စိုင်းဇော်လတ် (လင်းခေး)
.
လင်းခေးခရိုင်၊ မိုးနဲမြို့နယ်၊ နားခံကျေးရွာမှ Stay
at Home သတ်မှတ်ထားသည့် အခြေခံလူတန်းစား အိမ်ထောင်စု ၃၀ အား နမ့်ခုံးရှမ်းများပရဟိတအသင်းခွဲများ
စုပေါင်း၍ ဒီဇင်ဘာလ ၂၈ ရက်က စားနပ်ရိက္ခာ၊ လူ့အသုံးအဆောင် ပစ္စည်းနှင့် အလှူငွေများ
သွားရောက်ထောက်ပံ့ လှူဒါန်းခဲ့သည်ဟု သိရသည်။
.
ထိုသို့ ထောက်ပံ့ရာတွင် Stay at Home သတ်မှတ်ထားသည့် အိမ်ထောင်စု ၃၀ အား ဆန်၊ ဆီ၊ ဆား၊ အာလူး၊ ပဲ၊ ဆေးဝါးများ အပါအဝင်
အခြေခံစားသောက်ကုန် ၉ မျိုးစီ ထောက်ပံ့ပေးအပ်ခဲ့ပြီး အိုးအိမ်မရှိသူ ပြည်သူတစ်ဦးအတွက်
လူ့အသုံး အဆောင်ပစ္စည်းနှင့် ငွေကြေးတို့ကိုပါ ထောက်ပံ့ခဲ့ရာ နားခံကျေးရွာအုပ်ချုပ်ရေးမှူး
စိုင်းအွမ်မှ လက်ခံရယူခဲ့သည်ဟု သိရသည်။
.
အဆိုပါ ထောက်ပံ့လှူဒါန်းမှုကို ရှမ်းပြည်နယ် နမ့်ခုံးရှမ်းများပရဟိတအသင်း၊
မိုးနဲမြို့နယ်အသင်းခွဲနှင့် လင်းခေး မြို့နယ်၊ နားကုန်းကျေးရွာအသင်းခွဲတို့က စုပေါင်းဆောင်ရွက်ခဲ့ခြင်းဖြစ်ကြောင်း
သိရသည်။
.
“ကျေးရွာကို Lockdown ချခံနေရတဲ့
ကာလအတွင်းမှာ တချို့အခြေခံလူတန်းစားတွေ အနေနဲ့ စားဝတ်နေရေး အခက်အခဲရှိနိုင်တဲ့အတွက်
တစ်ဘက်တစ်လမ်း အဆင်ပြေစေဖို့ရည်ရွယ်ပြီး အခုလိုလာရောက်လှူဒါန်းထောက်ပံ့ ပေးရခြင်း
ဖြစ်ပါတယ်”ဟု မိုးနဲနမ့်ခုံးရှမ်းများပရဟိတအသင်းခွဲ ဥက္ကဋ္ဌ စိုင်းထွန်းလှ က ပြောသည်။
.
မိုးနဲမြို့နယ်၊ နားခံကျေးရွာတွင် ပြီးခဲ့သည့် ရက်သတ္တပတ်က
COVID-19 ရောဂါ ကူးစက်ခံရသူတစ်ဦး တွေ့ရှိခဲ့သည့် အတွက် ကျေးရွာအား
ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသော စည်းကမ်းချက်များနှင့်အညီ Stay
at Home သတ်မှတ်ထားခြင်းဖြစ်ကြောင်း သိရသည်။
.
