လဲချားမြို့နယ်ရှိ ကျေးရွာ ၂ ရွာတွင် ဆိုလာစနစ်ဖြင့် မီးလင်းရေးလုပ်ငန်းများ ဆောင်ရွက်လျှက်ရှိ

ငြိမ်းသူ

.

လဲချားမြို့နယ် အတွင်းရှိ ကုန်းကတ်ကျေးရွာနှင့် ဝမ်ကတ်ကျေးရွာ ၂ ရွာတွင် တစ်အိမ်သုံး ဆိုလာစနစ်ဖြင့် မီးလင်းရေး လုပ်ငန်းများ ဆောင်ရွက်လျှက်ရှိကြောင်း လဲချားမြို့နယ်ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ သိရသည်။

.

ယင်းကဲ့သို့ တစ်အိမ်သုံး ဆိုလာစနစ် မီးလင်းရေး လုပ်ငန်းကို ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၊ ဂျာမန်ဖွံ့ဖြိုးရေးဘဏ်(KfW) နှင့် ကျေးရွာပြည်သူများ၏ ပူးပေါင်း ထည့်ဝင်ငွေများဖြင့် ဆောင်ရွက်ခြင်း ဖြစ်သည်။

.

ကုန်းကတ်ကျေးရွာအတွက် ဝပ် ၆၀ ဆိုလာ ၉ လုံး၊ ဝပ် ၁၀၀ ဆိုလာ ၁၇ လုံး၊ လမ်းမီးတိုင် ၃ တိုင်နှင့် ဝမ်ကတ်ကျေးရွာအတွက် ဝပ် ၆၀ ဆိုလာ၂၀ လုံး၊ ဝပ် ၁၀၀ ဆိုလာ ၃၉ လုံး၊ ဘုန်းတော်ကြီးကျောင်းအတွက် ၁၉၀ ဝပ် တစ်လုံး၊ ကျေးရွာမူလတန်းကျောင်းအတွက် ၁၉၀ ဝပ် တစ်လုံး၊ လမ်းမီးတိုင် ၉ တိုင်တို့အား တပ်ဆင် ဆောင်ရွက်ပေးထားပြီ ဖြစ်ကြောင်း သိရသည်။

.

အဆိုပါ တစ်အိမ်သုံး ဆိုလာများကို ဒေသခံပြည်သူများက မိမိပိုင် ပစ္စည်းကဲ့သို့ စနစ်တကျ ကိုင်တွယ်အသုံးပြုစေရန် ရည်ရွယ်၍ ဝပ် ၆၀ ဆိုလာစနစ်အတွက် ငွေကျပ် ၅၀၀၀၀ နှင့်ဝပ် ၁၀၀ ဆိုလာစနစ်အတွက် ငွေကျပ် ၁၅၀၀၀၀ ပြသူ့အချိုးကျ အရစ်ကျစနစ်ဖြင့် ၂ ကြိမ် ခွဲ၍ ထည့်ဝင်ရမည် ဖြစ်ပြီး ဆိုလာစနစ် တစ်စုံစာအတွက် ကျန်ရှိသည့် တန်ဖိုးကို စီမံကိန်း ရန်ပုံငွေမှ ကျခံပေးမည် ဖြစ်ကြောင်း သိရသည်။

.

ထို့အပြင် ယင်းကျေးရွာများရှိ အများပြည်သူပိုင် အဆောက်အဦများ ဖြစ်သည့် စာသင်ကျောင်း၊ ဆေးပေးခန်း၊ ဘာသာရေးကျောင်းနှင့် လမ်းမီးတိုင်များကို စီမံကိန်း ရန်ပုံငွေမှ အခမဲ့ ထောက်ပံ့ပေးခြင်း ဖြစ်ကြောင်း လဲချားမြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်နန်းစန္ဒာဝင်းထံမှ သိရသည်။