COVID-19 ရောဂါ ကုသရန် ​သွေးရည်ကြည် အလှူရှင်များ ဖိတ်​ခေါ်

ကမ္ဘောဇတိုင်း

.

COVID-19 ရောဂါ ကုသနိုင်ရန်အတွက် ကျန်းမာရေးနှင့် အားကစားဝန်ကြီးဌာနက သွေးရည်ကြည် အလှူရှင်များ ဖိတ်‌ခေါ်ထားသည်ဟု သိရသည်။

.

.

COVID-19 ရောဂါပိုး ကူးစက်ခံရပြီး ရောဂါပျောက်ကင်းသူများ၏ သွေးရည်ကြည်တွင် (severe acute respiratary syndrome coronavirus 2 SARS-CoV-2) ကို ခုခံကာကွယ်နိုင်သော ပဋိပစ္စည်း (Antibody) များ ကျန်ရစ်သည့် ၎င်းတို့၏ သွေးရည်ကြည် (Convalescence Plasma) အား အသုံးပြု၍ COVID-19 ပြင်းထန်သောလူနာများကို ကုသရာတွင် ရောဂါသက်သာ ပျောက်ကင်းရန် အထောက်အကူပြုကြောင်း တွေ့ရှိရသည့်အတွက် ကိုရိုနာဗိုင်းရပ်(စ်) ပိုး (SAPS-CoV.2) ကူးစက်ခံရပြီး ၂၈ ရက်တိတိ ပကတိ ပြန်လည်နေထိုင်ကောင်းလာသူများအနေနှင့် ၎င်းတို့၏ သွေးရည် ကြည်ကို လှူဒါန်းခြင်းဖြင့် COVID-19 ရောဂါ ပြင်းထန်ခံစားနေသော လူနားများ၏ အသက်ကို ကယ်တင်ပေးနိုင်မည်ဖြစ်ကြောင်း သိရသည်။

.

သွေးရည်ကြည်အလှူရှင်တစ်ဦးထံမှ သွေးရည်ကြည် ၄၀၀ စီစီမှ ၆၀၀ စီစီအထိ ထုတ်ယူနိုင်ပြီး လူနာ ၂ ဦးမှ ၃ ဦး အတွက် အသုံးပြုနိုင်မည်ဖြစ်ကာ အလှူရှင်တစ်ဦးလျှင် ၂ ပတ် မှ ၄ ပတ်တစ်ကြိမ်ဖြင့် ၃ ကြိမ်အထိ လှူဒါန်းနိုင်သဖြင့် သွေးရည်ကြည် အလှူရှင်တစ်ဦးမှ တစ်ဦးထက်ပိုသော COVID-19 လူနာများ၏ အသက်ကို ကယ်တင်နိုင်မည် ဖြစ်ကြောင်း ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ သိရသည်။

.

သွေးရည်ကြည်အလှူရှင်သည် COVID-19 ရောဂါပိုး ကူးစက်ခံရပြီး ၂၈ ရက်ထက်မနည်း နေကောင်းသူ ဖြစ်ရမည့် အပြင် သွေးလှူရှင်များ၏ ကျန်းမာရေးကို မထိခိုက်စေရန် ဆောင်ရွက်သော စည်းကမ်းများ အတိုင်း ဆောင်ရွက်ပေးမည်ဖြစ်ပြီး သွေးရည်ကြည် မလှူဒါန်းမီ ကျန်းမာရေး စစ်ဆေးပေးသွားမည်ဖြစ်ကြောင်း သိရသည်။

.

အမျိုးသားသွေးဌာနမှ COVID-19 ရောဂါမှ ပြန်လည်ကောင်းမွန်သူများ သွေးရည်ကြည် စုဆောင်;သည့်လုပ်ငန်းကို ဆောင်ရွက်နေပြီး ရန်ကုန်မြို့ ဦးဝိစာရလမ်း၊ ဇီဝကလမ်းခွဲရှိ ဆေးသုတေသနဦးစီးဌာနတွင် သွေးရည်ကြည် လှူဒါန်းနိုင်ရန် သီးသန့်အခန်း ဖွင့်လှစ်ထားပြီး COVID-19 ရောဂါပြင်းထန်သောလူများ၏ အသက်ကိုကယ်တင်နိုင်ရန် စေတနာ ရှင် သွေးရည်ကြည်အလှူရှင်များကို ဖိတ်ခေါ်ပါကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန် ထားသည်။

.