တောင်ကြီးမြို့၊ ပန်းချယ်ရီအိမ်ရာစီမံကိန်းအား မြို့ခံ အရပ်ဘက်လူမှုအဖွဲ့အစည်းများက ကန့်ကွက် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, December 23, 2020

တောင်ကြီးမြို့၊ ပန်းချယ်ရီအိမ်ရာစီမံကိန်းအား မြို့ခံ အရပ်ဘက်လူမှုအဖွဲ့အစည်းများက ကန့်ကွက်

အောင်ဆန်းဝင်း

.

တောင်ကြီးမြို့ အထွက် ၂ မိုင်၊ ထင်းရှူးတောအတွင်း ဆောင်ရွက်နေသော ပန်းချယ်ရီအိမ်ရာစီမံကိန်းက ထင်းရှူးပင်အများအပြား ခုတ်ထွင်ပြီး စီမံကိန်း လုပ်ဆောင်နေခြင်းအပေါ် တောင်ကြီးမြို့ခံ အရပ်ဘက်လူမှု အဖွဲ့အစည်းများက ကန့်ကွက်စာ ပေးပို့ထားသည်ဟု သိရသည်။

.

.

တောင်ကြီးမြို့ပေါ်တွင် တစ်နှစ်ထက်တစ်နှစ် ရာသီဥတု ပြောင်းလဲဖောက်ပြန်လာပြီး ရေရှားပါးလာသည့် အတွက် ယင်းကဲ့သို့ ကန့်ကွက်စာ ပေးပို့ရခြင်းဖြစ်သည်ဟု သိရသည်။

.

အဆိုပါ ကန့်ကွက်စာကို နိုင်ငံတော်သမ္မတ ဦးဝင်းမြင့်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးအုန်းဝင်း၊ နိုင်ငံတော်သမ္မတ ဟောင်း ဦးသိန်းစိန်၊ ရှမ်းပြည်နယ်ဝန်ကြီးချုပ် ဒေါက်တာလင်းထွဋ်တို့ထံသို့ စုပေါင်းလက်မှတ်ရေးထိုး၍ ဒီဇင်ဘာလ ၁၀ ရက်တွင် တင်ပြထားခဲ့ခြင်း ဖြစ်သည်ဟု သိရသည်။

.

“အိမ်ရာစီမံကိန်းတွေကို ပီပီပြင်ပြင် ဖော်ဆောင်တဲ့သူတွေကို ကျွန်တော်တို့က ကြိုဆိုပါတယ်။ ဒါပေမဲ့ အဲဒီလို လုပ်တိုင်းမှာ သစ်တောကို မထိခိုက်ဖို့ လိုအပ်ပါတယ်။ ၁၉၇၀-၁၉၈၀ လောက်က တောင်ကြီးမှာ ရေထွက်တွေ အများကြီး ရှိပါတယ်။ အခုချိန်မှာတော့ အဲဒီရေထွက်တွေ တော်တော်များများက ရေလုံးဝ ခန်းသွားတာတွေ ရှိပါတယ်” ဟု ကန့်ကွက်စာ လက်မှတ်ရေးထိုး တင်ပြထားသူ ဦးတင်ထွန်းအောင်က ကမ္ဘောဇတိုင်းသို့ ပြောသည်။

.

ပန်းချယ်ရီ အိမ်ရာစီမံကိန်းကို ယခင်အစိုးရလက်ထက်က စတင်အကောင်အထည်ဖော် ဆောင်ရွက်ခဲ့ခြင်းဖြစ်ပြီး စီမံကိန်းအတွင်း ထင်းရှူးပင် ၅၀၀၀ ကျော် ခုတ်ယူခဲ့ပြီးဖြစ်သည်ဟု ၎င်း၏ ပြောဆိုမှုအရ သိရသည်။

.

အလားတူ ယင်းစီမံကိန်းနှင့် ပတ်သက်၍ အဆိုပါနေရာသည် မြို့နေလူထု၏ ရေအရင်းအမြစ်နေရာ ဖြစ်သည့်အတွက် ဝိုင်းဝန်း ထိန်းသိမ်းပြီး သဘာဝတောတောင်၊ သဲတောင်၊ ကျောက်တောင်များကို ဆက်လက် ထိန်းသိမ်းစောင့်ရှောက်ကြရန် တောင်ကြီးမြို့တွင် သီတင်းသုံးနေထိုင်တော် မူကြကုန်သော နိုင်ငံတော်ဩဝါဒစရိယ ဆရာတော်ကြီးများ၊ နိုင်ငံတော် ဗဟိုသံဃာ့ဝန်ဆောင် ဆရာတော်ကြီးများ၊ ပြည်နယ်/မြို့နယ်အဆင့် ဆရာတော်ကြီးများက ၂၀၁၈ ခုနှစ်၊ ဇွန်လ ၇ ရက်တွင် ရှမ်းပြည်နယ်အစိုးရအဖွဲ့နှင့် ပြည်ထောင်စုအစိုးရအဖွဲ့သို့ မေတ္တာရပ်ခံစာ ပေးပို့ထားဖူးသည်ဟု သိရသည်။

.

အဆိုပါ ပန်းချယ်ရီ အိမ်ရာ စီမံကိန်း မြေနေရာတွင် တောင်ကြီးမြို့၏ ရေဝေရေလဲ ကောင်းမွန်ရေးနှင့် ကာဗွန်ဒိုင်အောက်ဆိုက် လျှော့ချရေးအတွက် ရည်ရွယ်၍ ထင်းရှူးပင်များအား လွန်ခဲ့သည့် နှစ် ၃၀ ကျော်ကတည်း က စိုက်ပျိုးထားခဲ့ခြင်းဖြစ်ကြောင်း ဒေသခံများထံက သိရသည်။

.

ယင်းကဲ့သို့ ကန့်ကွက်စာ ပေးပို့ထားမှုနှင့် ပတ်သက်၍ အရပ်ဘက်လူမှုအဖွဲ့အစည်းဝင်များက ယနေ့ ဒီဇင်ဘာလ ၂၃ ရက်တွင် တောင်ကြီးမြို့၊ စူဠာမုနိစေတီတော် ဓမ္မာရုံ၌ သတင်းမီဒီယာများအား တွေ့ဆုံရှင်းလင်းခဲ့သည်ဟု သိရသည်။

.


No comments:

Post a Comment

Journal Download

Photo of three cats

About