က​လောမြို့နယ်ရှိ ကျန်းမာ​ရေးစစ်ဆေးရေးဂိတ်များတွင် COVID-19 အတည်ပြုလူနာ​ပေါင်း ၈၂ ဦး ​တွေ့ရှိခဲ့

စုလှိုင် 

.

က​လောမြို့နယ် အတွင်းရှိ ကျန်းမာ​ရေး စစ်​ဆေး​ရေး ဂိတ်များတွင် ​အောက်တိုဘာလ ၃ ရက်​မှ ဒီဇင်ဘာလ ၁၉ ရက်၊ ညပိုင်းထိ COVID-19 အတည်ပြုလူနာ စုစု​ပေါင်း ၈၂ ဦးကို ​တွေ့ရှိခဲ့​ကြောင်း သိရသည်။

.

ရှမ်းပြည်နယ် အတွင်းသို့ ဝင်​ရောက်လာသော ကုန်တင်ယာဥ် မောင်းနှင်သူနှင့် ယာဥ်နောက်လိုက်များ၊ ​မော်​တော်ယာဥ်ပါသူများအား ကလောမြို့နယ်၊ နန့်ပန်တက်တွင် လည်း​ကောင်း၊ ရှမ်းပြည်နယ်မှ ထွက်ခွာမည့် ယာဥ်များကို က​လောမြို့ အထွက် စစ်ဆေး​ရေးဂိတ်တွင် လည်း​ကောင်း RDT ဖြင့် စစ်​ဆေးစဥ် ယင်းကဲ့သို့ ​တွေ့ရှိခဲ့ခြင်း ဖြစ်​ကြောင်း ကလောမြို့နယ် ပြည်သူ့ကျန်းမာရေးဦးစီးဌာနမှ သိရသည်။

.

"အခုလက်ရှိ ကလောဆေးရုံမှာ ကုသနေသူ ၆ ဦး ရှိပါတယ်။" ဟု ကလောမြို့ နယ်၊ ပြည်သူ့ကျန်းမာရေး ဦးစီးဌာနမှ ကြီးကြပ်ရေးမှူး ၂ ဒေါ်အိမွန်ထွေးက ကမ္ဘောဇတိုင်းသို့ ပြောသည်။

.

ကလောမြို့နယ်၊ နန့်ပန်တက်ဂိတ်တွင် COVID-19 ပိုးတွေ့ လူနာ ၇၀ ဦးနှင့် ကလောမြို့ အထွက် ဂိတ်တွင် ၁၂ ဦး၊ စုစုပေါင်း ၈၂ ဦး တွေ့ရှိခဲ့ပြီး ယင်းအနက် ၇၆ ဦးမှာ ဆေးရုံမှ ဆင်းခွင့် ရရှိပြီဖြစ်ကာ ၆ ဦးသာ ​ဆေးကုသမှု ခံယူ​နေဆဲ ဖြစ်ကြောင်း သိရသည်။