ပြည်သူများ၏ ကျေးဇူးအတွက် အစွမ်းကုန် ကြိုးစားသွားမည်ဟု NLD ပြည်နယ် အောင်နိုင်ရေး ဥက္ကဌ ပြော - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, November 12, 2020

ပြည်သူများ၏ ကျေးဇူးအတွက် အစွမ်းကုန် ကြိုးစားသွားမည်ဟု NLD ပြည်နယ် အောင်နိုင်ရေး ဥက္ကဌ ပြော

အမျိုးသားဒီမိုကရေစီအဖွဲ့ချုပ် (NLD) အနေဖြင့် ရှမ်းပြည်နယ်အတွင်း၌ အောင်မြင်မှု ရရှိခဲ့သဖြင့် မဲဆန္ဒရှင် ပြည်သူများ၏ ကျေးဇူးတရားအတွက် အစွမ်းကုန် ကြိုးစားသွားမည်ဟု ပြည်နယ် အောင်နိုင်ရေး ဥက္ကဌ ဦးစိုးညွန့်လွင်က ပြောဆိုခဲ့သည်။

.


 

“ မဲဆန္ဒရှင် ပြည်သူတွေရဲ့ ကျေးဇူးတရားအတွက် ကျွန်တော်တို့ လွှတ်တော်အသီးသီးမှာ အနိုင်ရသွားတဲ့ ကိုယ်စားလှယ်တွေ အားလုံးက အစွမ်းကုန် ဆက်လက်ပြီးတော့ ကြိုးစားသွားကြမှာ ဖြစ်ပါတယ်။”ဟု အမျိုးသားဒီမိုကရေစီအဖွဲ့ချုပ်၏ ရှမ်းပြည်နယ်အောင်နိုင်ရေးအဖွဲ့ ဥက္ကဌ ဦးစိုးညွန့်လွင်က ကမ္ဘောဇတိုင်းသို့ ပြောသည်။

.

ထို့အတူ လွှတ်တော်ကိုယ်စားလှယ် တစ်ဦးချင်းစီ၏ တက်ကြွစွာ တာဝန်ကျေပွန်မှု၊ မြို့နယ်အလိုက် အောင်နိုင်ရေးအဖွဲ့များ၏ ပူးပေါင်းပါဝင် ကြိုးစားမှုကြောင့်နှင့် ပြည်သူ၏ ထောက်ခံမှုကြောင့် NLD အနေဖြင့် အနိုင် ရရှိခဲ့ခြင်း ဖြစ်ကြောင်း ရှမ်းပြည်နယ် အောင်နိုင်ရေးအဖွဲ့ ဥက္ကဌက ရှင်းပြသည်။

.

“ ကျွန်တော်တို့ ရှမ်းပြည်နယ်ဆိုတာ တိုင်းရင်းသားပေါင်းစုံ၊ တိုင်းရင်းသားပါတီ အငယ်ရော၊ အကြီးရော အစုံ ရှိတာပေါ့။ ဒီလို အခြေအနေမှာ ဒီလောက် နိုင်တာက ရှမ်းပြည်နယ် NLD ရဲ့ အောင်မြင်မှုဟာ ကျွန်တော်တို့ ကျေနပ်ပါတယ်။ ပင်ပန်းရကျိုး နပ်ပါတယ်။”ဟု ဦးစိုးညွန့်လွင်က ဆက်လက် ပြောဆိုခဲ့သည်။

.

အမျိုးသား ဒီမိုကရေစီအဖွဲ့ချုပ်သည် ရှမ်းပြည်နယ်အတွင်း၌ ပြည်သူ့လွှတ်တော်တွင် ၁၄ နေရာ၊ အမျိုးသားလွှတ်တော်တွင် ၄ နေရာ၊ ရှမ်းပြည်နယ်လွှတ်တော်တွင် ၂၉ နေရာ၊ တိုင်းရင်းသားရေးရာ မဲဆန္ဒနယ်တွင် ၃ နေရာ၊ စုစုပေါင်း မဲဆန္ဒနယ်နေရာ ၅၀ တွင် အနိုင် ရရှိခဲ့သည်။

.

ပြီးခဲ့သည့် ၂၀၁၅ ခုနှစ် ပါတီစုံ ဒီမိုကရေစီ အထွေထွေ ရွေးကောက်ပွဲတွင် အမျိုးသား ဒီမိုကရေစီအဖွဲ့ချုပ်၏ ရှမ်းပြည်နယ်အတွင်း ရွေးကောက်ပွဲ အနိုင် ရရှိမှုအနေဖြင့် ၃၉ နေရာသာ အနိုင်ရ၍ တတိယ နေရာကိုသာ ရရှိခဲ့ပြီး ယခု ၂၀၂၀ ပြည့်နှစ် ရွေးကောက်ပွဲတွင် မဲဆန္ဒနယ်နေရာ အများဆုံး အနိုင် ရရှိခဲ့ခြင်း ဖြစ်သည်။

No comments:

Post a Comment

Journal Download

Photo of three cats

About