NLD တင်သွင်းခဲ့သည့် ရွေးကောက်ပွဲကန့်ကွက်လွှာများတွင် ရှမ်းပြည်နယ်မှ ၉ ခု ပါဝင်နေ

ကမ္ဘောဇတိုင်း

.

အမျိုးသားဒီမိုကရေစီအဖွဲ့ချုပ်ပါတီ (NLD) အနေဖြင့် ရွေးကောက်ပွဲကန့်ကွက်လွှာ ၁၇ မှုကို ပြည်ထောင်စု ရွေးကောက်ပွဲကော်မရှင် (UEC) သို့ ယနေ့ ဒီဇင်ဘာလ ၂၉ ရက်က တင်သွင်းခဲ့ရာ ယင်းကန့်ကွက်လွှာများတွင် ရှမ်းပြည်နယ်မှ ၉ ခု ပါဝင်ကြောင်း သိရသည်။

.

.

အဆိုပါ မဲဆန္ဒနယ်များမှာ အမျိုးသားလွှတ်တော် ရှမ်းပြည်နယ်မဲဆန္ဒနယ်အမှတ် (၃)၊ ပြည်သူ့လွှတ်တော် မိုင်းပျဉ်းမြို့နယ် မဲဆန္ဒနယ်၊ ရှမ်းပြည်နယ်လွှတ်တော် ပင်းတယမြို့နယ် မဲဆန္ဒနယ်အမှတ် (၁)၊ မိုင်းဖြတ်မြို့နယ် မဲဆန္ဒနယ်အမှတ် (၁)၊ (၂)၊ မိုင်းပျဉ်းမြို့နယ် မဲဆန္ဒနယ်အမှတ် (၁)၊ (၂)၊ မိုင်းဆတ်မြို့နယ် မဲဆန္ဒနယ်အမှတ် (၂)နှင့် လားဟူတိုင်းရင်းသား လူမျိုးရေးရာမဲဆန္ဒနယ်တို့ဖြစ်သည်ဟု သိရသည်။

.

ယင်းမဲဆန္ဒနယ် ၉ ခုအနက် ၈ ခုမှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ အနိုင်ရရှိထားသည့် မဲဆန္ဒနယ် များဖြစ်ပြီး လားဟူတိုင်းရင်းသားလူမျိုးရေးရာ မဲဆန္ဒနယ်မှာ လားဟူအမျိုးသား ဖွံ့ဖြိုးတိုးတက်ရေးပါတီမှ အနိုင် ရရှိထားသည့် မဲဆန္ဒနယ်ဖြစ်ကြောင်း သိရသည်။

.

မဲဆန္ဒနယ် တစ်ခုချင်းစီအလိုက် ဆန္ဒမဲရရှိမှု ကွာခြားချက် အနေဖြင့် လားဟူတိုင်းရင်းသားလူမျိုးရေးရာကိုယ်စားလှယ် နေရာက ဆန္ဒမဲ ကွာခြားချက် ၁၁၀၃၇ ဖြင့် အများဆုံး ပါရှိပြီး မိုင်းဖြတ်မြို့နယ်မဲဆန္ဒနယ်အမှတ် (၂) မှာ မဲကွာခြားချက် ၂၆၈ ဖြင့် အကျဉ်းမြောင်းဆုံး ဖြစ်သည်ကို တွေ့ရသည်။

.

အမျိုးသားလွှတ်တော် ရှမ်းပြည်နယ်မဲဆန္ဒနယ်အမှတ် (၃) တွင်မူ အနိုင်ရပါတီ ပြည်ခိုင်ဖြိုးနှင့် NLD ကိုယ်စားလှယ် လောင်းတို့ မဲကွာခြားချက် ၄၇၄ မဲသာ ရှိရာ ရာခိုင်နှုန်းအားဖြင့် ကွာခြားချက် ၀ ဒသမ ၃၂ ရာခိုင်နှုန်းသာ ရှိသည်ကို တွေ့ရသည်။

.

၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲ ကျင်းပခဲ့သည့် ရှမ်းပြည်နယ်အတွင်းရှိ မဲဆန္ဒနယ် စုစုပေါင်း ၁၆၆ နေရာအနက် အမျိုးသားဒီမိုကရေစီအဖွဲ့ချုပ်ပါတီက ၅၁ နေရာ၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ၄၂ နေရာ၊ ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီက ၄၁ နေရာနှင့် ကျန်မဲဆန္ဒနယ်များကို တိုင်းရင်းသားပါတီ များက အနိုင်ရရှိထားသည်။

.