လင်းခေးမြို့နယ် နမ့်ခုံးရှမ်းများပရဟိတအသင်းခွဲမှ ကျေးလက်နေပြည်သူများအား လှူဒါန်း

စိုင်းဇော်လတ် (လင်းခေး)

.

နမ့်ခုံးရှမ်းများပရဟိတအသင်း၊ လင်းခေးမြို့နယ်အသင်းခွဲမှ နမ့်စန်မြို့ရှိ စေတနာရှင် အလှူရှင်များနှင့်အတူ ယမန်နေ့ ဒီဇင်ဘာလ ၂၉ ရက်က စားဝတ်နေရေး အခက်အခဲရှိသည့် ကျေးရွာများသို့ သွားရောက်၍ ပြည်သူများအား စားနပ် ရိက္ခာများ၊ အဝတ်အထည် နှင့် ငွေကြေးများ ထောက်ပံ့လှူဒါန်းခဲ့ပြီး ကျန်းမာရေးစောင့်ရှောက်မှုများ အခမဲ့ဆောင်ရွက် ပေးခဲ့ကြောင်း သိရသည်။

.

.

ထိုသို့ ဆောင်ရွက်ရာတွင် လင်းခေးမြို့နယ်၊ နမ့်တင်ကျေးရွာနှင့် နမ့်နော်ကျေးရွာများမှ ပြည်သူ ၈၇ ဦးတို့အား လိုအပ်သည့် ကျန်းမာရေးစောင့်ရှောက်မှုပေးခြင်း၊ မိသားစုစားဝတ်နေရေး အခက်အခဲရှိသည့် သက်ကြီးရွယ်အို အဖိုး၊ အဖွားများ၊ အလုပ်အကိုင်မရှိသူများနှင့် မသန်စွမ်းသူ ၃၀ ဦးခန့်အား အဝတ်အထည်နှင့် ငွေကြေး ထောက်ပံ့လှူဒါန်း ပေးခြင်းတို့ကို အိမ်တိုင်ရာရောက် ဆောင်ရွက်ပေးခဲ့သည်ဟု သိရသည်။

.

စားနပ်ရိက္ခာနှင့် ငွေကြေးထောက်ပံ့လှူဒါန်းမှုကို နမ့်ခုံးရှမ်းများပရဟိတအသင်း၊ လင်းခေးမြို့နယ်အသင်းခွဲ၊ နမ့်စန်မြို့မှ စေတနာရှင်အလှူရှင်များဖြစ်ကြသော ဟိုမိန်းဒေသဖွံ့ဖြိုးတိုးတက်ရေးအဖွဲ့မှ ဦးကျော်လေးနှင့် ဒေါ်နန်းမီးငယ်မိသားစု၊ ဒေါ်နန်းမျိုးဇင်၊ စိုင်းသားလေး၊ ဒေါ်နန်းယိင်းလုံနှင့် ဒေါ်မော်စီနှင့် လင်းခေးဦးထွန်းမြင့် (ပင်လုံစာချုပ်) ၏ မျိုးဆက် မိသားစုတို့က လှူဒါန်းပေးခြင်းဖြစ်ကြောင်း သိရသည်။

.

အဆိုပါ လှူဒါန်းမှုတွင် ဆန်၊ ဆီ၊ ဆား၊ ငါးသေတ္တာ၊ အာလူး၊ ကြက်သွန်၊ ပဲပုပ်ချပ်၊ မုန့်မျိုးစုံ၊ အဝတ်အထည်နှင့် သွားတိုက်တံများ ပါဝင်ကြောင်း သိရသည်။

.