နမ္မတူမြို့နယ်၊ နမ့်ပိုင်ကျေးရွာအနီး ဖြစ်ပွားသည့် တိုက်ပွဲကြောင့် ပြည်သူ ၄ ဦး ထိခိုက်ဒဏ်ရာရ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, December 11, 2020

နမ္မတူမြို့နယ်၊ နမ့်ပိုင်ကျေးရွာအနီး ဖြစ်ပွားသည့် တိုက်ပွဲကြောင့် ပြည်သူ ၄ ဦး ထိခိုက်ဒဏ်ရာရ

မင်းဇော်မင်း

.

နမ္မတူမြို့နယ်၊ နမ့်ပိုင်ကျေးရွာအနီးတွင် ဒီဇင်ဘာလ ၁၀ ရက်၊ ညနေပိုင်းက ဖြစ်ပွားခဲ့သည့် RCSS နှင့် TNLASSPP ပူးပေါင်းအဖွဲ့များ၏ တိုက်ပွဲကြောင့် ဒေသခံပြည်သူ ၄ ဦး ထိခိုက်ဒဏ်ရာရရှိခဲ့သည်ဟု သိရသည်။

.

.

“တိုက်ပွဲက ညနေပိုင်းဖြစ်တာပါ။ ဟိုဘက်ဒီဘက် တောင်ကုန်းကနေ လက်နက်ကြီးပစ်တော့ ရွာထဲကျပြီး အမျိုးသား ၁ ဦးနဲ့ အမျိုးသမီး ၃ ဦး အစတွေ မှန်တာပါ။ မစိုးရိမ်ရပါဘူး။ မေတ္တာရှင်လူမှုကူညီရေးအသင်းက လူနာတွေ လာသယ်တာ ည ၈ နာရီလောက်မှ ရောက်ပါတယ်။ ဒီနေ့မနက်တော့ လူနာအားလုံး အခြေအနေ ကောင်းပါတယ်” ဟု နမ္မတူမြို့နယ် ကြက်ခြေနီသူနာပြုတပ်ဖွဲ့မှ တပ်ရင်းမှူး ဦးဝင်းကိုက ကမ္ဘောဇတိုင်းသို့ ပြောသည်။

.

အဆိုပါ ထိခိုက်ဒဏ်ရာရ လူနာများအား ICRC မှ ထောက်ပံ့သည့် အမျိုးသမီး တစ်ကိုယ်ရေသုံး Kit များကို နမ္မတူ မြို့နယ် ကြက်ခြေနီတပ်ဖွဲ့မှ သွားရောက်ထောက်ပံ့ခဲ့ပြီး ဌာနဆိုင်ရာနှင့် လူမှုအဖွဲ့အစည်းများကလည်း လာရောက် ကြည့်ရှုအားပေး ထောက်ပံ့လျက်ရှိကြောင်း သိရသည်။

.

လက်နက်ကြီးကျည် ကျရောက်မှုကြောင့် နမ့်ပိုင်ကျေးရွာမှ တစ်အိမ်တည်းနေ ဒေါ်အေးနန်းတွင် ဝဲပုခုံးနှင့် ယာဘက်ခါး၊ ကိုယ်ဝန် ၃ လ ရှိသူ နန်းအေးမွန်တွင် ဝဲပခုံး၊ မောင်အောင်လတွင် ယာဘက်ခြေသလုံး၊ ယာပေါင်တို့၌ ဒဏ်ရာများ အသီးသီးရရှိခဲ့ပြီး အခြားအိမ်တွင်နေထိုင်သူ ဒေါ်အေးနုတွင် ယာနားရွက်နောက်ဘက်တွင် ထိမှန်ဒဏ်ရာရရှိခဲ့ကြောင်း သိရသည်။

.

တိုက်ပွဲမှာ ဒီဇင်ဘာလ ၁၀ ရက်၊ ညနေ ၄ နာရီခွဲကဖြစ်ပွားခဲ့ခြင်းဖြစ်ပြီး လူနာများကို ည ၇ နာရီခန့်တွင် မြန်မာနိုင်ငံ လူမှုကယ်ဆယ်ရေးအဖွဲ့(နမ္မတူ)နှင့် မေတ္တာရှင်နာရေးကူညီမှုအသင်းမှ သွားရောက်ခေါ်ဆောင်ခဲ့ရာ ည ၇ နာရီ ၅၀ မိနစ်တွင် ဆေးရုံသို့ရောက်ရှိပြီး ဆေးကုသမှုခံယူနေကြကြောင်းသိရှိ ရပါသည်။

.

TNLA နှင့် SSPP ပူးပေါင်းအဖွဲ့နှင့် RCSS တို့သည် ဒီဇင်ဘာ ၉ ရက် နံနက်ပိုင်းတွင် နမ္မတူမြို့၊ နားကျဲကျေးရွာအနီးတွင် တိုက်ပွဲ ၂ ကြိမ်ဖြစ်ပွားခဲ့ပြီးနောက် ဒီဇင်ဘာ ၁၀ ရက် ၊ ညနေပိုင်းတွင်နမ့် ပိုင်ကျေးရွာအနီး၌ တိုက်ပွဲများ ဆက်လက်ဖြစ်ပွားခဲ့ခြင်း ဖြစ်ကြောင်း သိရသည်။

.

တိုက်ပွဲဖြစ်ပွားသည့် နမ့်ပိုင်ကျေးရွာသည် နမ္မတူမြို့အရှေ့ဘက် မိုင် ၃၀ ကျော်အကွာတွင်တည်ရှိပြီး ယင်းကျေးရွာမှ အနောက်ဘက် ၁၈ မိုင်ခန့်အကွာရှိ မန်စံကျေးရွာဘုန်းကြီးကျောင်းတွင် တိုက်ပွဲရှောင်ပြည်သူ ၂၀၀ ကျော် တိုက်ပွဲရှောင် ခိုလှုံနေဆဲဖြစ်ကြောင်း သိရသည်။

.


No comments:

Post a Comment

Journal Download

Photo of three cats