ခွန်သန်းအောင်
.
ကလောမြို့နယ်၊ အောင်ပန်းမြို့၊ လွယ်မယ်ကျေးရွာ ဘုန်းတော်ကြီးကျောင်း
စောင်းတန်းအနီးတွင် ယမန်နေ့ ဇန်နဝါရီ လ ၁၃ ရက်၊ ညနေပိုင်းက အမည်မသိ အမျိုးသားအလောင်းတစ်လောင်း
တွေ့ရှိခဲ့ကြောင်း သိရသည်။
.
အောင်ပန်းမြို့၊ ရေချိုကျေးရွာအုပ်စု၊ လွယ်မယ်ကျေးရွာ
ဘုန်းတော်ကြီးကျောင်း စောင်းတန်းအနီး ဇရပ်တွင် အမျိုးသား တစ်ဦး သေဆုံးနေကြောင်း သတင်းအရ
အောင်ပန်းနယ်မြေရဲစခန်းမှူး ရဲအုပ် သိန်းထိုက်ထွန်း ဦးစီးသော အဖွဲ့မှ သက်သေများနှင့်အတူ
သွားရောက်စစ်ဆေးရာ ယင်းဇရပ်တွင် အမည်/နေရပ်လိပ်စာ မသိ အသက် ၅၀ အရွယ်ခန့်ရှိ အမျိုးသားတစ်ဦး
သေဆုံးနေသည်ကို တွေ့ရပြီး ပြင်ပဒဏ်ရာ တစ်စုံတစ်ရာ မတွေ့ရဘဲ အအေးပတ် သေဆုံးသည့် လက္ခဏာ
တွေ့ရှိခဲ့ရကြောင်း သိရသည်။
.
သေဆုံးသူ အမျိုးသားသည် ယခင်ရက်များကတည်းက ယင်းနေရာအနီးတွင်
အရက်ထိုင်သောက်နေသည်ကို အမြဲ မြင်တွေ့ရပြီး ဇန်နဝါရီလ ၁၃ ရက်၊ ညနေပိုင်းတွင် သေဆုံးနေသည်ကို
တွေ့ရသဖြင့် မြင်တွေ့သူမှ ရဲစခန်းသို့ ဖုန်းဆက် အကြောင်းကြားခဲ့ခြင်းဖြစ်ကြောင်း သိရသည်။
.
အဆိုပါ အမည်မသိ အမျိုးသား သေဆုံးမှုနှင့် ပတ်သက်၍
ဓမ္မတာအတိုင်းသေဆုံးခြင်းဟုတ်/မဟုတ် သိရှိနိုင်ရန် အောင်ပန်းနယ်မြေရဲစခန်းတွင် သေမှုသေခင်းအမှတ်စဉ်
(၂/၂၀၂၁) ဖြင့် အမှုဖွင့်စစ်ဆေး ဆောင်ရွက်လျက်ရှိကြောင်း သိရသည်။
.
