မိုင်းတုံတွင် ဘိန်းစိမ်းသယ်ဆောင်လာသူ ၂ ဦးအနက် တစ်ဦးကို ဖမ်းမိပြီး တစ်ဦး ထွက်ပြေးလွတ်မြောက်နေ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, January 27, 2021

မိုင်းတုံတွင် ဘိန်းစိမ်းသယ်ဆောင်လာသူ ၂ ဦးအနက် တစ်ဦးကို ဖမ်းမိပြီး တစ်ဦး ထွက်ပြေးလွတ်မြောက်နေ

မင်းဇော်မင်း

.

မိုင်းတုံမြို့နယ်၊ မိုင်းတုံ-မိုင်းဆတ်သွားလမ်းတွင် ယနေ့ ဇန်နဝါရီလ ၂၇ ရက်၊ ညနေပိုင်းက ဘိန်းစိမ်းများအား ဆိုင်ကယ်ဖြင့်သယ်ဆောင်လာသူ ၂ ဦးကို ဖမ်းဆီးရာ တစ်ဦး ဖမ်းမိပြီး တစ်ဦးမှာ ထွက်ပြေးလွတ်မြောက် သွားခဲ့ကြောင်း သိရသည်။

.

.

မူးယစ်တပ်ဖွဲ့စု (၂၉) မိုင်းဆတ်မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဇန်နဝါရီလ ၂၇ ရက်၊ ညနေပိုင်းက မိုင်းတုံမြို့နယ်၊ မိုင်းတုံ-မိုင်းဆတ်သွားကားလမ်း၊ ကျောက်တောင်ဘုရားအနီးတွင် သွားလာနေသည့် ယာဉ်များအား စစ်ဆေးရှာဖွေနေစဉ် မိုင်းဆတ်ဘက်မှ မိုင်းတုံဘက်သို့ မိုင်းတုံမြို့နယ်၊ လွယ်ခမ်းလုံအုပ်စု၊ ပါခတ် ၁၁ မိုင်ရွာနေ ကျလား မောင်းနှင်ပြီး ကျကျိုး လိုက်ပါစီးနင်းလာသည့် ဆိုင်ကယ်မှာ ပြန်လှည့်ပြေးသဖြင့် လိုက်လံဖမ်းဆီးရာ ဆိုင်ကယ်မောင်းနှင်သူ ကျလားကို ဖမ်းဆီးရမိခဲ့ပြီး ကျကျိုးမှာ ထွက်ပြေးလွတ်မြောက်သွားခဲ့ကြောင်း သိရသည်။

.

ထို့နောက် ၎င်းတို့ စီးနင်းလာသည့် ဆိုင်ကယ်အား ရှာဖွေရာ ဆိုင်ကယ်ဂွကြားတွင် ပလတ်စတစ်ဖြင့် ပတ်ထားသည့် ဘိန်းစိမ်းဟု ယူဆရသော အမည်းရောင်အစေး ၅၀၀ ဂရမ်စီပါ ၂ ထုပ်ကို တွေ့ရှိသိမ်းဆည်းရမိသဖြင့် ကျလားကို စစ်ဆေးမေးမြန်းရာ လွန်ခဲ့သည့် ၃ လခန့်က ရင်းနှီးသူ အဲဒေါဆိုသူမှ ငွေကျပ် ၁၀၀၀၀ ဖြင့် ယင်းဘိန်းစိမ်းများအား နား ကောင်းမူးကျေးရွာသို့ ပို့ဆောင်ရန် စေခိုင်းခြင်းဖြစ်ကြောင်း ထွက်ဆိုခဲ့သည်ဟု သိရသည်။

.

“ထွက်ပြေးတဲ့ ကျကျိုးကို ဖမ်းမိဖို့ လုပ်ဆောင်နေပါတယ်။ ကွင်းဆက်တွေလည်း ဆက်လက်စုံစမ်းဖော်ထုတ်စစ်ဆေး နေပါတယ်” ဟု မိုင်းတုံမြို့မရဲစခန်းမှူး ဒုရဲမှူး ကိုကိုဇော်က ပြောသည်။

.

အဆိုပါ ဘိန်းစိမ်းများနှင့်အတူ ဖမ်းဆီးရမိသူ ကျလားနှင့် ထွက်ပြေးလွတ်မြောက်နေသူ ကျကျိုး တို့ကို မိုင်းတုံမြို့မ ရဲစခန်းတွင် မယ (ပ)၃/၂၀၂၁၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၉(က)/ ၂၁ ဖြင့် အမှုဖွင့်ကာ ထွက်ပြေးတိမ်းရှောင်နေသူ ဖမ်းဆီးရမိရေးအတွက် ဆောင်ရွက်လျက်ရှိကြောင်း သိရသည်။

.

No comments:

Post a Comment

Journal Download

Photo of three cats