တောင်ကြီးတွင် COVID-19 ကာကွယ်ဆေးများ စတင်ထိုးနှံပေး

စုလှိုင်၊ နန်းဝင်းရီ

.

ရှမ်းပြည်နယ်မြို့တော် တောင်ကြီးမြို့၊ စဝ်စံထွန်းဆေးရုံနှင့် အမျိုးသမီးနှင့် ကလေးဆေးရုံတို့တွင် ယနေ့ ဇန်နဝါရီလ ၂၈ ရက်၊ နံနက်ပိုင်းမှ စတင်၍ ကျန်းမာရေးဝန်ထမ်းများအား COVID-19 ကာကွယ်ဆေး (COVISHIIELD) များ စတင်ထိုးနှံပေးလျက်ရှိကြောင်း သိရသည်။

.

.

ထိုသို့ ထိုးနှံပေးရာတွင် စဝ်စံထွန်းဆေးရုံ၌ ကျန်းမာရေးဝန်ထမ်း ၆၀၀ ဦးတို့ကိုလည်းကောင်း၊ အမျိုးသမီးနှင့် ကလေး ဆေးရုံကြီး၌ ကျန်းမာရေးဝန်ထမ်း ၂၄၃ ဦးတို့ကိုလည်းကောင်း စတင်ထိုးနှံပေးနေခြင်းဖြစ်ပြီး ဇန်နဝါရီလ ၂၉ ရက်တွင် ထပ်မံ ထိုးနှံပေးသွားမည်ဖြစ်ကာ ရှမ်းပြည်နယ်တောင်ပိုင်း ဒေသအတွင်းရှိ မြို့နယ်အသီးသီးတွင်လည်း ကျန်းမာရေး ဝန်ထမ်းများကို COVID-19 ကာကွယ်ဆေးများ တစ်ပြိုင်နက် ထိုးနှံပေးလျက်ရှိကြောင်း သိရသည်။

.

“ဒီနေ့ကတော့ ရှမ်းပြည်နယ်တောင်ပိုင်းမှာ ကျန်းမာရေးဝန်ထမ်းတွေကို COVID-19 ကာကွယ်ဆေး ပထမဆုံး စထိုးနှံတာ ဖြစ်ပါတယ်။ ကျန်းမာရေးနဲ့ အားကစားဝန်ကြီးဌာန အောက်မှာရှိတဲ့ ဦးစီးဌာန အားလုံးက ဝန်ထမ်းတွေကို ထိုးပေးမှာဖြစ်ပါတယ်။ တောင်ကြီးမှာလိုပဲ တစ်ခြားမြို့နယ်တွေမှာလည်း တစ်ပြိုင်နက် စထိုးပေးနေပါတယ်” ဟု ရှမ်းပြည်နယ် ကုသရေးနှင့် ပြည်သူ့ကျန်းမာရေးဦးစီးဌာနမှူး ဒေါက်တာ သူဇာချစ်တင်က ပြောသည်။

.

ထို့အတူ တောင်ကြီးမြို့ အမျိုးသမီးနှင့် ကလေးဆေးရုံမှ ဒေါက်တာဝတ်မှုံကလည်း “ဆေးရုံက အင်အား ၂၃၁ ယောက်နဲ့ သားဖွားသင်တန်းကျောင်းက ကျောင်းသူတွေကို ခေါ်ထိုးပေးနေတယ်။ မနက်ဖြန် ဆေးတက္ကသိုလ်နဲ့ အားကာသိပ္ပံက ထိုးပေးဖို့ ကျန်ပါမယ်” ဟု ပြောဆိုခဲ့သည်။

.

ရှမ်းပြည်နယ်တောင်ပိုင်းဒေသအတွက် ပထမအသုတ် အနေဖြင့် COVID-19 ကာကွယ်ဆေး ၅၆၄ လုံး ရရှိထားပြီး တစ်လုံးလျှင် လူ ၁၀ ဦး ထိုးနှံ ပေးနိုင်သည့်အတွက် လူဦးရေ ၅၆၀၀ ကျော်အား ထိုးနှံပေးနိုင်မည်ဖြစ်ကာ ဒုတိယ အသုတ် အနေဖြင့် လာမည့် ဖေဖော် ဝါရီလ ၅ ရက်တွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်နှင့် ဝန်ကြီးများ၊ လွှတ်တော်ကိုယ်စားလှယ်များကို COVID-19 ကာကွယ်ဆေး ထိုးနှံပေးသွားမည်ဖြစ်ကြောင်း သိရသည်။

.

ယင်းကဲ့သို့ COVID-19 ကာကွယ်ဆေး ထိုးနှံပေးနိုင်ရေးအတွက် ဦးစားပေး အုပ်စု ၂၀ ခွဲခြားကာ စာရင်းကောက်ခံလျက် ရှိပြီး ထိုးနှံပေးမည့် အုပ်စုကို ဗဟိုမှ ရွေးချယ်ဆုံးဖြတ်ပေးပါက ထိုးနှံပေးနိုင်ရေးအတွက် ဆောင်ရွက်ပေးသွားမည် ဖြစ်ကြောင်း ၎င်းက ဆက်လက်ပြောကြားခဲ့သည်။

.

ကာကွယ်ဆေး ထိုးနှံရာတွင် အသက် ၁၈ နှစ်အထက် ရှိသူများသာ ထိုးနှံနိုင်မည်ဖြစ်ကာ ကိုယ်ဝန်ဆောင်နှင့် နို့တိုက်မိခင်များ မထိုးနှံသင့်ဘဲ ကိုယ်အင်္ဂါ အစားထိုး ခွဲစိတ်ကုသခံထားရသူများ ခုခံအားကျရောဂါနှင့် ခုခံအား ကျဆင်းစေသည့် ဆေးဝါး တစ်ခုခု သုံးစွဲနေရသူများ အနေဖြင့် ကာကွယ်ဆေး ထိုးနှံခြင်း ခံယူရန် သင့်/မသင့်ကို ဆရာဝန်များနှင့် ကြိုတင်တိုင်ပင်ရန် လိုအပ်ကြောင်း သိရသည်။

.