.
ကျောက်မဲမြို့ပေါ်ရှိ တိုက်ပွဲရှောင် စခန်း ၄ ခုမှ တိုက်ပွဲရှောင်ပြည်သူ အိမ်ထောင်စု ၉၀ ကျော်အား အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ကျောက်မဲမြို့နယ်ဦးစီးမှူးရုံးမှ မြို့နယ်ဦးစီးမှူး ဦးဝင်းထိန်နှင့် တာဝန်ရှိသူများက ယနေ့ ဇန်နဝါရီလ ၂၉ ရက်၊ နံနက်ပိုင်းတွင် ပိန္နဲကုန်းကျေးရွာအုပ်စု၊ ဝါဆိုကျောင်းတိုက်၌ အိမ်ထောင်စု စာရင်းနှင့် နိုင်ငံသားစိစစ်ရေးကတ်ပြားများ ပေးအပ်ခဲ့ကြောင်း သိရသည်။
.
ကျောက်မဲမြို့နယ် ၊ လွယ်အံတင်းကျေးရွာအုပ်စု အတွင်း တိုင်းရင်းသား လက်နက်ကိုင် အဖွဲ့ အချင်းချင်း ဖြစ်ပွားခဲ့သော တိုက်ပွဲများကြောင့် ကျောက်မဲမြို့ပေါ်ရှိ တိုက်ပွဲရှောင် စခန်း ၄ နေရာသို့ ကျေးရွာ ၆ ရွာမှ ပြည်သူ ၁၀၀၀ ကျော်တို့က တိမ်းရှောင်ခိုလှုံ ရောက်ရှိ နေကြခြင်း ဖြစ်သည်။
.
အဆိုပါ တိုက်ပွဲရှောင် ပြည်သူများ အနက် အိမ်ထောင်စုစာရင်း မရှိသေးသည့် အိမ်ထောင်စု ၉၇ စုနှင့် နိုင်ငံသားစိစစ်ရေးကတ် မရှိသေးသူ ၆၉ ဦးအတွက် နိုင်ငံသားစိစစ်ရေးကတ်များ ထုတ်ပေးခြင်း ဖြစ်ကာ မွေးတိုး၊ သေဆုံးပယ်ဖျက်ခြင်း စသည့် လုပ်ငန်းများကိုလည်း ဇန်နဝါရီ ၅ ရက်မှ စတင်၍ ကွင်းဆင်းဆောင်ရွက်ပေးခဲ့ကြောင်း မြို့နယ်ဦးစီးမှူး ဦးဝင်းထိန်ထံမှ သိရသည်။
