ရှမ်းမြောက်တွင် COVID-19 နှင့် ပတ်သက်၍ ဖြေလျှော့သည့်အစီအစဉ်များကို ခေတ္တ ဆိုင်းငံ့ထား

မင်းဇော်မင်း

.

ရှမ်းပြည်နယ်မြောက်ပိုင်းဒေသအတွင်းရှိ မြို့နယ်များတွင် COVID-19 ရောဂါ ကာကွယ်ထိန်းချုပ်ရေးနှင့် ပတ်သက်၍ ကန့်သတ်ချက် ဖြေလျှော့သည့် အစီအစဉ်များကို ခေတ္တ ပြန်လည်ဆိုင်းငံ့ထားသည်ဟု သိရသည်။

.

.

ယမန်နေ့ ဇန်နဝါရီလ ၂၇ ရက်က စတင်၍ ရှမ်းပြည်နယ်မြောက်ပိုင်း အတွင်းရှိ မြို့နယ်များတွင် အသွားအလာ ကန့်သတ်မှုနှင့် ပတ်သက်၍ ဖြေလျှော့မှုများ လုပ်ဆောင်ခဲ့သော်လည်း ယင်းနေ့တွင်ပင် လားရှိုးမြို့ရှိ ကွတ်ခိုင်နှင့် မူဆယ်ပြန် Quarantine ဝင်ရောက်နေသူ ၂ ဦးတွင် COVID-19 ရောဂါပိုး တွေ့ရှိခဲ့သည့်အတွက် ယနေ့ ဇန်နဝါရီလ ၂၈ ရက်မှ စတင်၍ ဖြေလျှော့မှုကို ခေတ္တဆိုင်းငံ့မည်ဖြစ်ကြောင်းနှင့် သင့်လျော်မည့် အချိန်တွင် ပြန်လည်ဖြေလျှော့ပေး သွားရန် ရှိကြောင်း လားရှိုးမြို့နယ် COVID-19 ကာကွယ်ထိန်းချုပ်ရေးကော်မတီ ဥက္ကဋ္ဌ၊ မြို့နယ်အုပ်ချုပ်ရေးမှူး ဦးအာကာလင်း က ပြောဆိုခဲ့သည်။

.

“မနေ့ကပဲ Positive ၃ ယောက်ထွက်တယ်။ မူဆယ်နဲ့ ကွမ်းလုံကပြန်လာလို့ Quarantine ထည့်ထားတဲ့ ၂ ယောက်မှာ တွေ့တယ်၊၊ နောက်တစ်ယောက်က မြဝတီပြန်ပါ။ ဖြေလျှော့မယ်ဆိုပြီး အဲဒီလိုဖြစ်တော့ အခုလို ဆိုင်းငံ့လိုက်တာပါ။ အစည်းအဝေး ပြန်ဆွေးနွေးပြီးမှ သင့်တော်မယ့်သတင်းအချက်အလက်တွေနဲ့ လက်ခံဖို့ ဖြေလျှော့ လျှော့မှာပါ၊ မနက်ဖြန် (ဇန်နဝါရီ ၂၉ ရက်) လည်း ဖြစ်နိုင်ပါတယ်” ဟု ဦးအာကာလင်းက ပြောသည်။

.

ဒေသတွင်း မြို့နယ်များမှ လားရှိုးမြို့သို့ ပြန်လည်ဝင်ရောက်လာသူများကို ဇန်နဝါရီလ ၂၇ ရက်မှ စတင်၍ Quarantine ဝင်ရောက်ရန်မလိုဘဲ ညအိပ်ခွင့်ပြုကြောင်း ထုတ်ပြန်ခဲ့ပြီး ယခုအခါ ပိုးတွေ့လူနာများ ဆက်လက်တွေ့ရှိနေသဖြင့် ဖြေလျှော့မှုအစီအစဉ်အား ခေတ္တဆိုင်းငံ့ခြင်းဖြစ်ကြောင်း သိရသည်။

.

ရှမ်းပြည်နယ် တောင်ပိုင်း၊ အရှေ့ပိုင်း အပါအဝင် အခြားတိုင်းဒေသကြီး/ပြည်နယ်များမှ ရှမ်းပြည်နယ်မြောက်ပိုင်းဒေသ သို့ ဝင်ရောက်လာပါက Quarantine ၁၄ ရက် ဝင်ရောက်ရမည်ဖြစ်ပြီး ပိုးမတွေ့ပါက Home Quarantine ၇ ရက် ဝင်ရန် မလိုကြောင်းနှင့် တစ်လအတွင်း ရယူထားသည့် ရပ်ကွက်/ကျေးရွာ ထောက်ခံစာ များဖြင့် သွားလာနိုင်ကြောင်း သိရသည်။

.

လားရှိုးမြို့နယ်အပါအဝင် တစ်နိုင်ငံလုံးရှိ ကျန်းမာရေးဝန်ထမ်းများကို ပထမအသုတ်အနေဖြင့် COVID-19 ရောဂါ ကာကွယ်ဆေး စတင်ထိုးနှံနေပြီ ဖြစ်သဖြင့် ဖြေလျှော့မည့်အစီအစဉ်များ ကိုရက်ပိုင်းအတွင်း ပြန်လည်စတင်နိုင်ရန် ဒေသခံများမှ မျှော်လင့်လျက်ရှိကြောင်း သိရသည်။

.