မိုင်းထွန်း
.
ကျောက်မဲမြို့တွင် ဇန်နဝါရီလ ၁ ရက်၊ ညပိုင်းက နေအိမ် အိပ်ခန်းအတွင်း မီးလောင် ကျွမ်းမှုကြောင့် အသက် ၇၀ နှစ်အရွယ် အမျိုးသားတစ်ဦး သေဆုံးခဲ့ကြောင်း သိရသည်။
.
ကျောက်မဲမြို့၊ အမှတ်(၇) ရပ်ကွက်၊ နယ်မြေ (၁)ရှိ ဦးသန်းဝင်း၏ နေအိမ်တွင် ယမန်နေ့ည ၉ နာရီခွဲ ကျော်ခန့်က မီးလောင်မှု ဖြစ်ပွားနေကြောင်း သတင်းအရ မီးသတ်ဦးစီးဌာနက သွားရောက် မီးငြိမ်းသတ်ပေးခဲ့ခြင်း ဖြစ်ပြီး အဆိုပါနေအိမ် အိပ်ခန်းအတွင်းရှိ မွေ့ယာများ မီးလောင်ကျွမ်းကာ ဦးသန်းဝင်းမှာ ကုတင်ဘေးတွင် ကျောကုန်း မီးလောင်ဒဏ်ရာဖြင့် သေဆုံးနေသည်ကို တွေ့ရှိရကြောင်း သိရသည်။
.
အဆိုပါ မီးလောင်မှုသည် မွေ့ယာပေါ်၌ ပန်းကန်ပြား ခံ၍ ခြင်ဆေးခွေ ထွန်းပြီး အိပ်ပျော်ရာမှ ခြင်ဆေးခွေက မွေ့ရာပေါ်သို့ ကျပြီး မီးစတင် လောင်ကျွမ်းခြင်း ဖြစ်ပွားခဲ့သည်ဟု တာဝန်ရှိသူများက သုံးသပ်ထားကြောင်း သိရသည်။
.
ယင်းမီးလောင်မှုကြောင့် ကာလတန်ဖိုးငွေ ကျပ် ၁၆၅၀၀၀ ခန့် ပျက်ဆီး ဆုံးရှုံး၍ ဦးသန်းဝင်း ( ၇၀ နှစ်) သေဆုံးခဲ့ရကာကျောက်မဲမြို့မရဲစခန်းတွင် (ပ) ၂/ ၂၀၂၀၊ ပုဒ်မ-၂၈၅/ ၃၀၄ (က) ဖြင့် အမှုဖွင့် ဆောင်ရွက်ထားသည်ဟု သိရသည်။
.
ဓါတ်ပုံ- တောင်ပေါ်သားလေး
