မင်းဇော်မင်း
.
မိုးမိတ်ခရိုင်၊ မဘိမ်းမြို့နယ်၊ စီပိန်းကျေးရွာတွင်
နိုဝင်ဘာလ ၁၁ ရက်၊ နံနက်ပိုင်းက ဆင် နင်းသဖြင့် ဆင်ဦးစီး တစ်ဦး သေဆုံးခဲ့ကြောင်း သိရသည်။
.
“ဆင်က မုန်ယိုနေတာ။ အဲဒါ ဆင်ဦးစီးက ကြံကျွေးပြီး
ချော့လို့ရမယ်ထင်လို့ ချော့တာမှာ အနီးကပ် နှာမောင်းနဲ့ ပတ်ပြီး နင်းလိုက်တာပါ။ သူ့မိသားစုတွေကို
ခေါ်ပေးပြီး သေဆုံးသူကို ဆေးရုံပို့ပေးခဲ့ပါတယ်။ ဒီနေ့ (နိုဝင်ဘာ ၁၂ ရက်) သင်္ဂြိုဟ်ပါမယ်”
ဟု မဘိမ်းမြို့နယ် အခြေစိုက် မိုးလုံးလူမှုကူညီရေးအသင်းမှ ဦးအာကာက ပြောသည်။
.
အဆိုပါကိစ္စနှင့် ပတ်သက်၍ မဘိမ်းမြို့မရဲစခန်းသို့
ဆက်သွယ်မေးမြန်းရာတွင် တာဝန်ကျ ရဲတပ်ဖွဲ့ဝင်က ပြောကြား ခွင့်မရှိကြောင်းသာ ပြန်လည်ဖြေကြားခဲ့သည်။
.
မဘိမ်းမြို့နယ်၊ စီပိန်းကျေးရွာနေ ဆင်ဦးစီး ကိုနိုင်ဝင်း
(၃၇ နှစ်) သည် နိုဝင်ဘာလ ၁၁ ရက်က ၎င်း ထိန်းကျောင်း နေသည့် မုန်ယိုဆင်ကို ချော့မော့သည့်အနေဖြင့်
အနီးကပ် ချော့မြူ၍ ကြံကျွေးစဉ် ဆင်မှ နှာမောင်းဖြင့် ရစ်ပတ်ကာ ခြေဖြင့် နင်းသတ်ခဲ့ခြင်း
ဖြစ်ပြီး အဆိုပါဆင်သည် စီပန်းကျေးရွာအတွင်း သောင်းကျန်းနေသဖြင့် တာဝန်ရှိသူများက ထိန်းသိမ်းခဲ့ရကြောင်း
သိရသည်။
.
