မင်းဇော်မင်း
.
ရှမ်းပြည်နယ်မြောက်ပိုင်း၊ “ဝ” ကိုယ်ပိုင်အုပ်ချုပ်ခွင့်ရတိုင်း၊
ပန်ဆန်း (ပန်ခမ်း)မြို့ကို ဇန်နဝါရီလ ၆ ရက်မှ စတင်ကာ Lcokdown ချမည်ဖြစ်ကြောင်း ယင်းဒေသ၏ ဇန်နဝါရီလ ၄ ရက် ထုတ်ပြန်စာအရ သိရသည်။
.
ဒေသတွင်း ဇန်နဝါရီလ ၄ ရက်အထိ COVID-19 ပိုးတွေ့လူနာ ၈၄ ဦး ရှိလာသဖြင့် ယင်းကဲ့သို့ Lockdown ပြုလုပ်ရခြင်း ဖြစ်ကြောင်း လားရှိုးမြို့အခြေစိုက် “ဝ” ဆက်ဆံရေးရုံးမှ ဦးညီရမ်းထံက
သိရသည်။
.
“မနက်ဖြန် (ဇန်နဝါရီလ ၆ ရက်) ကစပြီး ပန်ဆန်း ဘော်ဒါလိုင်းတစ်လျှောက်
Lockdown ချပါမယ်။ ည ၁၂ နာရီက စ ပါမယ်။ ဒီရက်ပိုင်းတွေမှာ တို့ဖတ်နမူနာ
စစ်ဆေးမှုတွေ ပြုလုပ်နေပါတယ်။ ကောင်းကောင်းမွန်မွန် ထိန်းချုပ်နိုင် ပါတယ်။ တရုတ်ပြည်ဘက်က
ကြက်ခြေနီနဲ့ အရပ်ဘက်အဖွဲ့အစည်းတွေ ပူးပေါင်းလုပ်နေတာ ရှိပါတယ်” ဟု ဦးညီရမ်း က ပြောသည်။
.
ပန်ခမ်းမြို့၊ COVID-19 ရောဂါကာကွယ်ထိန်းချုပ်ရေးအဖွဲ့၏
ထုတ်ပြန်ချက်တွင် အချက် ၇ ချက် ပါဝင်ပြီး Lockdown ချသည့်အချိန်ကစ၍
တာဝန်ရှိသူမှအပ မည်သူမျှ အပြင်ထွက်သွားလာခွင့်မရှိ၊ တာဝန်ရှိသူများအားလုံးကို ဇန်နဝါရီ
၃/၄/၅ ရက်များတွင် ဓါတ်ခွဲစစ်ဆေးမှု ပြုလုပ်သွားမည်ဖြစ်ကာ
ယခုတစ်ကြိမ် စစ်ဆေးမှုကိုသာ အသိအမှတ်ပြုမည် ဖြစ်ကြောင်း၊ ပန်ခမ်းမြို့အတွင်း ရှိနေသူများ၊
ပြင်ပမှ ဝင်ရောက်လာသူများအားလုံးကို အခမဲ့ စစ်ဆေးပေးမည် ဖြစ်ကြောင်း နှင့် လမ်းညွှန်ချက်အတိုင်း
လိုက်နာမှုမရှိဘဲ ချိုးဖောက်ပါက ပြင်းထန်စွာ အရေးယူသွားမည်ဖြစ်ကြောင်း၊ အရေးပေါ် ကိစ္စများအား
ပန်ခမ်းမြို့နယ်ရဲစခန်းသို့ ဖုန်းဖြင့် ဆက်သွယ်အကူအညီတောင်းခံနိုင်ပြီး Lockdown
ပြန်ဖြည်မည့်ရက် ကို ပြန်လည်အသိပေးသွားမည်ဖြစ်ကြောင်း ဖော်ပြပါရှိသည်။
.
WSTV သတင်းဌာန၏ ဇန်နဝါရီလ ၄ ရက် သတင်း ထုတ်ပြန်ချက်တွင်
ယင်းနေ့ နေ့လယ် ၁၁နာရီ အထိ “ဝ” ဒေသတစ်ခုလုံး၌ ဓာတ်ခွဲနမူနာ စစ်ဆေးသူ ၇၉၃၀၈ ဦးရှိခဲ့ပြီး
ယင်းအနက် ပန်ခမ်းမြို့တွင် ၃၅ ဦး၊ မိုင်းပေါက်ခရိုင်၊ မိုင်းပေါက်မြို့တွင် ၃၄ ဦး၊
ဟိုတောင်းမြို့တွင် ၇ ဦး၊ မိုင်းဖျန်မြို့တွင် ၈ ဦး စုစုပေါင်း ၈၄ ဦး၌ COVID-19
ရောဂါပိုး တွေ့ရှိကြောင်းနှင့် သေဆုံးသူ မရှိကြောင်း၊ ယင်းအတည်ပြုလူနာများအား
တရုတ်နိုင်ငံ၊ မုန်းလင်မြို့၊ ကြက်ခြေနီ အသင်းမှ ဆေးဝါးကျွမ်းကျင်ပညာရှင်များနှင့်
ဒေသကျန်းမာရေးဌာန၊ ရောဂါကာကွယ်ထိန်းချုပ်ရေးအဖွဲ့တို့ ပူးပေါင်း၍ ဆေးကုသမှုပေးနေပြီး
လူနာအားလုံး ရောဂါပြင်းထန်သူမရှိကြောင်း၊ ယင်းလူနာများ၏ သွားလာ လှုပ်ရှားမှုများကို
စုံစမ်းဖော်ထုတ်လျက်ရှိကြောင်း ဖော်ပြထားသည်။
.
