ဝန်းသိုစော်ဘွားကြီး ဦးအောင်မြတ် ဂူဗိမာန်အား ပြုပြင်ထိန်းသိမ်းထား - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

ဝန်းသိုစော်ဘွားကြီး ဦးအောင်မြတ် ဂူဗိမာန်အား ပြုပြင်ထိန်းသိမ်းထား

အောင်ဆန်းဝင်း

.

နယ်ချဲ့တော်လှန်ရေး ခေါင်းဆောင်တစ်ဦးဖြစ်သူ ဝန်းသိုစော်ဘွားကြီး ဦးအောင်မြတ်၏ ဂူဗိမာန်အား တောင်ကြီးမြို့၊ ချမ်းသာရပ်ကွက်တွင် ပြန်လည်ပြုပြင် ထိန်းသိမ်းထားကြောင်း သိရသည်။

.

.

အဆိုပါစော်ဘွားကြီး ဦးအောင်မြတ်၏ ဂူဗိမာန်မှာ တောင်ကြီးမြို့၊ ချမ်းသာရပ်ကွက်၊ နယ်မြေ (၉)၊ အောင်မြတ်လမ်း အတွင်း တည်ရှိပြီး လူနေအိမ်များကြားတွင် ရောက်ရှိနေသည့်အတွက် စနစ်တကျပြုပြင် ထိန်းသိမ်းမှုများ ပြုလုပ်ရန်လိုအပ်နေကြောင်း သိရသည်။

.

“လူနေအိမ်တွေကြား ရောက်နေတော့ ရုတ်တရက်ဆို စော်ဘွားကြီးရဲ့ ဂူဗိမာန်က ပျောက်သလိုဖြစ်နေတာပေါ့။ အခုနောက်ပိုင်းလူငယ်တွေ အတော်များများလည်း ဒီဂူဗိမာန်ရှိနေတာ သိပ်မသိကြတော့ဘူး။ အများပြည်သူ လာရောက်လေ့လာလို့ရတဲ့ နေရာလေးဖြစ်အောင် လုပ်နိုင်ရင်တော့ ပိုကောင်းမယ်လို့ ထင်ပါတယ်” ဟု တောင်ကြီးမြို့၊ ချမ်းသာရပ်ကွက်အတွင်း နေထိုင်သူတစ်ဦးက ကမ္ဘောဇတိုင်းသို့ပြောသည်။

.

ဝန်းသိုစော်ဘွားကြီး ဦးအောင်မြတ်သည် နယ်ချဲ့တို့အားတော်လှန် တိုက်ခိုက်ရာတွင် ကောလင်းတိုက်ပွဲ၊ ကျောက်ကြမ်းတိုက်ပွဲ၊ ကျိုင်းခွင်တောင် တိုက်ပွဲများ၌ နယ်ချဲ့တို့ အကျအဆုံးများသဖြင့် ထင်ရှားကျော်ကြားခဲ့ခြင်း ဖြစ်ကြောင်း သိရသည်။

.

ထို့နောက် လူသူလက်နက်အင်အား မမျှသဖြင့် နယ်စပ်မြို့များတွင် ၃၁ နှစ်ကြာသွားရောက် ခိုလှုံခဲ့ပြီး ကြင်ယာတော် စဝ်နန်းရွှေချီ၏ ဦးလေးတော်စပ်သူ ညောင်ရွှေစော်ဘွားကြီး ဆာစောမောင်၏ ဖိတ်ခေါ်မှုကြောင့် တောင်ကြီးမြို့၊ ဟော်ကုန်းရပ်ရှိ သထုံဟော်တွင် ပြန်လည်နေထိုင်ခဲ့ခြင်းဖြစ်ကြောင်း သိရသည်။

.

ဝန်းသိုစော်ဘွားကြီး ဦးအောင်မြတ်သည် ကွယ်လွန်ချိန်တွင် အသက် ၁၀၃ နှစ်ရှိပြီဖြစ်ကာ ၁၉၆၅ ခုနှစ်၊ ဇန်နဝါရီလ ၅ ရက်က ကွယ်လွန်ခဲ့ခြင်းဖြစ်ပြီး ထိုစဉ်က နိုင်ငံတော်ဈာပန အခမ်းအနားဖြင့် သင်္ဂြိုဟ်ခဲ့ခြင်းဖြစ်ကြောင်း သိရသည်။

.


Journal Download

Photo of three cats