တရုတ်နိုင်ငံမှ “ဝ” အထူးဒေသ၊ ပန်ဆန်းဆေးရုံသို့ COVID-19 ရောဂါ ဓါတ်ခွဲစမ်းသပ်စက် လွှဲပြောင်းပေးအပ် - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

တရုတ်နိုင်ငံမှ “ဝ” အထူးဒေသ၊ ပန်ဆန်းဆေးရုံသို့ COVID-19 ရောဂါ ဓါတ်ခွဲစမ်းသပ်စက် လွှဲပြောင်းပေးအပ်

မင်းဇော်မင်း

.

တရုတ်နိုင်ငံ၊ ယူနန်ပြည်နယ်၊ ဖူအဲခရိုင်၊ မုန်းလင်မြို့ ကြက်ခြေနီဌာနခွဲမှ ကူညီဆောက်လုပ်ပေးခဲ့သည့် “ဝ” ကိုယ်ပိုင်အုပ်ချုပ်ခွင့်ရတိုင်း၊ ပန်ဆန်းဆေးရုံရှိ COVID-19 ရောဂါ ဓါတ်ခွဲစမ်းသပ်စစ်ဆေးရှာဖွေနိုင်သည့် PT/PCR စက်ကို ယနေ့ ဒီဇင်ဘာလ ၆ ရက်၊ နံနက်ပိုင်းက တရုတ်နိုင်ငံမှ လွှဲပြောင်းပေးအပ်ခဲ့သည်ဟု လားရှိုးမြို့ အခြေစိုက် “ဝ” အထူးဒေသ ဆက်ဆံရေးရုံးတာဝန်ခံ ဦးညီရမ်းထံက သိရသည်။

.


Photo - Internet

.

“အရင်တော့ တရုတ်နိုင်ငံပို့ပြီး စစ်ရတာ၊ ခုတော့ ဒေသအတွင်းမှာပဲ စစ်ဆေးနိုင်ပြီဖြစ်ပါတယ်။ အခုချိန်အထိတော့ ဒေသတွင်း ရောဂါပိုးတွေ့တာ မရှိသေးပေမဲ့ အဝင်အထွက်ကိုတော့ ပိတ်ထားဆဲဖြစ်ပါတယ်” ဟု ဦးညီရမ်းက ကမ္ဘောဇတိုင်းသို့ ပြောသည်။

.

အဆိုပါ PCR စက် လွှဲပြောင်းပေးအပ်ပွဲတွင် “ဝ” ပြည်သွေးစည်းညီညွတ်ရေးပါတီ (UWSP) ဒုတိယဥက္ကဋ္ဌ ကျောက်ကော်အန်းက COVID-19 ရောဂါ ကာကွယ်တိုက်ဖျက်ရေးအတွက် အကူအညီပေးသည့် တရုတ်နိုင်ငံ၊ ယူနန် ပြည်နယ်၊ ဖူအဲခရိုင် ကြက်ခြေနီအသင်းကို ကျေးဇူးတင်ရှိကြောင်း ပြောကြားခဲ့ပြီး ဖူအဲခရိုင် ကြက်ခြေနီအသင်း ကိုယ်စားလှယ် ပိုင်ယွီဖျင်က ပန်ဆန်းတွင် COVID-19 ရောဂါရှာဖွေစစ်ဆေးသည့်စက် တပ်ဆင်အသုံးပြုနိုင်ရန် ပြီးခဲ့သည့် သြဂုတ်လကတည်းက “ဝ” ကျန်းမာရေးဌာနနှင့် ပူးပေါင်းကာ စတင်ဆောင်ရွက်ခဲ့ကြောင်း၊ ဝန်ထမ်းများကို စက်ပစ္စည်းများကိုင်တွယ်အသုံးပြုနိုင်မည့် သင်တန်းများပေးခြင်း၊ လက်တွေ့လုပ်ဆောင်စေခြင်း တို့ပြုလုပ်ခဲ့ပြီး ယခုအချိန်မှစကာ COVID-19 ရောဂါပိုးနှင့်ပတ်သက်၍ တရုတ်နိုင်ငံသို့ ပေးပို့ဓာတ်ခွဲစစ်ဆေးရန်မလိုတော့ဘဲ ပန်ဆန်းတွင်ပင် လျှင်မြန်စွာ စစ်ဆေးအတည်ပြုနိုင်ပြီဖြစ်သဖြင့် COVID-19 ရောဂါရှာဖွေကုသရေးတွင် များစွာ အထောက်အကူပြုပြီ ဖြစ်ပါကြောင်း ပြောကြားခဲ့သည်ဟု သိရသည်။

.

တရုတ်နိုင်ငံ၊ ဖူအဲယ်ခရိုင်ကြက်ခြေနီအသင်းမှ ဆောက်လုပ်လှူဒါန်းပေးသည့် COVID-19 ရောဂါပိုးဓာတ်ခွဲရှာဖွေ စစ်ဆေးသည့် စက်၏ တန်ဖိုးမှာ တရုတ်ယွမ် ၃၁၄၀၀၀၀ (အမေရိကန်ဒေါ်လာ ၄၇၇၄၂၁) ရှိကာ တရုတ်နိုင်ငံ၏ နောက်ဆုံးပေါ် စက်ဖြစ်ကြောင်း သိရသည်။

.

အဆိုပါ ဓါတ်ခွဲစမ်းသပ်စက်မှ ၃ နာရီတစ်ကြိမ်လျှင် ၉၂ ဦး၏ ဓါတ်ခွဲနမူနာများကို တစ်ပြိုင်နက်စစ်ဆေးပေးနိုင်မည် ဖြစ်ပြီး ဒီဇင်ဘာလ ၅ ရက်က လူပေါင်း ၃၀ တို့၏ ဓါတ်ခွဲနမူနာများကို စမ်းသပ်စစ်ဆေးခဲ့ရာ အားလုံးတွင် Negative အဖြေ ရရှိခဲ့ကြောင်း သိရသည်။

.

Journal Download

Photo of three cats