တောင်ကြီးနှင့် ရပ်စောက်တို့တွင် COVID-19 ပိုးတွေ့လူနာ ၅ ဦး တွေ့ရှိ

ကမ္ဘောဇတိုင်း

.

တောင်ကြီးမြို့နယ်နှင့် ရပ်စောက်မြို့နယ်တို့တွင် ယနေ့ နိုဝင်ဘာလ ၃၀ ရက်အတွင်း COVID-19 ပိုးတွေ့လူနာ ၅ ဦး တွေ့ရှိခဲ့သည်ဟု သိရသည်။

.

.

ရှမ်းပြည်နယ်အတွင်း Quarantine ဝင်ရောက်နေသူများ၊ COVID-19 ရောဂါပိုးတွေ့လူနာနှင့် ထိတွေ့ဆက်စပ်သူများ အား Rapid Test Kit ဖြင့် စစ်ဆေးပေးရာမှ တောင်ကြီးမြို့နယ်မှ ၄ ဦးနှင့် ရပ်‌စောက်မြို့နယ်မှ တစ်ဦး၊ စုစုပေါင်း ၅ ဦးတို့တွင် COVID-19 ရောဂါပိုး တွေ့ရှိခဲ့ခြင်းဖြစ်သည်ဟု သိရသည်။

.

“တောင်ကြီး မင်္ဂလာဦးအဆက်က ၂ ဦး၊ နောက်ပြီး အနံ့ပျောက်လို့ ရောက်လာတဲ့ ပြည်တော်သာမှာ နေပြီး မြို့မဈေးထဲမှာ ဈေးရောင်းတဲ့သူက တစ်ဦး၊ တောင်ကြီး၊ ပန်သခွားမှာ Quarantine ဝင်နေတဲ့ တစ်ဦး၊ ရပ်စောက်က မန္တလေးမစိုးရိမ်ကျောင်းတိုက်က ပြန်လာတဲ့ သံဃာထဲမှာ တစ်ပါး ပိုးတွေ့တယ်။ စုစုပေါင်း တောင်ကြီးက ၄ ဦး၊ ရပ်စောက်က ၁ ဦးပါ” ဟု ရှမ်းပြည်နယ် ပြည်သူ့ကျန်းမာရေးနှင့် ကုသရေးဦးစီးဌာနမှ လက်ထောက်ညွှန်ကြားရေးမှူး ‌ဒေါက်တာဇဝနကိုက ကမ္ဘောဇတိုင်းသို့ ပြောသည်။

.

အဆိုပါ ပိုးတွေ့လူနာများနှင့် ထိတွေ့ဆက်စပ်မှုရှိသူများကို လိုက်လံရှာဖွေလျက်ရှိပြီး တောင်ကြီးမြို့မဈေးအတွင်း ဈေးရောင်းချသူတစ်ဦးထံမှ COVID-19 ရောဂါပိုး တွေ့ရှိခဲ့သည့်အတွက် ဈေးအား ယာယီပိတ်သိမ်းထားပြီးဖြစ်ကြောင်း သိရသည်။

.

ကလောမြို့နယ်၊ နန့်ပန်တက်စစ်ဆေးရေးဂိတ်တွင် ရှမ်းပြည်နယ်အတွင်းသို့ ဝင်ရောက်လာသည့် ယာဉ်မောင်းနှင့် ယာဉ်နောက်လိုက် Rapid Test Kit ဖြင့် COVID-19 ရောဂါပိုး စစ်ဆေးပေးရာတွင်မူ ယနေ့ နိုဝင်ဘာလ ၃၀ ရက်၌ ပိုးတွေ့လူနာ တွေ့ရှိခြင်းမရှိကြောင်း သိရသည်။

.