ကျောက်မဲတွင် ၂ ရက်အတွင်း မူးယစ်ဆေးဝါးရောင်းဝယ်သူ ၃ ဦးကို ဖမ်းမိ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ကျောက်မဲတွင် ၂ ရက်အတွင်း မူးယစ်ဆေးဝါးရောင်းဝယ်သူ ၃ ဦးကို ဖမ်းမိ

မင်းဇော်မင်း

.

ကျောက်မဲမြို့နယ်တွင် ဇန်နဝါရီလ ၂၁ ရက်မှ ၂၂ ရက်အထိ ၂ ရက်တာအတွင်း မူးယစ်ဆေးဝါး ရောင်းဝယ်သူ ၃ ဦးကို ဖမ်းဆီးရမိခဲ့ကြောင်း သိရသည်။

.


.

ကျောက်မဲမြို့မရဲစခန်းမှ တပ်ဖွဲ့ဝင်များ ပါဝင်သော လှည့်ကင်းအဖွဲ့သည် မူးယစ်ဆေးဝါးသတင်းအရ ယနေ့ ဇန်နဝါရီလ ၂၂ ရက်၊ နေ့လယ် ၂ နာရီအချိန်ခန့်က ကျောက်မဲမြို့နယ်၊ နမ့်ဟူးတောင်းကျေးရွာအုပ်စု၊ ပန်မောင်ကျေးရွာနေ မဆွေ (ခ) ခင်မာဆွေ၏ နေအိမ်အား ဝင်ရောက်ရှာဖွေရာ အိပ်ခန်းအတွင်း သိုဝှက်ထားသည့် WY စာတမ်းပါ စိတ်ကြွ ရူးသွပ်ဆေးပြား ၄၇၃ ပြား၊ အလေးချိန် ၄၂ ဒသမ ၅ ဂရမ်ကို ဖမ်းဆီးရမိခဲ့ကြောင်း သိရသည်။

.

ထို့အတူ ယမန်နေ့ ဇန်နဝါရီလ ၂၁ ရက်၊ ညနေပိုင်းက ကျောက်မဲမြို့၊ အမှတ် (၂) ရပ်ကွက်နေ အိုက်ပန် (ခ) သက်နိုင်ဦး ၏ နေအိမ်အား ဝင်ရောက်ရှာဖွေရာ နေအိမ်တွင် ၎င်းနှင့်အတူ ကျောက်မဲမြို့၊ အမှတ် (၃) ရပ်ကွက်နေ မြင့်ထွန်းနိုင် (ခ) အားတီ တို့အား တွေ့ရပြီး ခုတင်အောက် ဖိနပ်အတွင်း သိုဝှက်ထားသည့် စိတ်ကြွရူးသွပ်ဆေးပြား ၁၉၄ ပြား၊ အလေးချိန် ၁၇ ဒသမ ၄၆ ဂရမ်ကို ဖမ်းဆီးရမိခဲ့ကြောင်း သိရသည်။

.

“အုပ်ချုပ်ရေးနဲ့ ရဲက အားမထုတ်တာရယ်၊ ခရိုင်မြို့ဖြစ်လို့ အချုပ်ခန်းမှာ တခြားမြို့က အချုပ်သားတွေ ပြည့်နေတာ ကြောင့် အခုလို မဖမ်းနိုင်ခဲ့ဘူး။ အားထုတ်မှုကြောင့် အခုလို လုပ်နိုင်တာပါ။ ကျောက်မဲမှာ အချုပ်ထောင် ဆောက်သင့် တယ်။ မူးယစ်မှုက တကယ်ဖမ်းမယ်ဆိုရင် အများကြီးပဲ” ဟု ကျောက်မဲခရိုင်မူးယစ်ဆေးဝါးဆန့်ကျင်ရေးအသင်း ဥက္ကဋ္ဌ ဦးတင်မောင်သိန်းက ပြောသည်။

.

အဆိုပါ မူးယစ်ဆေးဝါးများနှင့်အတူ ဖမ်းဆီးရမိသူများကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဆိုင်ရာဥပဒေဖြင့် အမှုဖွင့်အရေးယူ ဆောင်ရွက်လျက်ရှိကြောင်း သိရသည်။

.

Journal Download

Photo of three cats