တောင်ကြီး မြို့မဈေးအား လတ်တလောတွင် ပြန်လည်ဖွင့်လှစ်ရန် မရှိသေး

ကမ္ဘောဇတိုင်း

.

တောင်ကြီးမြို့မဈေး ပြန်လည်ဖွင့်လှစ်ခွင့် ရရှိနိုင်ရေးအတွက် မြို့နယ် COVID-19 ရောဂါ ကာကွယ်၊ ထိန်းချုပ်၊ ကုသရေး ကော်မတီသို့ တင်ပြသွားမည်ဖြစ်ပြီး လတ်တလောတွင် ပြန်လည်ဖွင့်လှစ်ရန် မရှိသေးကြောင်း တောင်ကြီး မြို့နယ် စည်ပင်သာယာရေးဌာနမှ သိရသည်။

.

.

“လောလောဆယ်တော့ ဖွင့်ဖို့ မရှိသေးပါဘူး။ အဆင့်ဆင့် တင်ပြရဦးမှာပါ။ မြို့နယ် COVID-19 ကော်မတီကနေ ခွင့်ပြုချက် ယူပြီး သင့်တော်တယ် ဆိုရင်တော့ ဖွင့်ရမှာပေါ့။ တင်ပြဖို့တော့ လုပ်နေပါတယ်” ဟု တောင်ကြီးမြို့နယ် စည်ပင်သာယာရေးဌာနမှ အမှုဆောင်အရာရှိ ဦးနေလင်းက ကမ္ဘောဇတိုင်းသို့ ပြောသည်။

.

ပြီးခဲ့သည့် နိုဝင်ဘာလ ၃၀ ရက်က တောင်ကြီးမြို့မဈေးအတွင်း COVID-19 ရောဂါ ပိုးတွေ့လူနာ တွေ့ရှိခဲ့သည့်အတွက် ဈေးကို ယာယီပိတ်ထားခြင်းဖြစ်သည်။

.

ထို့အတူ တောင်ကြီးမြို့နယ်စည်ပင်သာယာရေးဌာနမှ မြို့မဈေးတာဝန်ခံ ဦးခင်အေး ကလည်း “၁၅ ရက်နေ့ ပြန်ဖွင့်ဖို့ စာတော့ တင်ထားပါတယ်။ ပြန်မကျလာသေးပါဘူး” ဟု ပြောဆိုခဲ့သည်။

.

တောင်ကြီးမြို့မဈေး အတွင်း၌ ဈေးရုံပေါင်း ၁၉ ရုံ၊ ဆိုင်ခန်းပေါင်း ၁၈၆၈ ခန်း ရှိပြီး မြို့မဈေးသည် မြို့တော် တောင်ကြီး၏ အထင်ကရ နေရာ တစ်ခု ဖြစ်ကာ တောင်ကြီးမြို့တွင် မြို့မဈေး အပြင် အမှတ်(၅) ဈေး ၊ စဝ်စံထွန်းဈေး၊ ရဲဘော်ဈေးတို့ တည်ရှိကြောင်း သိရသည်။

.

ရှမ်းပြည်နယ်အတွင်း ယမန်နေ့ ဒီဇင်ဘာလ ၁၃ ရက်အထိ COVID-19 ရောဂါ ပိုးတွေ့လူနာ ၆၉၁ ဦး ရှိပြီး ၄၀၇ ဦးမှာ ဆေးရုံဆင်းခွင့်ရပြီဖြစ်ကာ သေဆုံးသူ ၃ ဦး ရှိကြောင်း သိရသည်။

.