မင်းဇော်မင်း
.
“ဝ”ကိုယ်ပိုင်အုပ်ချုပ်ခွင့်ရတိုင်း၊ ပန်ဆန်းမြို့တွင်
ဒီဇင်ဘာလ ၉ ရက်က တပ်မတော်နှင့် ရခိုင့်တပ်တော် (AA) ကိုယ်စားလှယ်များ
တွေ့ဆုံဆွေးနွေးခဲ့သည်ဟု သိရသည်။
.
ရခိုင့်တပ်တော် AA မှ ကိုယ်စားလှယ်အဖွဲ့များသည်
ပန်ဆန်းမြို့တွင် တပ်မတော်ထိပ်ပိုင်း အရာရှိကြီးများနှင့် တွေ့ဆုံ ဆွေးနွေးခဲ့သည်မှာ
မှန်ကန်ကြောင်း UWSA ပြင်ပဆက်ဆံရေးရုံး တာဝန်ခံ ဦးညီရမ်းက အတည်ပြု
ပြောဆိုခဲ့သည်။
.
“ဟုတ်ပါတယ်။ ဘယ်သူတွေ၊ ဘယ်လိုအကြောင်းအရာတွေ တွေ့ဆုံဆွေးနွေးတယ်
ဆိုတာကတော့ ကျွန်တော်တို့ မပါလို့ မသိရပါဘူး” ဟု ဦးညီရမ်းက ပြောသည်။
.
အဆိုပါ တွေ့ဆုံဆွေးနွေးမှုသည် ပြီးခဲ့သည့် နိုဝင်ဘာလ
၂၅ ရက်က အွန်လိုင်းဖြင့် ပြုလုပ်ခဲ့သည့် အစည်းအဝေး နောက်ပိုင်း နှစ်ဘက်ကိုယ်စားလှယ်များ
တွေ့ဆုံမှုလည်း ဖြစ်သည်။
.
Online ဆွေးနွေးမှုတွင် ပြီးခဲ့သည့် ၂၀၂၀
ပါတီစုံအထွေထွေရွေးကောက်ပွဲ မကျင်းပနိုင်ခဲ့သည့် မြို့နယ်များရှိ ပြည်သူများ
မဲပေးခွင့် မဆုံးရှုံးစေရန် လွတ်လပ်ပြီးတရားမျှတသော စံချိန်စံညွှန်းများနှင့်ပြည့်စုံသည့်
ဆက်စပ်ရွေး ကောက်ပွဲများ ပြန်လည်ကျင်းပနိုင်ရေးအတွက် တပ်မတော်အနေဖြင့် NLD အစိုးရနှင့်ပူးပေါင်းလုပ်ဆောင်သင့်ကြောင်း နှင့် လာမည့် ဒီဇင်ဘာ ၃၁ ရက်မတိုင်မီကျင်းပနိုင်ရန်မေတ္တာရပ်ခံသည်ဟု
နိုဝင်ဘာ ၁၂ ရက်က AA မှ ထုတ်ပြန်ထား သည်။
.
ထို့အပြင် ယင်းထုတ်ပြန်ချက်တွင် ပထမဆုံး အပစ်ရပ်စဲသည့်အနေဖြင့်
၂၀၂ဝ ပြည့်နှစ်၊ နိုဝင်ဘာ ၁၁ ရက်မှ ဒီဇင်ဘာ ၃၁ ရက်အထိ တစ်ဖက်သတ်အပစ်ရပ်စဲမှု
တိုးမြှင့်ထားကြောင်းလည်းပါရှိသည်။
.
ယခုကဲ့သို့ UWSA “ဝ” ဌာနချုပ်
ပန်ဆန်းတွင် တပ်မတော်နှင့် AA တွေ့ဆုံမှုနှင့် ပတ်သက်၍ သိရှိနိုင်ရန်
တပ်မတော် သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ် ဇော်မင်းထွန်းနှင့်
AA ပြောရေးဆိုခွင့်ရှိသူ ခိုင်သုခတို့ ထံသို့ ဆက်သွယ်မေးမြန်းနိုင်ရန်
ကြိုးပမ်းခဲ့သော်လည်း ဆက်သွယ်၍ မရခဲ့သဖြင့် မည်သည့်ကိစ္စရပ်များ ဆွေးနွေးခဲ့သည်ကိုမူ
မသိရှိရချေ။
.
