ပင်လောင်းမြို့နယ်တွင် ဆောင်းသီးနှံကြက်သွန်ဖြူစိုက်ခင်းများ အောင်မြင်

ခွန်အောင် (နောင်တရား)

.

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ပေါ့အင်ကျေးရွာအုပ်စု၊ ဘုရားဖြူကျေးရွာတွင် စိုက်ပျိုးထား သည့် ဆောင်းသီးနှံ ကြက်သွန်ဖြူများ ဖြစ်ထွန်းအောင်မြင်လျက်ရှိကြောင်း သိရသည်။

.

.

“ကြက်သွန်ဖြူစိုက်ခင်းကတော့ ကောင်းနေပြီ။ အခုကြက်သွန်ဈေးက ၈၀၀ နဲ့ ၁၀၀၀ ကြားမှာရှိတယ်။ ဒီနှစ် ဘာပဲ စိုက်စိုက် ဈေးကောင်းသိပ်မရဘူး။ ကြက်သွန်ဖြူကို အစို ၁၅၀၀ နဲ့ ရောင်းရမှ အမြတ်ကျန်တယ်။ အခြောက် ဆိုရင်တော့ ၂၀၀၀ ကျော်မှ အမြတ်ကျန်တယ်” ဟု ဘုရားဖြူကျေးရွာမှ ကြက်သွန်ဖြူစိုက်တောင်သူ ဒေါ်ဒုတ်ချောက ပြောသည်။

.

ကြက်သွန်ဖြူသည် ဆောင်းသီးနှံဖြစ်သော်လည်း ရေသွင်း စိုက်ပျိုးရခြင်းကြောင့် ကုန်ကျစရိတ်ကြီးမားကာ တစ်ဧက လျှင် စိုက်ပျိုးစရိတ် ကျပ်သိန်း ၃၀ ခန့် ကုန်ကျကြောင်း သိရသည်။

.

ပင်လောင်းမြို့နယ်အတွင်း ကြက်သွန်ဖြူကို ဘီးလူးချောင်းအနီးတစ်ဝိုက်တွင် စိုက်ပျိုးကြပြီး အချို့တောင်သူများက အဝီစိတွင်းများတူး၍ စိုက်ပျိုးကြကြောင်းသိရသည်။

.

ပင်လောင်းမြို့နယ်မှ တောင်သူများအနေဖြင့် အာလူး၊ ဂေါ်ဖီထုပ်၊ ဂေါ်ဖီပန်း၊ ဂျင်း၊ အစေ့ထုတ်ပြောင်း၊ ဥယျာဉ်ခြံ များကို စိုက်ပျိုးကြပြီး ဆောင်းသီးနှံအဖြစ် ကြက်သွန်ဖြူကို အများအပြား စိုက်ပျိုးကြခြင်းဖြစ်ကြောင်း သိရသည်။

.