ကျောက်မဲမြို့နယ်၊ တော့ဆန်ဘက်တွင် ပစ်ခတ်သံများ ရပ်စဲသွားသော်လည်း စစ်ရေး တင်းမာနေဆဲ ဖြစ်

□ မင်းဇော်မင်း

.

 

ကျောက်မဲမြို့ အနောက်ဘက် မိုင် ၃၀ ခန့်အကွာရှိ တော့ဆန်ကျေးရွာအုပ်စုဘက်တွင် RCSS နှင့် TNLA တို့ ဇန်နဝါရီလ ၃ ရက် ညပိုင်းနှင့် ဇန်နဝါရီလ ၄ ရက် နံနက် ၁၁ နာရီခန့်အထိ တိုက်ပွဲ ဖြစ်ပွားပြီးနောက် ယနေ့ နေ့လယ် ၁၂ နာရီခန့်က စတင်၍ အသံများ ရပ်စဲသွားသော်လည်း စစ်ရေးတင်းမာနေဆဲ ဖြစ်သဖြင့် ရွာသူရွာသားများ အနီးကျေးရွာရှိ ဘုန်းကြီးကျောင်းများတွင် စုရုံးနေကြရကြောင်း သိရသည်။

.

“ ကျွန်တော်တို့က ကြားထဲမှာ ရောက်နေတာ ဖြစ်ပြီး ပိတ်မိနေတာပေါ့၊ ဘုရားကုန်းနဲ့ ရွာထဲ အပြန်အလှန် ပစ်နေကြတာ၊ ရွာသားတွေက ကျည်လမ်းကြောင်းရဲ့ အလယ် တည့်တည့်မှာ ရောက်နေတာ၊ ဘယ်လိုမှ ထွက်လို့ မရဘူး၊ ဝပ်နေကြရတာ၊ ကျည်ဆံတွေက ခေါင်းပေါ်ကနေ ဖြတ်ဖြတ် ပြေးနေကြတာ၊ လက်နက်ကြီးတွေရော။ ဖြစ်နိုင်ရင် ကျွန်တော်တို့ ပိတ်မိနေတာကို အကူအညီ တောင်းပေးစေချင်တယ်။”ဟု တော့ဆန်ကျေးရွာမှ ဒေသခံတစ်ဦးက ပြောသည်။

.

ဇန်နဝါရီလ ၄ ရက်၊ နံနက် ၆ နာရီက နှစ်ဘက် ပစ်ခတ်မှုများ ပြင်းထန်ခဲ့ပြီး စစ်အင်အားများ ဖြည့်တင်းနေကာ ယင်း တိုက်ပွဲများကြောင့် ဒေသခံပြည်သူများ နေအိမ်များအတွင်း ပုန်းခိုနေကြရကြောင်း သိရသည်။

.

ညနေ ၄ နာရီအထိ ရရှိသည့် သတင်းများအရ ကျောက်မဲမြို့ပေါ်သို့ ဆွေမျိုးရှိသူများ ပြေးရှောင်လာမှုများ ရှိနေသော်လည်း စစ်ရှောင်စခန်းများသို့ သတင်းပို့မှု မရှိခြင်းနှင့် တော့ဆန်ရွာမ ဘုန်းကြီးကျောင်းတွင် စစ်ရှောင် ၂၀၀ ခန့် ရှိနေသော်လည်း မြို့ပေါ်သို့ စစ်ရှောင်ရန် လာရောက်ခြင်း ရှိ/မရှိ အခြေအနေ မသိရသည့်အတွက် လိုအပ်သည်များ ကူညီထောက်ပံ့နိုင်ရန်နှင့် သွားရောက် ခေါ်ယူနိုင်ရေး အသင့်ပြင် စောင့်ကြည့်နေသည်ဟု ကျောက်မဲမြို့ စစ်ရှောင်ကူညီထောက်ပံ့ရေးကော်မတီ ဥက္ကဌ ဦးတင်မောင်သိန်းထံမှ သိရသည်။

.

“ သူတို့က ၂ ခါလောက် စစ်ရှောင်ဖူးတော့ အတွေ့အကြုံအရ သူတို့တွေ ထွက်လာခွင့် မရတာလား၊ အခြေအနေ မပေးတာလားတော့ မသိဘူး၊ ဒီမှာတော့ သတင်း နားထောင်ရင်း အားလုံး ပြင်ဆင်ထားတယ်။”ဟု ဦးတင်မောင်သိန်းက ပြောသည်။

.

ထို့အတူ စစ်ရှောင်ကူညီရေးကော်မတီဝင် တစ်ဦးဖြစ်သည့် ဦးသားဇော်ကလည်း တော့ဆန်မှ အနောက်ဘက် ၁၅ မိုင်ခန့် ဝေးသည့် မင်းကုန်းဘက်ကပင် လက်နက်ကြီးသံများ တစ်ညနှင့် တစ်နေ့လုံး ကြားနေခဲ့ရပြီးနောက် ယနေ့ မွန်းလွဲပိုင်းတွင် ညောင်မောင်းဘက်၌ တိုက်ပွဲသံများ ကြားရကြောင်း ပြောသည်။

.

အဆိုပါ တိုက်ပွဲ ဖြစ်ပွားမှု အခြေအနေများနှင့် ပတ်သက်၍ RCSS နှင့် TNLA တို့၏ ဆက်ဆံရေးရုံးများသို့ ဆက်သွယ် မေးမြန်းသော်လည်း ဆက်သွယ်၍ မရခဲ့ချေ။

.

ကျောက်မဲမြို့နယ်အတွင်း၌ ပြီးခဲ့သည့် ၂၀၂၀ ပြည့်နှစ်၊ ဒီဇင်ဘာလအတွင်း RCSS နှင့် TNLA တို့ တိုက်ပွဲဖြစ်ပွားမှု ၁၁ ကြိမ်နှင့် ၂၀၂၁ ခုနှစ် ဇန်နဝါရီ ၁ ရက်မှ  ၄ ရက်အထိ ၉ ကြိမ်၊ စုစုပေါင်း အကြိမ် ၂၀ ကျော် ဖြစ်ပွားခဲ့ကြောင်း နှစ်ဘက် အဖွဲ့များ၏ သတင်း ထုတ်ပြန်ချက်အရ သိရသည်။

.