဥပဒေ၊ အခန်း (၇) ပုဒ်မ ၁၉ တွင် မည်သူမဆို သက်ဆိုင်ရာသို့ အသိပေးတင်ပြခြင်းမရှိဘဲ စုဝေးခြင်း သို့မဟုတ် စီတန်းလှည့်လည်ခြင်း ပြုကြောင်း ပြစ်မှုထင်ရှား စီရင်ခြင်း ခံရလျှင် ထိုသူကို ၃ လထက် မပိုသော ထောင်ဒဏ် ဖြစ်စေ၊ ၃၀၀၀၀ ကျပ်ထက် မပိုသော ငွေဒဏ် ဖြစ်စေ၊ ဒဏ်နှစ်ရပ်လုံး ဖြစ်စေ ချမှတ်ရမည်ဟု ပြဌာန်း ဖော်ပြထားသည်။

.

နိုင်ငံတော် ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရန် တာဝန်ရှိ​သော တပ်မတော်အား ကြိုဆိုထောက်ခံကြောင်း ဆန္ဒထုတ်ဖော်ပွဲကို ဆန္ဒထုတ်​ဖော်သူ ၂၉ ဦး၊ ဝန်းရံသူ ၂၀၀ ဦး​ကျော်ခန့်မှ ယနေ့ ဇန်နဝါရီလ ၂၂ ရက်က အေးသာယာမြို့၊ နောင်အင် ဘောလုံးကွင်းအတွင်း၌ ပြုလုပ်ခဲ့ခြင်း ဖြစ်ပြီး အဆိုပါထောက်ခံပွဲ အနီးသို့ ယင်းလူငယ် ၃ ဦးက NLD အလံ ကိုင်ဆောင်၍ သွားရောက်ခဲ့ခြင်း​ကြောင့် ရဲတပ်ဖွဲ့က ဖမ်း​ဆီး အ​ရေးယူခဲ့ခြင်း ဖြစ်ကြောင်း သိရသည်။