မြန်မာ့ဒီမိုကရက်တစ် အသွင်ကူးပြောင်းမှုကို ကြန့်ကြာစေရန် ကြိုးပမ်းအားထုတ်မှုမျိုးကို ကန့်ကွက်ကြောင်း သံတမန်အဖွဲ့အစည်းများ ထုတ်ပြန်

ကမ္ဘောဇတိုင်း

.

မြန်မာ့ဒီမိုကရက်တစ်အသွင်ကူးပြောင်းမှုကို ကြန့်ကြာစေရန်အလို့ငှာ မည်သို့သောကြိုးပမ်းအားထုတ်မှုမျိုးကိုမဆို ဆန့်ကျင်ကန့်ကွက်ကြောင်း မြန်မာနိုင်ငံအခြေစိုက် သံတမန်အဖွဲ့အစည်းများက ယနေ့ ဇန်နဝါရီလ ၂၉ ရက်၊ နံနက်ပိုင်းတွင် ပူးတွဲကြေညာချက် ထုတ်ပြန်ကြေညာခဲ့သည်ဟု သိရသည်။

.

.

မြန်မာနိုင်ငံ၏ ဒီမိုကရက်တစ်အသွင်ကူးပြောင်းရေးနှင့်နိုင်ငံတော်အတွင်း ငြိမ်းချမ်းရေးနှင့်ဖွံ့ ဖြိုးရေး မြှင့်တင်နိုင်ရန် ကြိုးပမ်းအားထုတ်နေမှုကို အားပေးထောက်ခံကြောင်း၊ ဖေဖော်ဝါရီလ ၁ ရက်တွင် လွှတ်တော်အသစ် စတင်ရေးနှင့် သမ္မတသစ်တစ်ဦး ရွေးချယ်တင်မြှောက်ရေး လုပ်ငန်းစဉ်ကို ငြိမ်းငြိမ်းချမ်းချမ်းဆောင်ရွက်နိုင်ရေးအတွက် မျှော်လင့် ပါကြောင်း၊ ကျင်းပပြီးစီးခဲ့သော ရွေးကောက်ပွဲတွင် ပါဝင်ခဲ့မှုအတွက် မြန်မာနိုင်ငံသားများကို ဂုဏ်ယူဝမ်းမြောက် ကြောင်းနှင့် တပ်မတော်နှင့် နိုင်ငံအတွင်းရှိအခြားသော လူပုဂ္ဂိုလ် အဖွဲ့အစည်းအားလုံးအနေဖြင့် ဒီမိုကရေစီ စံနှုန်းများကို လိုက်နာ စောင့်ထိန်းကြပါရန် တိုက်တွန်းပါကြောင်း အဆိုပါ ထုတ်ပြန်ချက်တွင် ဖော်ပြပါရှိသည်။

.

ထို့အပြင် ရွေးကောက်ပွဲရလဒ်ကိုပြောင်းလဲရန် သို့မဟုတ် မြန်မာ့ဒီမိုကရက်တစ်အသွင်ကူးပြောင်းမှုကို ကြန့်ကြာစေရန် မည်သည့်ကြိုးပမ်းအားထုတ်မှုမျိုးကိုမဆို ဆန့်ကျင်ကန့်ကွက်ပါကြောင်း၊ မြန်မာနိုင်ငံသားများအတွက် ပိုမိုကောင်းမွန် သော ဒီမိုကရက်တစ်လွတ်လပ်မှု၊ အဓွန့်ရှည်တည်တံ့သောငြိမ်းချမ်းမှု နှင့် အားလုံးပါဝင်သော သာယာဝပြောမှုအတွက် ရှေ့ရှုလုပ်ဆောင်နေကြသူအားလုံးကို မိမိတို့ ထောက်ခံပါကြောင်း ဖော်ပြထားသည်။

.

အဆိုပါ ပူးတွဲကြေညာချက်ကို မြန်မာနိုင်ငံအခြေစိုက် သံတမန်အဖွဲ့အစည်းများဖြစ်သော သြစတြေးလျ၊ ကနေဒါ၊ မြန်မာနိုင်ငံဆိုင်ရာဥရောပသမဂ္ဂသံရုံးနှင့် ဥရောပသမဂ္ဂအဖွဲ့ဝင် နိုင်ငံများ၏သံရုံးများ - ဒိန်းမတ်၊ ချက်သမ္မတနိုင်ငံ၊ ဖင်လန်၊ ဆွစ်ဇာလန်၊ ပြင်သစ်၊ ဂျာမနီ၊ အီတလီ၊ နယ်သာလန်၊ စပိန်နှင့် ဆွီဒင် - ဆွစ်ဇာလန်၊ ယူကေ၊ အမေရိကန်၊ နော်ဝေနှင့် နယူးဇီလန်နိုင်ငံ ဆိုင်ရာသံရုံးများမှ ပူးပေါင်းထုတ်ပြန်ခဲ့ခြင်းဖြစ်ကြောင်း သိရသည်။

.

၂၀၂၀ ပြည့်နှစ်၊ နိုဝင်ဘာလ ၈ ရက်က ကျင်းပပြုလုပ်ခဲ့သည့် ပါတီစုံဒီမိုကရေစီအထွေထွေရွေးကောက်ပွဲနှင့် ပတ်သက်၍ မဲမသမာမှုပြုနိုင်သည်ဟုဆိုကာ ဖြေရှင်းပေးရန် တပ်မတော်နှင့် နိုင်ငံရေးပါတီအချို့မှ တောင်းဆိုမှုများ ရှိနေပြီး နေပြည်တော်အပါအဝင် မြန်မာနိုင်ငံတစ်ဝှမ်းရှိ မြို့နယ်အချို့တွင်လည်း ဆန္ဒထုတ်ဖော်မှုများ ရှိနေကြောင်း သိရသည်။

.