မိုင်းတုံမြို့နယ်၊ နားကောင်းမူးနယ်မြေရဲစခန်း အဆောက်အဦများ အရည်အသွေး မပြည့်မီဟုဆိုကာ တိုင်ကြားမှုနှင့် ပတ်သက်၍ စစ်ဆေးနေ

စုလှိုင်

.

မိုင်းဆတ်ခရိုင်၊ မိုင်းတုံမြို့နယ်၊ နားကောင်းမူးနယ်မြေရဲစခန်းတွင် လျှံထူးအောင်ကုမ္ပဏီမှ တင်ဒါအောင်မြင် ဆောက်လုပ်ခဲ့သည့် အဆောက်အဦများ သတ်မှတ်အရည်အသွေး ပြည့်မီခြင်းမရှိသဖြင့် ကျွမ်းကျင်ပညာရှင်များဖြင့် ပြန်လည်စစ်ဆေးပေးရန် ဟုဆိုကာ တိုင်ကြားမှုနှင့် ပတ်သက်၍ စုံစမ်းစစ်ဆေးမှုများ ဆောင်ရွက်လျက်ရှိကြောင်း သိရသည်။

.

.

“စစ်ဆေးနေတုန်းပဲ ရှိပါသေးတယ်။ ဘာမှမသိရသေးပါဘူး။ အဲဒီကိစ္စတွေ စစ်တုန်းက ပစ္စည်းက စုံတာမဟုတ်ဘူး” ဟု ယင်းတိုင်ကြားစာအား တာဝန်ယူစစ်ဆေးနေသည့် တာချီလိတ်ခရိုင်ရဲတပ်ဖွဲ့မှူးရုံးမှ ရဲမှူး သိန်းထွန်းအောင်က ကမ္ဘောဇတိုင်းသို့ ပြောသည်။

.

“ဒါတွေနဲ့ပတ်သက်ပြီး မခိုင်မာတဲ့အကြောင်းပေါ့၊ လုံးဝ မခိုင်ဘူးဆိုတာ သူတို့ကိုယ်တိုင်လည်း ပြောလာတယ်။ အချိန်မီ အပ်ရတော့ မကောင်းတဲ့ တချို့အရာလေးတွေကိုတော့ ပြင်လိုက်တယ်။ ကျန်တဲ့ ၂ ဆောင်ကလည်း ဒီအတိုင်းပဲ ဆက် တက်သွားတယ်။ အဲဒီအနေအထားအတိုင်းပဲ ဖြေရှင်းချက် ပေးခဲ့ပါတယ်” ဟု တိုင်ကြားစာ ပေးပို့ခဲ့သည့် ဦးဝင်းဗိုလ် က ပြောသည်။

.

တိုင်ကြားစာ ပေးပို့ခဲ့သူ ဦးဝင်းဗိုလ်သည် အမျိုးသားနိုင်ငံရေးဒီမိုကရက်တစ်ပါတီ၏ ရှမ်းပြည်နယ်အတွင်းရေးမှူး ဖြစ်ပြီး အဆိုပါ အဆောက်အဦများ ဆောက်လုပ်စဉ်က ကုမ္ပဏီမှ တာဝန်ခံအင်ဂျင်နီယာ၏ လက်အောက်တွင် အလုပ် သမားခေါင်းဆောင် အနေဖြင့် တာဝန်ယူခဲ့သူ ဖြစ်သည်ဟု သိရသည်။

.

ယင်းအဆောက်အဦများသည် အရည်အသွေးမပြည့်မီမှုကြောင့် ပြည်သူ့ဘဏ္ဍာများ ထိခိုက်စေခြင်း၊ နေထိုင်သူများ အတွက် ငလျင်ကဲ့သို့သော ဘေးအန္တရာယ်များအပြင် သက်တမ်းမပြည့်မီ မလိုလားအပ်သည့် ထိခိုက်မှုများ မဖြစ်ပေါ် စေရန်အတွက် ယင်းကဲ့သို့ တိုင်ကြားရခြင်းဖြစ်ပြီး အဂတိလိုက်စားမှု တိုက်ဖျက်ရေးကော်မရှင်သို့ တိုင်ကြားစာ မိတ္တူ ပေးပို့ထားကာ လိုအပ်ပါက ထပ်မံ၍ တိုက်ရိုက်တင်ပြတိုင်ကြားသွားရန် ရှိနေကြောင်း ၎င်းက ဆက်လက်ပြောဆိုခဲ့ သည်။

.

အဆိုပါကိစ္စနှင့် ပတ်သက်၍ တိုင်ကြားခံရသူ လျှံထူးအောင်ကုမ္ပဏီမှ ယင်းအဆောက်အဦများအား ဆောက်လုပ်ခဲ့သည့် တာဝန်ခံ အင်ဂျင်နီယာ ဦးကျော်ထွန်းနိုင် ထံသို့ ဆက်သွယ် မေးမြန်းရာတွင် “အရည်အသွေး စစ်ဆေးရေး ကော်မတီ က စစ်ဆိုလည်း စစ်ပေါ့။ ကျွန်တော်တို့ဘက်ကတော့ အကောင်းဆုံးဖြစ်အောင် လုပ်ဆောင်ထားတာပဲ ရှိပါတယ်။ ကျန်တဲ့ဟာ ဘာမှမသိပါဘူး။ ရုံးချုပ်ပဲ လှမ်းဆက်သွယ် မေးလိုက်ပါ” ဟု ပြန်လည်ဖြေကြားခဲ့ပြီး လျှံထူးအောင် ကုမ္ပဏီ ရုံးချုပ်ထံသို့ တယ်လီဖုန်းဖြင့် ဆက်သွယ်မေးမြန်းရာတွင်မူ ဖုန်းလက်ခံဖြေကြားခဲ့ခြင်းမရှိချေ။

.

လျှံထူးအောင်ကုမ္ပဏီအနေဖြင့် နားကောင်းမူးနယ်မြေရဲစခန်းတွင် အခြားအဆင့် ၂ ထပ်အိမ်ရာ အဆောက်အဦ တစ်လုံး၊ အရာရှိနေအိမ် ၂ ထပ်အဆောက်အဦ တစ်လုံး၊ အချုပ်နှင့်ရုံး တွဲလျက် အဆောက်အဦတစ်လုံးတို့ကို ၂၀၁၈ ခုနှစ်မှ စတင်တည်ဆောက်ခဲ့ခြင်း ဖြစ်ပြီး ၂၀၂၀ ပြည့်နှစ်၊ ဖေဖော်ဝါရီလတွင် အခန်းအပ်နှံကာ လက်ရှိတွင် ယင်း အဆောက်အဦများ၌ လူနေထိုင် နေပြီဖြစ်ကြောင်း သိရသည်။

.