စုလှိုင်
.
တောင်ကြီးမြို့၊ အမှတ် (၁၈) ယာဉ်ထိန်းရဲ ဒုတပ်ဖွဲ့ခွဲမှူးရုံး(ရှမ်းတောင်)မှ
COVID-19 ရောဂါပိုး တွေ့ရှိခဲ့သည့် ယာဉ်ထိန်းတပ်ဖွဲ့ဝင် ၂၂
ဦးအနက် ၁၉ ဦးသည် ယနေ့ ဇန်နဝါရီလ ၈ ရက်၊ နံနက်ပိုင်းတွင် ဆေးရုံမှ ဆင်းခွင့်ရပြီ ဖြစ်ကြောင်းသိရသည်။
.
“စဝ်စံထွန်းက ၁၉ ဦးလုံး အကုန် ဆင်းခွင့်ရပါပြီ။ အခု
တောင်ကြီးကွန်ပျူတာတက္ကသိုလ်မှာ Quarantine ဝင်နေပါပြီ” ဟု အမှတ်
(၁၈) ယာဉ်ထိန်းရဲ ဒုတပ်ဖွဲ့ခွဲမှူး ဒုရဲမှူးထွန်းနိုင်အောင်က ကမ္ဘောဇတိုင်းသို့ ပြောသည်။
.
အဆိုပါ ပိုးတွေ့လူနာ ၂၂ ဦးအနက် စဝ်စံထွန်းဆေးရုံတွင်
တက်ရောက်ဆေးကုသမှုခံယူနေသော ၁၉ ဦး ဆေးရုံ ဆင်းခွင့်ရပြီး အမျိုးသမီးနှင့် ကလေးဆေးရုံကြီးတွင်
တက်ရောက်ဆေးကုသမှု ခံယူနေသော ၃ ဦးသာ ဆက်လက် ဆေးကုသမှု ခံယူနေခြင်းဖြစ်ကြောင်း သိရသည်။
.
ထို့အတူ စဝ်စံထွန်းဆေးရုံအုပ် ဒေါက်တာ ဒေါ်ဝေဝေမွန်
ကလည်း “ဟုတ်ပါတယ်။ တော်တော်များများ ဆေးရုံဆင်း သွားပါပြီ” ဟု အတည်ပြုပြောဆိုခဲ့သည်။
.
ယာဉ်ထိန်းတပ်ဖွဲ့ဝင်များအနက်
အနံ့ပျောက်သူများရှိကြောင်း သတင်းအရ
ဒီဇင်ဘာလ ၃၀ ရက်တွင် RDT
Test Kit ဖြင့် တပ်ဖွဲ့ဝင် ၁၃၃ ဦးအား သွားရောက်စစ်ဆေးပေးရာမှ ပိုးတွေ့လူနာ ၂၂ ဦး
တွေ့ရှိခဲ့ခြင်းဖြစ်ကြောင်း သိရသည်။
.
