ငြိမ်းသူ
.
လွိုင်လင်ခရိုင်၊ ကွန်ဟိန်းမြို့နယ်အတွင်းရှိ ကျေးရွာများတွင်
ကျေးလက်နေပြည်သူများ နေ့စဉ်သောက်သုံးလျက်ရှိသည့် ရေအရင်း အမြစ်များမှ
ရေနမူနာများရယူကာအီကိုလိုင် (Ecoli) ဘက်တီးရီးယားပိုးပါဝင်မှုရှိ/မရှိ
ရေအရည်အသွေး များကို Ecoli Test
Kit ဖြင့် စမ်းသပ်စစ်ဆေးပေးလျက်ရှိကြောင်း သိရသည်။
.
ထိုသို့စစ်ဆေးပေးရာတွင် ကွန်ဟိန်း
မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးတင်ဆူး နှင့်
၀န်ထမ်းများက ကျေးရွာများသို့ ကွင်းဆင်းကာဒေသခံပြည်သူများ၏
နေ့စဉ်သောက်သုံးလျက်ရှိသော အများသုံးနေရာများမှ ရေနမူနာများကိုရယူပြီး ရေထဲတွင်
အီကိုလိုင် (Ecoli) ဘက်တီးရီယားပိုး၊ လူနှင့် တိရစ္ဆာန် အညစ်အကြေးဓါတ်ပါဝင်မှုကို
စစ်ဆေးပေးခြင်းဖြစ်ကြောင်း၊ ဝမ်းပျက်ဝမ်းလျှောနှင့် အခြားရောဂါများ
ဖြစ်ပွားနိုင်သည့် အတွက် သောက်သုံးရန်သင့်/မသင့် သိရှိနိုင်ရန်နှင့်
ရောဂါဖြစ်ပွားမှုအန္တရာယ်မှ ကြိုတင်ကာကွယ်နိုင်ရန် ရည်ရွယ်၍
စစ်ဆေးပေးခြင်းဖြစ်ကြောင်းသိရသည်။
.
ကွန်ဟိန်းမြို့နယ်အတွင်း ကျေးရွာပေါင်း ၁၃၇
ရွာရှိသည့်အနက် ကနဦးအနေဖြင့် ကျေးရွာပေါင်း ၅၀ ရှိ အများသုံး ရေအရင်းအမြစ်များကို
စစ်ဆေးပြီးဖြစ်ကြောင်းနှင့် ကျန်ရှိသည့်ကျေးရွာများကိုလည်း ဆက်လက်စစ်ဆေးပေးသွားမည်
ဖြစ်ကြောင်း ကွန်ဟိန်းမြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန
မြို့နယ်ဦးစီးမှူး ဦးတင်ဆူး ထံက သိရသည်။
.
