သစ်ပင်တွေကို ရှင်သန်ခွင့်ပေးလိုက်ပါ ကိုငြိမ်းမောင် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, January 9, 2021

သစ်ပင်တွေကို ရှင်သန်ခွင့်ပေးလိုက်ပါ ကိုငြိမ်းမောင်

အောင်ဆန်းဝင်း

.

သင်္ကြန်ကာလရောက်တိုင်း မြန်မာရုပ်သံလိုင်းတွေကနေ သင်္ကြန်မိုးရုပ်ရှင်ဇာတ်ကားကို ထုတ်လွှင့်တတ်ကြတယ်။ မြန်မာ့ရိုးရာ အတာသင်္ကြန်နဲ့ သင်္ကြန်မိုးရုပ်ရှင်က ခွဲခြားလို့မရတဲ့ အရာတစ်ခုပေါ့။ ဒီဂန္ထဝင်မြောက်ဇာတ်ကားထဲမှာ သရုပ်ဆောင် ဒေါ်ခင်သန်းနုက ဦးနေအောင်ကိုပြောတဲ့စကားတစ်ခွန်းကို သင်္ကြန်မိုးဇာတ်ကားကြည့်ဖူးသူတိုင်း မှတ်မိကြမယ်ထင်ပါတယ်။ ကလေးတွေကိုပျော်ခွင့်ပေးလိုက်ပါ ကိုငြိမ်းမောင်ရယ်တဲ့။

.

.

မြို့တော် တောင်ကြီးက ပင်လယ်ရေမျက်နှာပြင်ထက် အမြင့်ပေ ၅၀၀၀ နီးပါးမှာတည်ရှိတယ်။ တောင်ကြီးမြို့လို့ ဆိုတဲ့အတိုင်း မြို့အရှေ့ဘက်မှာ မြင့်မားတဲ့တောင်တန်းကြီးတစ်ခုက တောင်နဲ့မြောက်သွယ်တန်းနေတယ်။ တောင်ကြီးမြို့ဟာနေ့စဉ်နဲ့အမျှ ပြောင်းလဲခြင်းတွေပြည့်နှက်နေခဲ့တယ်။

.

အဓိကပြောင်းလဲခြင်းတွေကို မြင်တွေ့နေရတာက ထိုးထိုးထောင် မတ်တပ်ထလာတဲ့ တိုက်အိမ်တွေ၊ တိုက်ခန်းတွဲတွေ၊ အထပ်မြင့်အဆောက်အဦတွေ။ မြို့တော်ရဲ့လိုအပ်ချက်ကြောင့်လား၊ ပြောင်းလဲနေတဲ့ခေတ်စနစ်တွေကြောင့်လား တော့ မပြောတတ်ဘူး။ နေ့စဉ်နဲ့အမျှနေရာတိုင်းမှာ မြင့်တက်နေတဲ့အဆောက်အဦတွေ။

.

နောက်ထပ်ပြောင်းလဲနေတဲ့အရာတစ်ခုက မြို့တော်တောင်ကြီးရဲ့ လမ်းမတွေပါ။ တကယ်အဆင့်မြင့်လာတဲ့လမ်းတချို့ တွေ့ရတယ်။ မြှင့်သလိုလို လုပ်နေတဲ့လမ်းတွေလည်းရှိတယ်။ လုပ်နေရင်းနဲ့ လုပ်ထားမှန်းမသိအောင် ဖြစ်တဲ့လမ်းတွေလည်း ရှိနေပြန်ပါရော။

.

လမ်းတွေခင်းတာ အဆင့်မြှင့်တင်တာတွေက မြို့တော်တောင်ကြီးအတွက် ကောင်းတဲ့အရာတစ်ခု။ လမ်းတွေကောင်းမှ လူသွားတဲ့လမ်းတွေနဲ့တူတော့မပေါ့။ ခက်တာက လမ်းတွေခင်းတိုင်း သစ်ပင်တွေ၊ သစ်ပင်ကြီးတွေ စတေးခံနေကြရတာ။ မြို့တော်တောင်ကြီးဟာ တောင်ပေါ်မြို့ဖြစ်တဲ့အတွက် မြေအောက်ရေကို အဓိကမှီခိုအားထားနေရတယ်။

.

မြေအောက်ရေကိုထိန်းသိမ်းဖို့အတွက် သဘာဝပတ်ဝန်းကျင်ကောင်းမွန်ဖို့ လိုအပ်ပါတယ်။ အဓိကအရေးကြီးဆုံး အချက်က မြို့တော်ပတ်ဝန်းကျင်နဲ့ မြို့တွင်းက သစ်ပင်သစ်တောတွေ ထိန်းသိမ်းဖို့လိုအပ်နေတယ်။ လတ်တလော အွန်လိုင်းအသုံးပြုချိန်တိုင်း မြို့တွင်းက သစ်ပင်တွေခုတ်ထွင်ခံနေရတဲ့သတင်း နေ့တိုင်းလိုဖတ်နေရပါတယ်။

.

ခုတ်ထွင်ရတဲ့အဓိက အကြောင်းရင်းကလည်း လမ်းခင်းတာ လမ်းချဲ့တာနဲ့ မလွတ်ကင်းလို့ဆိုတဲ့ အကြောင်းပြချက် များနေပါတယ်။ ဒီရက်ပိုင်း သတိထားမိတဲ့အွန်လိုင်းပိုစ့်တစ်ခုမှာ ရေထွက်ဦးလမ်းထဲက သစ်ပင်ကြီးငယ်တွေ ခုတ်ထွင်ရှင်းလင်းခံရတော့မယ်ဆိုတဲ့ အကြောင်းပါ။

.

ဒီတစ်နှစ်မြို့တော်တောင်ကြီးရဲ့ဆောင်းက ဆောင်းမပီသပါဘူး။ မည်ကာမတ္တဆောင်း အဆင့်ပဲရှိပါတယ်။ အေးစက်ခြင်းတွေ ပျောက်ဆုံးနေတယ်။ ဂျာကင်ထူထူတွေ ဗီဒိုထဲတူတူပုန်းနေရတုန်း။ ပီသတဲ့ဆောင်းလက္ခဏာတွေ ဘာကြောင့်ပျောက်ဆုံးသွားတာလဲ။ အဖြေက ရှင်းရှင်းလေးပါ။

.

မြို့တော်တောင်ကြီးဟာ မြို့ရဲ့အငွေ့အသက်တွေကြွယ်ဝလာတယ်။ အိုးအိမ်တိုက်တာကြီးတွေ ထိုးထိုးထောင်ထ လာတယ်။ မြိုနဲ့တူတဲ့လမ်းတွေဖော်ဆောင်လာတယ်။ နောက်ကွယ်မှာတော့ မြို့အတွက်အသက်တမျှ အရေးကြီးတဲ့ သစ်ပင်ကြီးငယ်တွေကတော့ အတုံးအရုံး။

.

မြေအောက်ရေကို မှီခိုအားထားနေရတဲ့မြို့အတွက် သစ်ပင်သစ်တောတွေက အရေးကြီးတဲ့ အသက်တစ်ချောင်း။ ဒီအသက်တွေကို ရှင်သန်ခွင့်မပြုရင် မြို့တော်တောင်ကြီးရဲ့အသက်က ခန့်မှန်းရခက်သွားနိုင်တယ်။

.

အခုဆောင်းကာလပဲရှိပါသေးတယ်။ နွေဦးရောက်ဖို့ နေ့ရက်နာရီတွေ ခရီးဆက်ရဦးမယ်။ ဒါပေမဲ့ မြို့တွင်းမှာရှိတဲ့ မြကန်သာရေကန်၊ ဂနိုင်ကန်တွေကတော့ အားလုံးမျက်တွင်းဟောက်ပက်တွေနဲ့။ ဒီပုံစံအတိုင်းဆက်သွားရင် မကြာခင် လာမယ့် နှစ်အပိုင်းအခြားအတွင်း မြို့တော်တောင်ကြီး ရေဒုက္ခနဲ့ရင်ဆိုင်သွားရနိုင်တယ်။

.

တောင်ပေါ်မြို့တစ်ခုရဲ့ရေအရင်းအမြစ်က မြေအောက်ရေပါ။ မြေအောက်ရေတွေရှင်သန်နေဖို့ သစ်ပင်သစ်တောတွေ အရေးတကြီးလိုအပ်တယ်။ ရှိပြီးသားအပင်တွေကို ထိန်းသိမ်းရမယ်။ စိုက်ပျိုးသမျှကိုရှင်သန်အောင်ပြုစုရမယ်။ မြို့တော်တောင်ကြီးရေဒုက္ခကင်းဝေးစေဖို့ သစ်ပင်တွေကိုရှင်သန်ခွင့်ပေးလိုက်ပါ ကိုငြိမ်းမောင်လို့ အကြံပြုလိုက်ရ ပါကြောင်း။

.

No comments:

Post a Comment

Journal Download

Photo of three cats