ဗဟို ရှမ်းစာပေနှင့် ယဉ်ကျေးမှုအသင်းမှ မြို့နယ် ရှမ်းစာ/ယဉ်များသို့ နှစ်သစ်ကူး နှုတ်ခွန်းဆက်စကား ပေးပို့ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ဗဟို ရှမ်းစာပေနှင့် ယဉ်ကျေးမှုအသင်းမှ မြို့နယ် ရှမ်းစာ/ယဉ်များသို့ နှစ်သစ်ကူး နှုတ်ခွန်းဆက်စကား ပေးပို့

ကိုစိုး (ကမ္ဘောဇတိုင်း)

.

၂၀၂၀ ပြည့်နှစ်၊ ဒီဇင်ဘာလ ၁၅ ရက်တွင် ကျရောက်မည့် ၂၁၁၅ ခုနှစ် ရှမ်းတိုင်းရင်းသားများ၏ နှစ်သစ်ကူးပွဲတော် အတွက် ဗဟိုရှမ်းစာပေနှင့် ယဉ်ကျေးမှုအသင်းမှ မြို့နယ် ရှမ်းစာပေနှင့် ယဉ်ကျေးမှုအသင်းများသို့ နှုတ်ခွန်းဆက်စကား ပေးပို့ခဲ့သည်ဟု သိရသည်။

.

.

“မြန်မာနိုင်ငံတစ်ဝှမ်းလုံးမှာ ရှိတဲ့ ရှမ်းတိုင်းရင်းသားတွေ နေထိုင်တဲ့မြို့တွေမှာ COVID-19 ရောဂါကြောင့် နှစ်စဉ် ကျင်းပတဲ့ ရှမ်းနှစ်သစ်ကူးပွဲတော်ကို မကျင်းပနိုင်ကြဘူး။ သက်ကြီးပူဇော်ပွဲတို့၊ သံဃာတော်တွေကို ဆွမ်းကပ်တာတို့၊ ကောက်သစ်စားပွဲတို့ မလုပ်နိုင်ဘူး။ အဲဒါကြောင့် မြို့နယ်အသီးသီးက ရှမ်းစာပေနဲ့ ယဉ်ကျေးမှုအသင်းတွေကို ကျွန်တော်တို့ ဗဟို ရှမ်းစာပေနဲ့ ယဉ်ကျေးမှုအသင်းက နှုတ်ခွန်းဆက်စကား ပေးပို့တာ ဖြစ်ပါတယ်” ဟု ရှမ်းစာပေနှင့် ယဉ်ကျေးမှုအသင်း (ဗဟို) မှ စိုင်းခင်မောင်စိန်က ကမ္ဘောဇတိုင်းသို့ ပြောသည်။

.

အဆိုပါ နှုတ်ခွန်းဆက်စကားတွင် ရှမ်းသက္ကရာဇ် ၂၁၁၅ ခုနှစ် နတ်တော်လဆန်း ၁ ရက် ရှမ်းနှစ်သစ်နေ့ရက်မှ စ၍ ကမ္ဘာနှင့် အဝှမ်းခံစားနေရသော COVID-19 ကပ်ဘေးမှ ရှ၎်းတိုင်းရင်းသားအားလုံး ကျော်လွန်လွတ်မြောက်ပြီး ကျန်းမာ ချမ်းသာစွာဖြင့် မိမိတို့၏ မိသားစုမှစ၍ ရှမ်းလူမျိုးနွယ် ရှမ်းတိုင်းရင်းသားအားလုံးအတွက် ဘာသာ၊ ဆွေမျိုး၊ ပတ်ဝန်းကျင်၊ သာသနာနှင့် စာပေယဉ်ကျေးမှုများကို ယခုထက်ပိုမို ထိန်းသိမ်းစောင့်ရှောက်ပြီး စွမ်းစွမ်းတမံ ဆောင်ရွက် နိုင်ပါစေကြောင်းဖြင့် ဖော်ပြပါရှိသည်။

.

“ကျွန်တော်တို့ အားလုံး ရည်ရွယ်နေတဲ့ စစ်မှန်တဲ့ ဖက်ဒရယ်ပြည်ထောင်စုကို တည်ထောင်နိုင်အောင် လာမယ့် ရှမ်း နှစ်သစ်ကနေ စပြီးတော့ ဝိုင်းဝန်းကြိုးစားဆောင်ရွက်သွားကြပါစို့လို့ တခြားသော တိုင်းရင်းသားတွေကိုလည်း တိုက်တွန်း နှိုးဆော်ပါတယ်” ဟု စိုင်းခင်မောင်စိန်က ဆက်လက်ပြောဆိုခဲ့သည်။

.

ရှမ်းသက္ကရာဇ် ရေတွက်ပုံမှာ နန်ချိုပြည်သို့ ဗုဒ္ဓမြတ်စွာဘုရားရှင်၏ ပိဋကတ်သုံးပုံ ရောက်ရှိသည့် သာသနာနှစ် ၄၅၀၊ နတ်တော်လဆန်း ၁ ရက်နေ့မှ စတင်ရေတွက်သည်ဟု သိရှိရပြီး ယခု ခရစ်နှစ် ၂၀၂၀ ပြည့်နှစ် (မြန်မာသက္ကရာဇ် ၁၃၈၂ ခုနှစ်) ရှမ်းသက္ကရာဇ် ၂၁၁၄ ခုမှ ၂၁၁၅ ခုနှစ်သို့ ကူးပြောင်းသည့် နှစ်သစ်ကူးပွဲတော်ကို ဒီဇင်ဘာလ ၁၄ ရက် တန်ဆောင်မုန်း လကွယ်ညဉ့် ၁၂ နာရီကျော်၍ နတ်တော်လဆန်း ၁ ရက်သို့ ကူးပြောင်းချိန်၌ သတ်မှတ်ကျင်းပခြင်း ဖြစ်ကြောင်း သိရသည်။

.


Journal Download

Photo of three cats