နမ္မတူမြို့နယ်၊ မန်စံနှင့် ပန်ချင်ကျေးရွာဘုန်းတော်ကြီးကျောင်းများရှိ တိုက်ပွဲရှောင်ပြည်သူများအား ထောက်ပံ့

စောဦး (ရတနာမြေ)

.

ကျောက်မဲခရိုင်၊ နမ္မတူမြို့နယ်၊ မန်စံနှင့် ပန်ချင်ကျေးရွာဘုန်းတော်ကြီးကျောင်းများသို့ ရောက်ရှိနေသော တိုက်ပွဲရှောင် ပြည်သူများ နေထိုင်စားသောက်ရေး အဆင်ပြေစေရန်အတွက် နမ္မတူမြိုန့ယ် ပြည်သူ့ လွှတ်တော် ကိုယ်စားလှယ် နန်းခမ်းအေး၊ မြို့နယ်တိုက်ပွဲရှောင်စီမံခန့်ခွဲမှုကော်မတီနှင့် လူမှုရေးအသင်းအဖွဲ့များမှ ထောက်ပံ့ကူညီမှုများ ဆောင်ရွက်ပေးလျက်ရှိကြောင်းသိရသည်။

.

.

ထိုသို့ဆောင်ရွက်ရာတွင် နမ္မတူမြို့နယ်ပြည်သူ့လွှတ်တော်ကိုယ်စားလှယ် နန်းခမ်းအေး၊ မန်စံတိုက်နယ်ဆေးရုံမှ တိုက်နယ်ဆရာဝန် ဒေါက်တာမျိုးသန့်ဇော်နှင့် ကျန်းမာရေးဝန်ထမ်းများ၊ နွံစံဟွမ်လူမှုရေးအသင်းအဖွဲ့နှင့် လူငယ်များ ပူးပေါင်း၍ မန်စံကျေးရွာဘုန်းတော်ကြီးကျောင်းရှိ တိုက်ပွဲရှောင်ပြည်သူများအား ပါးစပ်နှင့်နှာခေါင်းစည်း (Mask)များ အခမဲ့ဖြန့်ဝေပေးခြင်း၊ ကျန်းမာရေးစစ်ဆေး ဆေးကုသပေးခြင်း၊ နေထိုင်စာသောက်ရေး အဆင်ပြေစေရေးအတွက် ကူညီဆောင်ရွက်ပေးလျက်ရှိကြောင်း သိရသည်။

.

အလားတူ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယဦးစီးမှူး ဦးမျိုးမင်းဇော်နှင့် မြို့နယ်တိုက်ပွဲရှောင် စီမံခန့်ခွဲမှုကော်မတီ အတွင်းရေးမှူး ဦးအောင်ဆန်းမြင့်တို့က မန်စံကျေးရွာ ဘုန်းတော်ကြီးကျောင်းသို့ ယာယီတိုက်ပွဲရှောင် လာရောက်ကြသော နမ့်တောင်ကုန်း ကျေးရွာအုပ်စု နားကျဲ၊ နားကျိုင်းကျေးရွာမှ အိမ်ထောင်စု ၂၈ စု၊ လူဦးရေ ကျား ၃၄ ဦး၊ မ ၅၅ ဦး၊ ပေါင်း ၈၉ ဦးနှင့် ပန်ချင်ကျေးရွာအုပ်စု ပိန်းလုံ၊ ကွန်ကျောင်းကျေးရွာမှ အိမ်ထောင်စု ၂၈ စု၊ လူဦးရေ ကျား ၂၄ ဦး၊ မ ၅၈ ဦး၊ ပေါင်း ၈၂ ဦး၊ ပန်ချင်ကျေးရွာ ဘုန်းတော်ကြီးကျောင်းသို့ ယာယီတိုက်ပွဲရှောင် လာရောက်ကြသော နမ့်တောင်ကုန်းကျေးရွာအုပ်စု နားကျဲကျေးရွာမှ အိမ်ထောင်စု ၁၅ စု၊ လူဦးရေ ကျား ၁၅ ဦး၊ မ ၃၆ ဦး၊ ပေါင်း ၅၁ ဦးနှင့် ပန်ချင်ကျေးရွာအုပ်စု ပိန်းလုံ၊ ကွန်ကျောင်းကျေးရွာမှ အိမ်ထောင်စု ၂၅ စု၊ လူဦးရေ ကျား ၂၃ ဦး၊ မ ၄၅ ဦး၊ ပေါင်း ၆၈ ဦး၊ စုစုပေါင်းအိမ်ထောင်စု ၉၆ စု လူဦးရေ ကျား ၉၆ ဦး၊ မ ၁၉၄ ဦး၊ စုစုပေါင်းလူဦးရေ ၂၉၀ ဦးတို့အတွက် ဆန် ၁၀ အိတ်၊ ဆီ ပိဿာ ၂၀၊ ကုလားပဲ၊ ဆားနှင့် ရိက္ခာခြောက်များ စုစုပေါင်း ၆ သိန်းကျပ်ခန့်အား ထောက်ပံ့ပေးအပ်ခဲ့ကြောင်း မြို့နယ်အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးထက်အောင်ဖြိုးထံက သိရသည်။

.             

ဆက်လက်၍ မန်စံကျေးရွာ ဆီလိန်ခမ်းလူမှုကူညီရေးအသင်းနှင့် RELIEF International အဖွဲ့တို့ပူးပေါင်း၍ မန်စံ ကျေးရွာ ဘုန်းတော်ကြီးကျောင်းသို့ တိုက်ပွဲရှောင်လာရောက်ကြသော နမ့်တောင်ကုန်း ကျေးရွာအုပ်စု နားကျဲ၊ နားကျိုင်းကျေးရွာမှ အိမ်ထောင်စု ၂၈ စု၊ လူဦးရေ ကျား ၃၄ ဦး၊ မ ၅၅ ဦး၊ ပေါင်း ၈၉ ဦးနှင့် ပန်ချင်ကျေးရွာအုပ်စု၊ ပိန်းလုံ၊ ကွန်ကျောင်းကျေးရွာမှ အိမ်ထောင်စု ၂၈ စု၊ လူဦးရေ ကျား ၂၄ ဦး၊ မ ၅၈ ဦး၊ ပေါင်း ၈၂ ဦး၊ စုစုပေါင်း အိမ်ထောင်စု ၅၆ စု၊ လူဦးရေ ၁၇၁ ဦး တို့အတွက် တစ်အိမ်ထောင်လျှင် အမျိုးသမီးဝတ်အင်္ကျီ ၁ ထည်၊ လုံချည် ၂ ထည်၊ ဆပ်ပြာခဲ ၁ ခဲ၊ သွားတိုက်ဆေး ၁ ဘူး၊ သွားတိုက်တံ ၃ ချောင်း၊ လက်သည်းညှပ် ၁ ခု၊ ခေါင်းဖီး ၁ ချောင်းနှင့် ထုတ်ပိုးရန်အိတ် ၁ လုံးနှုန်း ထောက်ပံ့ပေးအပ်ခဲ့ပြီး ပန်ချင်ကျေးရွာဘုန်းတော်ကြီးကျောင်းရှိ ယာယီ တိုက်ပွဲရှောင်ပြည်သူများသို့လည်း ဆက်လက်ထောက်ပံ့ပေးအပ်သွားမည်ဖြစ်ကြောင်း ဆီလိန်ခမ်း လူမှုကူညီရေးအသင်း အသင်းခေါင်းဆောင် ဒေါ်နန်းခမ်းမီးထံက သိရသည်။

.          

အဆိုပါတိုက်ပွဲရှောင်ပြည်သူများမှာ ဒီဇင်ဘာလ ၉ ရက်နေ့  နံနက်ပိုင်းက နမ္မတူမြို့နယ် နမ့်တောင်ကုန်းကျေးရွာအုပ်စု၊ နားကျဲကျေးရွာနှင့် ပန်ချင်ကျေးရွာ အုပ်စု၊ ပိန်းလုံကျေးရွာအနီးတိုက်ဝိုက်တွင် RCSS/SSAအဖွဲ့နှင့် TNLA အဖွဲ့တို့ ထိတွေ့တိုက်ပွဲဖြစ်ပွား ခဲ့သဖြင့် မန်စံကျေးရွာ ရွှေစကားဝါမြေဘုန်းတော်ကြီးကျောင်းနှင့် ပန်လုံကျေးရွာဘုန်းတော်ကြီး ကျောင်းများသို့ လာရောက်ခိုလှုံကြသော နမ့်တောင်ကုန်းကျေးရွာအုပ်စု နားကျဲ၊ နားကျိုင်းကျေးရွာနှင့် ပန်လုံကျေးရွာအုပ်စု ပိန်းလုံ၊ ကွန်းကျောင်းကျေးရွာတို့မှ ယာယီတိုက်ပွဲရှောင်ပြည်သူများ ဖြစ်ကြောင်း သိရသည်။

.