.
ရှမ်းပြည်နယ် လူမှုရေးဝန်ကြီး ဒေါက်တာ မျိုးထွန်းသည် ၎င်း၏ တာဝန်များကို ပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဒေါက်တာ ညီညီအောင် ထံသို့ ယာယီ လွှဲပြောင်းထားကြောင်း သိရသည်။
.
လာမည့် ရက်ပိုင်းအတွင်း ပြုလုပ်မည့် တတိယအကြိမ် ပြည်သူ့လွှတ်တော် ပထမပုံမှန် အစည်းအဝေး တက်ရောက်ရမည် ဖြစ်သည့် အတွက် ဒေါက်တာ မျိုးထွန်း အနေဖြင့် ၎င်း၏ တာဝန်များကို ဒေါက်တာ ညီညီအောင်ထံသို့ ယာယီ လွှဲပြောင်းခဲ့ခြင်း ဖြစ်သည်။
.
“ လောလောဆယ်မှာ သယံဇာတ ဝန်ကြီးကို တာဝန်လွှဲသွားတယ်၊ လွှတ်တော် (တတိယအကြိမ် ပြည်သူ့လွှတ်တော်) ပထမပုံမှန် အစည်းအဝေး တက်ပြီးတာနဲ့ ပြန်လာပြီးတော့ လူမှုရေးဝန်ကြီးတာဝန်ကို ထမ်းဆောင်ဦးမှာပါ၊ ယာယီ လွှဲထားတာပေါ့။ ” ဟု ရှမ်းပြည်နယ်အစိုးရအဖွဲ့ အတွင်းရေးမှူး ဦးနေလင်းက ပြောသည်။
.
ဒေါက်တာ မျိုးထွန်းသည် ပြီးခဲ့သည့် ၂၀၂၀ ရွေးကောက်ပွဲတွင် ကွမ်းလုံမြို့နယ် ပြည်သူ့လွှတ်တော် ကိုယ်စားလှယ်(ပြည်ခိုင်ဖြိုးပါတီ ကိုယ်စားပြု) အဖြစ် အနိုင်ရရှိသူ ဖြစ်ပြီး ယခင် ၂၀၁၀ နှင့် ၂၀၁၅ ရွေးကောက်ပွဲများတွင် ကွမ်းလုံမြို့နယ် မဲဆန္ဒနယ်အမှတ်(၁)မှ ရှမ်းပြည်နယ်လွှတ်တော် ကိုယ်စားလှယ်အဖြစ် ရွေးကောက်တင်မြှောက် ခံရကာ ပြည်နယ် လူမှုရေးဝန်ကြီး အဖြစ် အစိုးရသက်တမ်း ၂ ကြိမ်ဆက် တာဝန် ထမ်းဆောင်နေသူ ဖြစ်သည်။
