မိုင်းတုံမြို့နယ်တွင် ငွေကျပ် ၅၈ သိန်းကျော် တန်ဖိုးရှိ မူးယစ်ဆေးဝါးများ ဖမ်းမိ

နန်းဝင်းရီ

.

မိုင်းဆတ်ခရိုင်၊ မိုင်းတုံမြို့နယ်၊ မိုင်းကန်ကျေးရွာအုပ်စု၊ ရွှေတောင်ကျေးရွာတွင် ယနေ့ ဒီဇင်ဘာလ ၁၀ ရက်၊ နေ့လယ် ပိုင်းက ‌ငွေကျပ် ၅၈ သိန်းကျော် တန်ဖိုးရှိ ဘိန်းစိမ်း၊ ဘိန်းဖြူနှင့် စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း သိရသည်။

.

.

မူးယစ်တပ်ဖွဲ့စု (၂၉) မိုင်းဆတ်မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဒီဇင်ဘာလ ၁၀ ရက်၊ နေ့လယ် ၁၁ နာရီခွဲအချိန်ခန့်က မူးယစ်ဆေးဝါး သတင်းအရ မိုင်းတုံမြို့နယ်၊ မိုင်းကန်ကျေးရွာအုပ်စု၊ ရွှေတောင်ကျေးရွာနေ ကျဒေ့ ၏ နေအိမ်အား ဝင်ရောက်ရှာဖွေရာ ၎င်းအား နေအိမ်တွင် အသင့်တွေ့ရပြီး ၎င်း၏အိပ်ရာဘေးမှ အနက်ရောင် ကြွပ်ကြွပ်အိတ်ဖြင့် ထုတ်ထားသော ဘိန်းစိမ်းဟု ယူဆရသည့် အမဲရောင်အစေးခဲ ၁ ဒသမ ၂ ကီလိုဂရမ်ခန့်ပါ ၁ ထုပ်၊ တန်ဖိုး ၁၈ သိန်းကျပ်၊ အပြာရောင်ပလတ်စတစ် ဆပ်ပြာခွက်များဖြင့် ထည့်လျက် ဘိန်းဖြူဟု ယူဆရသော အဖြူရောင် အမှုန့် ၁၅ ဂရမ်ခန့်၊ တန်ဖိုး ၂၂၅၀၀၀ ကျပ်၊ WY စာတမ်းပါ လိမ္မော်ရောင်စိတ်ကြွရူးသွပ်ဆေးပြား ၃၈၀၀ ပြား၊ တန်ဖိုး ၃၈ သိန်းကျပ်၊ စုစုပေါင်း မူးယစ်ဆေးဝါးတန်ဖိုး ၅၈၂၅၀၀၀ ကျပ်ခန့်အား ဖမ်းဆီးရမိခဲ့ခြင်း ဖြစ်ကြောင်း သိရသည်။

.

အဆိုပါ မူးယစ်ဆေးဝါးများ ဖမ်းဆီးရမိမှုနှင့် ပတ်သက်၍ ကျဒေ့အား မိုင်းတုံမြို့မရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာဥပဒေ ပုဒ်မ ၁၉ (က) ဖြင့် အမှုဖွင့်အရေးယူ ဆောင်ရွက်လျက်ရှိကြောင်း သိရသည်။

.