မိုင်းတုံမြို့နယ်တွင် လမ်းလုပ်ငန်းသုံး မော်တော်ယာဉ် တိမ်းမှောက်ပြီး တစ်ဦးသေဆုံးကာ ၅ ဦး ဒဏ်ရာရ

မင်းဇော်မင်း

.

မိုင်းဆတ်ခရိုင်၊ မိုင်းတုံမြို့နယ်တွင် ယမန်နေ့ ဇန်နဝါရီလ ၂၆ ရက်၊ ညပိုင်းက လမ်းလုပ်ငန်းသုံး မော်တော်ယာဉ်တစ်စီး တိမ်းမှောက်မှုဖြစ်ပွားခဲ့ပြီး ယာဉ်ပေါ်တွင် လိုက်ပါလာသူ ၁ ဦးသေဆုံးကာ ၅ ဦး ဒဏ်ရာရရှိခဲ့ကြောင်း သိရသည်။

.

.

မိုင်းပျဉ်းမြို့နယ်၊ တုံတာမြို့၊ နောင်ချိုကျေးရွာနေ ယာဉ်မောင်း အာခါလေး (ခ) လော်ဟ မောင်းနှင်ပြီး လမ်းလုပ်သား ၇ ဦး လိုက်ပါစီးနင်းလာသည့် လမ်းလုပ်ငန်းသုံး LIFAN အမျိုးအစား အပြာရောင်မော်တော်ယာဉ်သည် ဇန်နဝါရီလ ၂၆ ရက်၊ ည ၁၁ နာရီခွဲအချိန်ခန့်က မိုင်းတုံမြို့နယ်၊ နားကောင်းမူးဘက်မှ မိုင်းတုံမြို့ဘက်သို့ မောင်းနှင်လာစဉ် မြေနီ တောင်ဆင်း အရောက်တွင် အရှိန်မထိန်းနိုင်ဘဲ လမ်း၏ဝဲဘက်သို့ တိမ်းမှောက်ခဲ့ရာ ယာဉ်ပေါ်ပါလာသူ ဟဲဟိုးမြို့၊ တောင်ပိုက်ကျေးရွာနေ ဖိုးသား (ခ) စည်သူ (၂၂ နှစ်) မှာ အခင်းဖြစ်နေရာတွင် သေဆုံးခဲ့ပြီး အခြား လမ်းလုပ်သား ၅ ဦးမှာ ထိခိုက်ဒဏ်ရာများ ရရှိခဲ့ကာ တစ်ဦးတွင် ဒဏ်ရာရရှိခဲ့ခြင်းမရှိကြောင်း သိရသည်။

.

“ရင်ခွဲဆေးစစ်ချက် လုပ်နေတယ်။ ဒဏ်ရာရသူတွေကိုလည်း ဆေးကုသပေးနေပါတယ်။ ယာဉ်မောင်းကိုတော့ ဆေးရုံ ဆင်းမှ အမှုနဲ့ ဖမ်းဆီးသွားမှာဖြစ်ပါတယ်” ဟု မိုင်းတုံမြို့နယ်၊ နားကောင်းမူးနယ်မြေရဲစခန်းမှူး ရဲအုပ်အောင်ကျော်စွာ က ပြောသည်။

.

အဆိုပါ ယာဉ်မတော်တဆမှုနှင့် ပတ်သက်၍ ယာဉ်မဆင်မခြင်မောင်းနှင်သူ အာခါလေး (ခ) လော်ဟာအား နားကောင်းမူးနယ်မြေရဲစခန်းတွင် ယာဉ်(ပ)၁/၂၀၂၁၊ ရာဇသတ်ကြီးပုဒ်မ ၂၇၉/၃၃၇/၃၃၈/၃၀၄-က ဖြင့် အမှုဖွင့် အရေးယူဆောင်ရွက်လျက်ရှိကြောင်း သိရသည်။

.