အထူးဒေသ (၄) မိုင်းလားတွင် COVID-19 လူနာ မရှိတော့သဖြင့် မိုင်းယု-ကျိန်းယဲန်းတံတား ကို ပြန်လည်ဖွင့်လှစ်

ကိုကိုနိုင် (မိုင်းယု)

.

ရှမ်းပြည်နယ်အရှေ့ပိုင်း၊ အထူးဒေသ (၄) မိုင်းလားတွင် COVID-19 ရောဂါပိုး ကူးစက်လူနာ မရှိတော့သဖြင့် ကုန်စည် စီးဆင်းမှု အဆင်ပြေစေရန်အတွက် အထူးဒေသ (၄) နှင့် တာချီလိတ်ခရိုင်၊ မိုင်းယုမြို့တို့ကို ဆက်သွယ်ထားသည့် မိုင်းယု-ကျိန်းယဲန်းတံတားကို ယမန်နေ့ ဇန်နဝါရီလ ၂၀ ရက်၊ နံနက်ပိုင်းမှ စတင်၍ ပြန်လည်ဖွင့်လှစ်ပေးခဲ့ကြောင်း သိရသည်။

.

.

အထူးဒေသ (၄) မိုင်းလားနယ်မြေအတွင်း COVID-19 ရောဂါ ကူးစက်မှုအခြေအနေများကြောင့် ပြီးခဲ့သည့် ၂၀၂၀ ပြည့်နှစ်၊ ဒီဇင်ဘာလ ၄ ရက်၊ ညနေပိုင်းက အဆိုပါ မိုင်းယု-ကျိန်းယဲန်းတံတားကို NDAA မိုင်းလားအဖွဲ့မှ ဖြတ်သန်း သွားလာခွင့် ရက်အကန့်အသတ်မရှိ ယာယီပိတ်ပင်ခဲ့ခြင်းဖြစ်သည်ဟု သိရသည်။

.

ယခုအခါ အထူးဒေသ (၄) တွင် COVID-19 ရောဂါပိုး ကူးစက်လူနာ မရှိတော့သဖြင့် မိုင်းလားအထူးဒေသ (၄) နမ့်ပန်းဒေသ ရဲမှူးမှ မိုင်းယုမြို့ရှိ ဌာနဆိုင်ရာတာဝန်ရှိသူများထံ တယ်လီဖုန်းဖြင့် ဆက်သွယ်ကာ ကုန်စည်စီးဆင်းမှု အဆင်ပြေစေရန်အတွက် ဇန်နဝါရီလ ၂၀ ရက်၊ နံနက် ၆ နာရီအချိန်မှ စတင်၍ ပြန်လည်ဖွင့်လှစ်ပေးခဲ့ခြင်းဖြစ်ကြောင်း သိရသည်။

.

အထူးဒေသ (၄) မိုင်းလားတွင် ပြီးခဲ့သည့် ဒီဇင်ဘာလ ၂၀ ရက်က ခရီးသွားရာဇဝင်မရှိသူတစ်ဦးထံမှ COVID-19 ရောဂါပိုး တွေ့ရှိခဲ့ပြီးနောက် ဒေသကို အသွားအလာကန့်သတ်ခြင်း (Lockdown) ကြေညာခဲ့ပြီး ယနေ့ ဇန်နဝါရီလ ၂၁ ရက်တွင် Lockdown ပြန်လည်ဖြေလျှော့ပေးခဲ့သည်ဟု သိရသည်။

.