မိုင်းတုံမြို့နယ်၊ နားကောင်းမူးကျေးရွာ၊ မိုင်းဟန်ရေချောင်းအတွင်း လက်ထိပ်ခတ်လျက် အသတ်ခံထားရသည့် အလောင်း ၂ လောင်း တွေ့ရှိ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

မိုင်းတုံမြို့နယ်၊ နားကောင်းမူးကျေးရွာ၊ မိုင်းဟန်ရေချောင်းအတွင်း လက်ထိပ်ခတ်လျက် အသတ်ခံထားရသည့် အလောင်း ၂ လောင်း တွေ့ရှိ

မင်းဇော်မင်း

.

မိုင်းဆတ်ခရိုင်၊ မိုင်းတုံမြို့နယ်၊ ပုံပါကျင်မြို့၊ နားကောင်းမူးကျေးရွာအတွင်း ဖြတ်သန်းစီးဆင်းနေသည့် မိုင်းဟန် ရေချောင်း အတွင်း ယနေ့ ဇန်နဝါရီလ ၂၀ ရက်၊ ညနေပိုင်းက ခန္ဓာကိုယ် ၂ ပိုင်းဖြတ်ကာ လက်ထိပ်ခတ်လျက် အသတ်ခံထားရသည့် အမျိုးသားအလောင်းတစ်လောင်းနှင့် အမျိုးသမီးအလောင်းတစ်လောင်း တွေ့ရှိခဲ့ကြောင်း သိရသည်။

.

.

နားကောင်းမူးကျေးရွာ၊ မိုင်းဟန်ချောင်းအတွင်း ဇန်နဝါရီလ ၂၀ ရက်၊ ညနေ ၄ နာရီခန့်က အမျိုးသမီးအလောင်း တွေ့ရှိကြောင်း သတင်းအရ နားကောင်းမူးနယ်မြေရဲစခန်းမှူးနှင့် တပ်ဖွဲ့ဝင်များ၊ သက်သေများနှင့် အတူ သွားရောက် စစ်ဆေးရာ မိုင်းဟန်ချောင်း၊ ဆည်ပိတ်ထားသည့် နေရာတွင် အသက် ၃၀ အရွယ်ခန့်ရှိ အမျိုးသမီးအလောင်း တစ်လောင်းအား ထိုးသွင်းဒဏ်ရာများဖြင့် ပုပ်ပွသေဆုံးကာ ရေပေါ်တွင် ပက်လက်အနေ အထားဖြင့် တွေ့ရှိခဲ့ရ ကြောင်း သိရသည်။

.

ထို့အပြင် အဆိုပါ အလောင်းတွေ့ရှိရာနေရာမှ ချောင်းအထက်ဘက် ကိုက် ၁၀၀ ခန့်အကွာ နမ့်ဟန်ချောင်းအတွင်း တွေ့ရှိရသည့် အဝါရောင်အထုပ်အား စစ်ဆေးရာ အထုပ်အတွင်းမှ အသက် ၃၀ ကျော်အရွယ်ခန့်ရှိ အမျိုးသား အလောင်း တစ်လောင်းအား ထိုးသွင်းဒဏ်ရာများဖြင့် သေဆုံးနေသည်ကို ထပ်မံတွေ့ရှိရသဖြင့် ရုပ်အလောင်းများအား မိုင်းတုံဆေးရုံသို့ ပို့ဆောင်ခဲ့ကြောင်း သိရသည်။

.

“အလောင်းတွေကို စစ်ဆေးပြီး တွေ့ရှိချက်ကို မှုခင်းဆေးပညာအရ ဆက်လက်လုပ်ဆောင်သွားဖို့ ရှိပါတယ်” ဟု မိုင်းတုံဆေးရုံအုပ်ကြီး ဒေါက်တာသက်ခိုင်မင်းက ပြောသည်။

.

မိုင်းတုံမြို့နယ်၊ မဲကင်ကျေးရွာရှိ ရေချောင်းအတွင်း၌လည်း ပြီးခဲ့သည့် ၂၀၁၉ ခုနှစ်က ယခုကဲ့သို့ ကြိုးများဖြင့် တုပ်နှောင်ကာ သတ်ဖြတ်ခံထားရသည့် အလောင်း ၂ လောင်း တွေ့ရှိခဲ့ဖူးပြီး ဂိုဏ်းဂဏဆန်ဆန် သတ်ဖြတ်မှုဟု ယူဆကြောင်း ရဲအရာရှိတစ်ဦးက မှတ်ချက်ပြု ပြောဆိုခဲ့သည်။

.

အဆိုပါ အလောင်း ၂ လောင်း တွေ့ရှိမှုနှင့် ပတ်သက်၍ နားကောင်းမူးနယ်မြေရဲစခန်းတွင် (ပ) ၂/၂၀၂၁၊ ရာဇသတ်ကြီး ပုဒ်မ ၃၀၂ ဖြင့် အမှုဖွင့်ပြီး ကျူးလွန်သူများအား ဖမ်းဆီးရမိရေးအတွက် ဆောင်ရွက်လျက်ရှိကြောင်း သိရသည်။

.

Journal Download

Photo of three cats