ကမ္ဘောဇတိုင်း
.
တောင်ကြီးမြို့နယ်၊ အေးသာယာမြို့၊
နောင်အင်ဘောလုံးကွင်းအတွင်း ပြုလုပ်ခဲ့သည့် တပ်မတော် ထောက်ခံပွဲအနီးသို့ NLD
အလံကိုင်ဆောင်၍ လာရောက်ခဲ့သူ အမျိုးသားတစ်ဦးနှင့် အတူပါလာသူ
အမျိုးသား ၂ ဦး၊ စုစုပေါင်း ၃ ဦးတို့ကို အေးသာယာနယ်မြေရဲစခန်းတွင် ငြိမ်းချမ်းစွာစုဝေးခွင့်နှင့်
ငြိမ်းချမ်းစွာစီတန်းလှည့်လည်ခွင့်ဆိုင်ရာဥပဒေဖြင့် အမှုဖွင့် အရေးယူသွားမည်ဖြစ်ကြောင်း
သိရသည်။
.
“ငြိမ်းစုစီ ဥပဒေနဲ့ အရေးယူသွားမှာပါ” ဟု အေးသာယာနယ်မြေရဲစခန်းမှ
တာဝန်ရှိသူတစ်ဦးက ပြောသည်။
.
နိုင်ငံတော်ဖွဲ့စည်းပုံအခြေခံဥပဒေကို
ကာကွယ်စောင့်ရှောက်နေသော တပ်မတော်အား ကြိုဆိုထောက်ခံကြောင်း ဆန္ဒထုတ်ဖော်ပွဲကို
ယနေ့ ဇန်နဝါရီလ ၂၂ ရက်က အေးသာယာမြို့၊ နောင်အင်ဘောလုံးကွင်းအတွင်း၌
ပြုလုပ်ခဲ့ခြင်း ဖြစ်ပြီး အဆိုပါထောက်ခံပွဲသို့ အမျိုးသားဒီမိုကရေစီအဖွဲ့ချုပ်ပါတီ
(NLD) ထောက်ခံသူ လူငယ် ၃ ဦးမှ NLD အလံ ကိုင်ဆောင်၍
လာရောက်ခဲ့ခြင်းဖြစ်ကြောင်း သိရသည်။
.
ယင်းကဲ့သို့ NLD အလံ ကိုင်ဆောင်မှုနှင့်
ပတ်သက်၍ ဆန္ဒထုတ်ဖော်ပွဲ စီစဉ်သူများနှင့် ယင်းလူငယ်အကြား အချင်း များမှု
ဖြစ်ပွားခဲ့ပြီး အလံကိုင်ဆောင်သူ ဒေးဗစ်ရှမ်းလေးနှင့် အတူပါလာသူ ၂ ဦး၊ စုစုပေါင်း
၃ ဦးတို့ကို ရဲတပ်ဖွဲ့က ထိန်းသိမ်းခေါ်ဆောင်ကာ အမှုဖွင့်ရန် စီစဉ်ဆောင်ရွက်နေခြင်းဖြစ်ကြောင်း
သိရသည်။
.
အဆိုပါ တပ်မတော်ထောက်ခံ ဆန္ဒဖော်ထုတ်ပွဲကို အမျိုးသားဒီမိုကရေစီအင်အားစုပါတီမှ
ဦးသန်းအောင် ဦးဆောင်၍ အင်အား ၂၉ ဦး၊ ဝန်းရံသူ ၂၀၀ ဦးခန့်ဖြင့် ပြုလုပ်ခဲ့ခြင်းဖြစ်ကြောင်း
သိရသည်။
.
