ကိုစိုး (ကမ္ဘောဇတိုင်း)
.
တတိယအကြိမ် ရှမ်းပြည်နယ်လွှတ်တော် အစည်းအဝေးများကို
လာမည့် ဖေဖော်ဝါရီလ ၈ ရက်တွင် ကျင်းပနိုင်ရန် လျာထားဆောင်ရွက်လျက်ရှိပြီး ယင်းမတိုင်မီတွင်
ရှမ်းပြည်နယ်အစိုးရအဖွဲ့မှ အကြောင်းကြားလာပါက ဒုတိယအကြိမ် လွှတ်တော် အစည်းအဝေးကို ကျင်းပပေးရန်
ရှိနေသည်ဟု သိရသည်။
.
.“ကြားထဲမှာ RE (ဖြည့်စွက်ရန်ပုံငွေ)
အတွက် အစိုးရအဖွဲ့က အကြောင်းကြားရင်တော့ ဒုတိယအကြိမ်လွှတ်တော် ခေါ်ပေးမှာပေါ့။ အကြောင်းမကြားရင်တော့
တတိယအကြိမ် လွှတ်တော်ကို တစ်ဆက်တည်း လုပ်သွားမှာပါ။ တတိယအကြိမ်အတွက်တော့ ဖေဖော်ဝါရီလ
၈ ရက်လောက်မှာ စ နိုင်အောင် အဆင်သင့် လုပ်ထားပါတယ်။ လွှတ်တော်ကိုယ်စားလှယ်အသစ် ၁၄၀
ရဲ့ ခန့်အပ်လွှာတွေ ရောက်ပြီဆိုရင် ဖိတ်ကြားရေးနဲ့ နေရာထိုင်ခင်း တော့ လုပ်ပြီးသွားပါပြီ”
ဟု ရှမ်းပြည်နယ်လွှတ်တော် ဒုတိယဥက္ကဋ္ဌ ဦးစဝ်အောင်မြတ်က ကမ္ဘောဇတိုင်းသို့ ပြောသည်။
.
ထိုသို့ တတိယအကြိမ် လွှတ်တော်အစည်းအဝေး ကျင်းပရာတွင်
ဒုတိယအကြိမ် လွှတ်တော်နှင့် မချိတ်ဆက် တော့ဘဲ လွှတ်တော် ဥက္ကဋ္ဌနှင့် ဒုတိယဥက္ကဋ္ဌ
အသစ်၊ အဟောင်းတို့သာ တာဝန်လွှဲပြောင်းလက်ခံဆောင်ရွက်သွားရန် စီစဉ်ထား ပြီး ဒုတိယအကြိမ်
လွှတ်တော်ကိုယ်စားလှယ်ဟောင်းများကိုလည်း အချိန်ကာလ ကန့်သတ်ချက်အရ ကြယ်ပွင့်မပြ မေးခွန်းများကိုသာ
မေးမြန်းခွင့် ပြုထားကြောင်း သိရသည်။
.
တတိယအကြိမ် ရှမ်းပြည်နယ်လွှတ်တော်ကို အမျိုးသားဒီမိုကရေစီအဖွဲ့ချုပ်ပါတီမှ ကိုယ်စားလှယ် ၂၉ ဦး၊ ရှမ်းတိုင်းရင်းသားများဒီမို ကရေစီအဖွဲ့ချုပ်ပါတီမှ ကိုယ်စားလှယ် ၂၆ ဦး၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ကိုယ်စားလှယ် ၂၄ ဦး၊ တအာင်း (ပလောင်) အမျိုးသားပါတီမှ ကိုယ်စားလှယ် ၇ ဦး၊ ပအိုဝ်းအမျိုးသားအဖွဲ့ချုပ်ပါတီမှ ကိုယ်စားလှယ် ၇ ဦး၊ “ဝ” အမျိုးသားပါတီမှ ကိုယ်စားလှယ် ၂ ဦး၊ ရှမ်းတိုင်းရင်းသားများဒီမိုကရက်တစ်ပါတီမှ ကိုယ်စားလှယ် ၁ ဦး၊ လားဟူအမျိုးသားဖွံ့ဖြိုးတိုးတက်ရေးပါတီမှ ကိုယ်စားလှယ် ၁ ဦး၊ တစ်သီး ပုဂ္ဂလကိုယ်စားလှယ် ၁ ဦးနှင့် တပ်မတော်သား လွှတ်တော်ကိုယ်စားလှယ် ၃၅ ဦး၊ တိုင်းရင်းသားရေးရာ ကိုယ်စားလှယ် ၇ ဦး၊ စုစုပေါင်း ၁၄၀ ဦးဖြင့် ဖွဲ့စည်းထားသည်။