တာချီလိတ်တွင် ခိုးဝင်တရုတ်နိုင်ငံသား ၈ ဦးအား ပို့ဆောင်သူ မြန်မာနိုင်ငံသား ၄ ဦးနှင့်အတူ ဖမ်းမိ

မင်းဇော်မင်း

.

တာချီလိတ်မြို့နယ်၊ ဝမ်ကောင်းမွန်-မယ်ဟန် (မယ်ယန်းစစ်ဆေးရေးဂိတ်) တွင် နိုဝင်ဘာလ ၁၇ ရက်က တရားမဝင် ခိုးဝင်လာသည့် တရုတ်နိုင်ငံသား ၈ ဦးနှင့် ပို့ဆောင် ပေးသူ မြန်မာနိုင်ငံသား ၄ ဦးတို့အား ဖမ်းဆီးရမိခဲ့ကြောင်း သိရသည်။

.

ဓါတ်ပုံ - ဇင်လတ် (တာချီလိတ်)

.

ပူးပေါင်းအဖွဲ့သည် သတင်းအရ နိုဝင်ဘာ ၁၇ ရက် နံနက် ၈ နာရီခန့်က မယ်ယန်းစစ်ဆေးရေးဂိတ်ကွင်းရှောင်လမ်း၌ ပိတ်ဆို့ရှာဖွေရေးပြုလုပ်နေစဉ် ကျိုင်းလပ်မြို့နေ ယာဉ်မောင်း အိုက်ငင်း နှင့်ယာဉ်နောက်လိုက် အိုက်ကြွယ်တို့ မောင်းနှင်လာသည့် မော်တော်ယာဉ်အား စစ်ဆေးရာ ယာဉ်ပေါ်တွင် တရုတ်နိုင်ငံသား  ၆ ဦး ကိုလည်းကောင်း၊ ကျိုင်းလပ်မြို့နေ အိုက်ဆော့ မောင်းနှင်လာသည့် မော်တော်ယာဉ်ပေါ်တွင် တရုတ်နိုင်ငံသား ၁ ဦးနှင့်  ယာဉ်မောင်းအိုက်ငင်း မောင်းနှင်လာသည့် မော်တော်ယာဉ်ပေါ်မှ  တရုတ်နိုင်ငံသူ ၁ ဦးကိုလည်းလည်းကောင်း ဖမ်းဆီးရမိခဲ့ခြင်းဖြစ်ကြောင်း သိရသည်။

.

အဆိုပါ ဖမ်းဆီးရမိသည့် တရုတ်နိုင်ငံသား ၈ ဦး တို့သည် လူမှုကွန်ရက်တွင်တွေ့ရှိသည့် တာချီလိတ်မှ အလုပ်ခေါ် စာအရ တရုတ်နိုင်ငံ ဆစ်ဆောင်ပန်းနားမြို့မှ မော်တော်ယာဉ်ဖြင့်လည်းကောင်း၊ တောလမ်းမှလည်းကောင်း၊ မဲခေါင်မြစ် အတိုင်း သင်္ဘောစီး၍လည်းကောင်း ကျိုင်းလပ်မြို့၊ ပါလျိုးရွာ၊ ရေဆိပ်ကမ်းသို့ ရောက်ရှိလာကြခြင်းဖြစ်ပြီး ယင်းရေဆိပ်မှတစ်ဆင့် တာချီလိတ်မြို့သို့ ပို့ဆောင်ခ ယွမ် ၅၀၀ စီဖြင့် ကားငှားရမ်းပို့ဆောင်စေခဲ့ခြင်း ဖြစ်ကြောင်းသိရသည်။

.

ယင်းကဲ့သို့ မြန်မာနိုင်ငံအတွင်းသို့ ခိုးဝင်လာသည့် တရုတ်နိုင်ငံသူ/နိုင်ငံသား ၈ ဦးတို့အား ၁၉၄၇ ခုနှစ်၊ လူဝင်မှု ကြီးကြပ် ရေး(လတ်တလောပြဋ္ဌာန်းချက်များ)အက်ဥပဒေပုဒ်မ ၃(၁)ကျူး၊ ၁၃(၁) တို့ဖြင့်လည်းကောင်း၊ ၎င်းတို့အား အခကြေးငွေဖြင့် ပို့ဆောင်ပေးသူ ယာဉ်မောင်း ၃ ဦး၊ ယာဉ်နောက်လိုက် ၁ ဦးတို့အား အဆိုပါဥပဒေပုဒ်မ ၁၃(၅) ဖြင့်လည်းကောင်းအမှုဖွင့် စစ်ဆေးဆောင်ရွက်လျက်ရှိကြောင်း သိရသည်။

.