မိုင်းယောင်းမြို့နယ် ဘက်စုံအဆင့်မြင့်နည်းပညာသုံး စံပြကျေးရွာ၌ ဆောင်းသီးနှံ ဟင်းသီးဟင်းရွက်စိုက်ခင်းများ အောင်မြင်

စိုင်းအောင်ဇော်လင်း

.

တာချီလိတ်ခရိုင်၊ မိုင်းယောင်းမြို့နယ် ဘက်စုံအဆင့်မြင့်နည်းပညာသုံး စံပြကျေးရွာ၌ ဆောင်းသီးနှံ ဟင်းသီးဟင်းရွက် စိုက်ခင်းများ အောင်မြင်ဖြစ်ထွန်းလျက်ရှိကြောင်း သိရသည်။

.

.

“မိရိုးဖလာ စိုက်ပျိုးလာရာကနေ ခေတ်မီစိုက်ပျိုးနည်းစနစ်ကို နားလည်လာကြတဲ့အတွက် စက်ယန္တရားတွေ အသုံးပြု စိုက်ပျိုးနေပါတယ်။ အဲဒီလို စက်ယန္တရား အသုံးပြုစိုက်ပျိုးတဲ့အတွက် အချိန်ကုန်၊ ငွေကုန်သက်သာပြီး လုပ်သား ရှားပါးမှု အခက်အခဲကိုလည်း ပြေလည်စေပါတယ်” ဟု ဘက်စုံအဆင့်မြင့်နည်းပညာသုံး စံပြကျေးရွာမှ တောင်သူ တစ်ဦးက ပြောသည်။

.

အဆိုပါ ဘက်စုံအဆင့်မြင့်နည်းပညာသုံး စံပြကျေးရွာတွင် မုန်ညှင်း၊ ရွှေပဲရွက်၊ ငရုတ်၊ ကြက်သွန်နီ၊ ကြက်သွန်ဖြူ၊ မုံလာ၊ ကိုက်လန်၊ ကန်စွန်း၊ ချဉ်ပေါင်၊ ခရမ်း၊ ရုံးပတီ၊ ဖရုံ၊ ဘူး၊ သခွား စသည့် ဆောင်းသီးနှံ ဟင်းသီးဟင်းရွက်များကို အများဆုံး စိုက်ပျိုးထားကြကြောင်း သိရသည်။

.

ထို့အတူ မိုင်းယောင်းမြို့နယ် စိုက်ပျိုးရေးဦးစီးဌာနမှူး ဦးကျော်ကျော်မိုး ကလည်း “တောင်သူများထံသို့ မိုင်းယောင်းဒေသရဲ့ ရာသီဥတုအခြေအနေနဲ့ ကိုက်ညီတဲ့ အထွက်နှုန်းကောင်းမွန်စေတဲ့ ဆောင်းသီးနှံမျိုးစေ့များကို အခမဲ့ ဖြန့်ဝေပေးတဲ့အပြင် ပိုးမွှားရောဂါ မကျရောက်အောင် ကာကွယ်နည်းတွေ၊ အပင်အားကောင်းစေရန် သဘာဝမြေဩဇာနဲ့ ဓာတ်မြေဩဇာ ပေါင်းစပ်ကြဲပက်နည်းတွေ၊ ဘက်စုံပိုးမွှားရောဂါ ကာကွယ်နည်းတွေ၊ မြေဆွေးပုံပြုလုပ်နည်းတွေကို ကျန်းမာရေးနဲ့အားကစားဝန်ကြီးဌာနရဲ့ COVID-19 စည်းကမ်းချက်များနဲ့အညီ စဉ်ဆက်မပြတ် အသိပညာပေးလျက်ရှိပါတယ်”ဟု ပြောဆိုခဲ့သည်။

.

မြို့နယ်စိုက်ပျိုးရေးဦးစီးဌာနမှ ဖြန့်ဝေသည့် ဒေသရာသီဥတုနှင့် ကိုက်ညီပြီး အထွက်ကောင်းသော ဆောင်းသီးနှံမျိုးစေ့ များကို ရွေးချယ်၍ အဓိကစိုက်ပျိုးခဲ့သဖြင့် ဆောင်းသီနှံ ဟင်းသီးဟင်းရွက်စိုက်ခင်းများ အောင်မြင်ဖြစ်ထွန်းခဲ့ခြင်း ဖြစ်ကြောင်း သိရသည်။

.

ထို့အပြင် စိုက်ပျိုးရေးအတွက် အရေးကြီးသော ရေရရှိရန်၊ ရေစီးရေလာကောင်းမွန်စေရန် တာဝန်ရှိသူများမှ နမ့်မိန်ချောင်းနှင့် ရေသွယ်မြောင်းကြီးများ ပြုပြင်ပေးခဲ့သဖြင့် အဆင်ပြေစွာ စိုက်ပျိုးနိုင်ခဲ့ခြင်းဖြစ်သည်ဟု ဒေသခံများ ထံက သိရသည်။

.