နမ္မတူမြို့နယ်၊ မန်စံကျေးရွာ ဘုန်းတော်ကြီးကျောင်းသို့ တိုက်ပွဲရှောင် ၁၀၀ ကျော် ရောက်ရှိခိုလှုံနေ

မင်းဇော်မင်း

.

နမ္မတူမြို့နယ်၊ နားကျဲကျေးရွာအနီးတွင် ယနေ့ ဒီဇင်ဘာလ ၉ ရက်၊ နံနက်ပိုင်းက စတင်၍ RCSS နှင့် TNLA၊ SSPP ပူးပေါင်းအဖွဲ့များ တိုက်ပွဲဖြစ်ပွားမှုများကြောင့် ဒေသခံ ၁၀၀ ကျော်သည် မန်စံကျေးရွာ ဘုန်းတော်ကြီးကျောင်းသို့ တိုက်ပွဲ ရှောင် ခိုလှုံရောက်ရှိနေသည်ဟု သိရသည်။

.

Photo - Tai Freedom

.

အဆိုပါ တိုက်ပွဲရှောင်များမှာ နမ္မတူမြို့နယ်၊ နားကျဲ၊ နားကျိုင်း၊ ကွန်ကျောင်းနှင့် ပိန်းလုံကျေးရွာများမှ လာရောက်ခြင်း ဖြစ်ပြီး မန်စံကျေးရွာ၊ ရွှေစကားဝါဘုန်းတော်ကြီးကျောင်းသို့ ရောက်ရှိခိုလှုံနေခြင်းဖြစ်သည်ဟု သိရသည်။

.

“အခု သူတို့ (တိုက်ပွဲရှောင်) တွေကို ထောက်ပံ့ရေးပစ္စည်းတွေ ဝေနေပါတယ်” ဟု တိုက်ပွဲရှောင်များအား သွားရောက် ကူညီနေသည့် JMC-S မှ တိုက်ပွဲရှောင်ကူညီရေး အဖွဲ့ဝင် ဒေါ်ခမ်းမီက ကမ္ဘောဇတိုင်းသို့ ပြောသည်။

.

တိုက်ပွဲမှာ ဒီဇင်ဘာလ ၉ ရက်၊ နံနက်ပိုင်းတွင် ၂ ကြိမ်ခန့် ထိ​တွေ့ ပစ်ခတ်မှု ဖြစ်ပွားခဲ့ခြင်း ဖြစ်​ကြောင်း သိရသည်။

.

“TNLA တစ်ဖွဲ့တည်း မဟုတ်ပါဘူး။ SSPP နဲ့ ၂ ဖွဲ့ ပေါင်းတိုက်တာလို့ သိရပါတယ်။ ဒီဘက်မှာတော့ အထိအခိုက် မရှိ ပါဘူး။ သူတို့က တိုက်ပွဲအတု ပုံစံမျိုး ပုံဖော်ပစ်နေတာပါ။ ဘုန်းကြီးကျောင်းဝင်းထဲကနေ ပစ်ခဲ့တာပါ။ အခုတော့ သူတို့ ဆုတ်သွားပြီလို့ သွားပြီလို့ သိရတယ်” ဟု ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) မှ ဒုတိယဗိုလ်မှူးကြီး စိုင်းအုမ်းခေးက ကမ္ဘောဇတိုင်းသို့ ပြောသည်။

.

အဆိုပါကိစ္စနှင့် ပတ်သက်၍ TNLA နှင့် SSPP ဆက်ဆံရေးမှူးများထံသို့ ဆက်သွယ်မေးမြန်းအတည်ပြုနိုင်ရန် ကြိုးပမ်း ခဲ့သော်လည်း ဆက်သွယ်၍ မရခဲ့ချေ။

.

မန်စံကျေးရွာသည် နမ္မတူမြို့၏ အရှေ့ဘက် ၁၅ မိုင်ခန့် အကွာတွင် တည်ရှိပြီး တိုက်ပွဲဖြစ်ပွားနေသည့် နားကျဲကျေးရွာ နှင့် ၈ မိုင်ခန့်အကွာတွင် တည်ရှိကြောင်း သိရသည်။

.

အလားတူ ပြီးခဲ့သည့် ဒီဇင်ဘာလ ၅ ရက်ကလည်း သီပေါမြို့နယ်၊ မိုးတေကျေးရွာအုပ်စု၊ နမ့်ကန်းကျေးရွာအနီးတွင် ရှမ်းတိုင်းရင်းသားလက်နက်ကိုင်အဖွဲ့အစည်း ၂ ခုဖြစ်သော RCSS နှင့် SSPP တို့ ၅ မိနစ်ကြာ ထိတွေ့တိုက်ပွဲ ဖြစ်ပွားခဲ့ ကြောင်း သိရသည်။

.

အဆိုပါ ရှမ်းတိုင်းရင်းသား လက်နက်ကိုင်အဖွဲ့ ၂ ခုသည် ရှမ်းပြည်လူထု၏ တောင်းဆိုချက်အရ ၂၀၁၉ ခုနှစ်၊ မေလ ၁၁ ရက်က ပူးတွဲ အပစ်အခတ်ရပ်စဲရေး ကြေညာထားသည့် အဖွဲ့အစည်းများဖြစ်သည်။

.