ကမ္ဘောဇတိုင်း
.
မူဆယ်ပြည်သူ့ဆေးရုံရှိ အထူးကြပ်မတ်ကုသဆောင်တွင် ဆေးကုသမှု
ခံယူနေသော COVID-19 လူနာတစ်ဦး ယမန်နေ့ ဇန်နဝါရီလ ၂၂ ရက်၊ ညပိုင်းက
သေဆုံးသွားခဲ့ကြောင်း သိရသည်။
.
“မနေ့က ၅ နာရီ ၄၅ မိနစ်လောက်မှာ တစ်ယောက် သေဆုံးပါတယ်။
သူကဆီးချို၊ နှလုံးသွေးကြောကျဉ်းနဲ့ နှလုံး အားနည်းတဲ့ရောဂါ ၃ မျိုးရှိပါတယ်” ဟု မူဆယ်ပြည်သူ့ဆေးရုံမှ
ဒေါက်တာ လှထွန်းက ကမ္ဘောဇတိုင်းသို့ ပြောသည်။
.
သေဆုံးသူသည် အသက် ၄၅ နှစ်အရွယ်ရှိ အမျိုးသားတစ်ဦးဖြစ်ပြီး
မူဆယ်မြို့ရှိ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနတွင် တာဝန်ထမ်းဆောင်နေသည့်
ဝန်ထမ်းတစ်ဦး ဖြစ်ကြောင်း သိရသည်။
.
အဆိုပါ အမျိုးသားသည် ပြီးခဲ့သည့် ၂၀၂၀ ပြည့်နှစ်၊
ဒီဇင်ဘာလ ၂၄ ရက်က မြန်မာ-တရုတ်နယ်စပ်၊ မူဆယ်မြို့ရှိ နန်းတော်ဂိတ်တွင် တရုတ်နိုင်ငံသို့
လွှဲပြောင်းပေးခဲ့သည့် မန္တလေးဗဟိုအကျဉ်းထောင်မှ ပြစ်ဒဏ်ကျ တရုတ်နိုင်ငံသား အကျဉ်းသား
ပိုးတွေ့လူနာများနှင့် ထိတွေ့မှု ရှိခဲ့သူဖြစ်ကြောင်း သိရသည်။
.
ပြီးခဲ့သည့် ဒီဇင်ဘာလ ၁၀ ရက်ကလည်း လားရှိုးဆေးရုံတွင်
ဆေးကုသမှုခံယူနေသည့် COVID-19 ပိုးတွေ့လူနာ တစ်ဦး
အဆုတ်ရောင်ရောဂါအခံဖြင့် သေဆုံးမှု ဖြစ်ပွားခဲ့ဖူးပြီး ရှမ်းပြည်နယ်တစ်ခုလုံးတွင် COVID-19 အတည်ပြု လူနာများအနက် သေဆုံးသူ ၄ ဦး ရှိလာပြီဖြစ်ကြောင်း သိရသည်။
.
