ကျောက်မဲမြို့နယ်တွင် တိုက်ပွဲများ ငြိမ်သက်သွားပြီး အုံငန်းကျေးရွာ၌ တိုက်ပွဲ‌ရှောင် ၁၀၀ ကျော် ရောက်ရှိနေ

မင်းဇော်မင်း

.

ကျောက်မဲမြို့နယ်အတွင်း ဖြစ်ပွားနေသည့် RCSS နှင့် TNLA တို့၏ စစ်ရေးပဋိပက္ခများ ယနေ့ ဇန်နဝါရီလ ၅ ရက်၊ နံနက်ပိုင်းတွင် ပစ်ခတ်သံများ မကြားရတော့ဘဲ ငြိမ်သက်သွားပြီး တော့ဆန်ကျေးရွာမှ တိုက်ပွဲရှောင် ၁၀၉ ဦးသည် တောင်ဘက် ၅ မိုင်ခန့်အကွာရှိ အုံငန်းကျေးရွာ ဘုန်းတော်ကြီးကျောင်းသို့ ရောက်ရှိခိုလှုံနေကြကြောင်း သိရသည်။

ဓါတ်ပုံ - အုမ်တမာဝ်လူမှုကူညီရေးအသင်း၊ ဦးတင်မောင်သိန်း

.

“ဒီမနက်တော့ တိုက်ပွဲသံ မကြားရတော့ဘူး။ အထိအခိုက် များတယ်ကြားတယ်။ မြို့ပေါ်တော့ လူနာတွေ ရောက်လာ တာ မရှိဘူး။ စစ်ရှောင်တွေလည်း မြို့ပေါ်ကို ထပ်ရောက်လာတာ မတွေ့ရဘူး” ဟု ကျောက်မဲမြို့ စစ်ဘေးရှောင်ကူညီ ရေး ဥက္ကဋ္ဌ ဦးတင်မောင်သိန်းက ပြောသည်။

.

အဆိုပါ တိုက်ပွဲများနှင့် ပတ်သက်၍ RCSS ဆက်ဆံရေးရုံးမှ ဒုတိယဗိုလ်မှူးကြီး စိုင်းအုမ်ခေးက “သီပေါ၊ ကျောက်မဲ၊ နမ္မတူဘက်တွေမှာ လှုပ်ရှားနေတဲ့ ကျွန်တော်တို့တပ်တွေကို မလိုလားလို့ TNLA က တိုက်ပွဲဆင်လာတာပါ။ ပြီးတော့ ကျွန်တော်တို့တပ်တွေက ရွာတွေထဲမှာ မလှုပ်ရှားဘူး။ ရွာသားတွေကိုလည်း မထိန်းချုပ်ဘူး။ သူတို့ သွားလိုရာ သွား နိုင်အောင် ကူညီပေးနေပါတယ်။ ပန်လော့ဘက်မှာ လက်နက်ကြီးထိတယ် ဆိုတဲ့ ရွာသားတွေ ကိစ္စဆိုရင် ကျွန်တော်တို့ ပစ်တာမဟုတ်ဘူး။ ကျွန်တော်တို့က ရွာတွေထဲ မပစ်ဘူး” ဟု ပြောကြားခဲ့သည်။

.

ထို့အတူ TNLA ဆက်ဆံရေးရုံးသို့ ဆက်သွယ်မေးမြန်းရန် ကြိုးပမ်းခဲ့သော်လည်း ဆက်သွယ်၍ မရခဲ့ချေ။

.

ယနေ့ ဒီဇင်ဘာလ ၅ ရက်၊ နံနက်ပိုင်းတွင် ကျောက်မဲဘက်၌ တိုက်ပွဲများ ငြိမ်သက်နေသော်လည်း နမ္မတူမြို့နယ် ဘက်တွင်မူ နံနက် ၆ နာရီခွဲအချိန်မှစ၍ ပန်ချင်ကျေးရွာအုပ်စု၊ ညောင်းဆွယ်၊ နားမတ်၊ ဟွေးဟုန်းကျေးရွာများအနီး တစ်ဝိုက်တွင် RCSS နှင့် TNLA တို့ တိုက်ပွဲများ ပြင်းထန်ခဲ့ပြီး နံနက် ၉ နာရီခန့်တွင် ပစ်ခတ်သံများ ရပ်စဲသွားကြောင်း သိရသည်။

.

လက်ရှိတွင် နမ္မတူမြို့နယ်၊ မန်စံဘုန်းကြီးကျောင်းတွင် ပန်ချင်အုပ်စုမှ တိုက်ပွဲရှောင် ၇၁ ဦးရောက်ရှိနေပြီး ကျောက်မဲမြို့ပေါ်ရှိ စစ်ရှောင်စခန်း ၄ ခုတွင် လူဦးရေ ၁၀၀၀ ခန့် ရောက်ရှိနေသဖြင့် အုမ်တမာဝ်လူမှုကူညီရေး အသင်းနှင့် စေတနာရှင်များမှ ချက်ပြုတ်ကျွေးမွေးကူညီစောင့်ရှောက်ပေးလျက်ရှိကြောင်း သိရသည်။

.