တပ်မတော်သား ရှမ်းပြည်နယ်လွှတ်တော်ကိုယ်စားလှယ်များစာရင်း ကြေညာ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, December 31, 2020

တပ်မတော်သား ရှမ်းပြည်နယ်လွှတ်တော်ကိုယ်စားလှယ်များစာရင်း ကြေညာ

 

လာမည့် ၂၀၂၁ ခုနှစ်၊ ဖေဖော်ရီလအတွင်း စတင်တော့မည့် တတိယအကြိမ် တိုင်းဒေသကြီး လွှတ်တော် သို့မဟုတ် ပြည်နယ်လွှတ်တော်များအတွက် တပ်မတော်သား လွှတ်တော် ကိုယ်စားလှယ်များစာရင်းကို ပြည်ထောင်စု ရွေးကောက်ပွဲကော်မရှင်က ဒီဇင်ဘာလ ၃၀ ရက်တွင် ကြေညာချက်အမှတ်(၂၇၁/၂ဝ၂ဝ) ဖြင့် ကြေညာရာတွင် တပ်မတော်သား ရှမ်းပြည်နယ်လွှတ်တော်ကိုယ်စားလှယ် ၃၅ ဦး၏ စာရင်းကိုပါ ထည့်သွင်း ကြေညာခဲ့ကြောင်း သိရသည်။

.

အဆိုပါတပ်မတော်သား ရှမ်းပြည်နယ်လွှတ်တော်ကိုယ်စားလှယ်များတွင် လက်ရှိ ရှမ်းပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး လှဦး အပါအဝင် ဗိုလ်မှူးကြီး ၂ ဦး၊ ဒုတိယဗိုလ်မှူးကြီး ၃ ဦး၊ ဗိုလ်မှူး ၁၅ ဦး၊ ဗိုလ်ကြီး ၁၄ ဦး၊ စုစုပေါင်း ၃၅ ဦး ပါဝင်ကြောင်း သိရသည်။

.

ပြည်ထောင်စုရွေးကောက်ပွဲကော်မရှင် အနေဖြင့် တပ်မတော်သား တိုင်းဒေသကြီး လွှတ်တော် သို့မဟုတ် ပြည်နယ်လွှတ်တော် ကိုယ်စားလှယ် အမည်စာရင်းအပြင် တပ်မတော်သား ပြည်သူ့လွှတ်တော်ကိုယ်စားလှယ် ၁၁၀ ဦး၊ တပ်မတော်သား အမျိုးသားလွှတ်တော်ကိုယ်စားလှယ် ၅၆ ဦး၏ အမည်စာရင်းများကိုလည်း ထုတ်ပြန်ကြေညာခဲ့သည်။

.

လွှတ်တော်အလိုက် ရွေးကောက်ပွဲ ဥပဒေအခန်း(၈)ပါ ပြဋ္ဌာန်းချက်များနှင့်အညီ တပ်မတော်ကာကွယ်ရေးဦးစီးချုပ်က အမည်စာရင်း ပေးပို့လာသည့် တပ်မတော်သားများအား ပြည်ထောင်စု ရွေးကောက်ပွဲကော်မရှင်က စိစစ်ပြီးနောက် သက်ဆိုင်ရာလွှတ်တော် ရွေးကောက်ပွဲဥပဒေပုဒ်မ ၃၁ အရ တပ်မတော်သား ကိုယ်စားလှယ်များ ဖြစ်ကြောင်း ကြေညာခဲ့ခြင်း ဖြစ်သည်။

.

 

တတိယအကြိမ် ရှမ်းပြည်နယ်လွှတ်တော်တွင် ရွေးကောက်ခံ လွှတ်တော်ကိုယ်စားလှယ်များဖြစ်သည့် ရှမ်းပြည်နယ်လွှတ်တော် ကိုယ်စားလှယ် ၉၈ ဦး၊ တိုင်းရင်းသားရေးရာ ကိုယ်စားလှယ် ၇ ဦးနှင့် တပ်မတော်သားလွှတ်တော် ကိုယ်စားလှယ် ၃၅ ဦး၊ စုစုပေါင်း ၁၄၀ ဦး ပါဝင်မည် ဖြစ်သည်။

.

No comments:

Post a Comment

Journal Download

Photo of three cats