ကမ္ဘောဇတိုင်း
.
လားရှိုးမြို့၊ ပြည်သူ့ဆေးရုံကြီးတွင် တက်ရောက်ဆေးကုသမှု
ခံယူနေသည့် တန့်ယန်းမြို့မှ လူနာတစ်ဦး ယနေ့ နိုဝင်ဘာလ ၁၈ ရက်၊ နေ့လယ်ပိုင်းက သေဆုံးခဲ့ကြောင်း
သိရသည်။
.
.
“သေဆုံးသွားတာ ဟုတ်ပါတယ်။ ဒီနေ့ (နိုဝင်ဘာလ ၁၈ ရက်)
ဆုံးတာပါ။ TB ရောဂါ အခံ ရှိတဲ့သူပါ” ဟု ရှမ်းပြည်နယ်မြောက်ပိုင်း
ပြည်သူ့ ကျန်းမာရေးဦးစီးဌာနမှူး ဒေါက်တာတင်မောင်ညွန့်က ကမ္ဘောဇတိုင်းသို့ ပြောသည်။
.
အဆိုပါ သေဆုံးလူနာမှာ တန့်ယန်းမြို့နယ်၊
နားလောင်းကျေးရွာအုပ်စု၊ မတ်တွယ်ကျေးရွာနေ အသက် ၃၀ နှစ်အရွယ် အမျိုးသား
ဖြစ်ပြီး နိုဝင်ဘာလ ၁၆ ရက်က Rapid Test Kit ဖြင့် စစ်ဆေးစဥ်
COVID-19 ပိုး တွေ့ခဲ့ခြင်း ဖြစ်ကြောင်း သိရသည်။
.
ထို့အတူ လားရှိုးဆေးရုံအုပ်ကြီး ဒေါက်တာ ဉာဏ်မြင့်ကလည်း
“သူက အဆုတ်ပျက်စီးတာပေါ့။ လက်ရှိ COVID-19 ကြောင့်လည်း ပါတယ်။ သူ့ရဲ့ မူလ TB ရောဂါ အခံကြောင့်လည်း
ပါပါတယ်။ လက်ရှိ လားရှိုးဆေးရုံမှာ COVID-19 လူနာ ၅ ဦး ရှိပါတယ်”
ဟု ပြောဆိုခဲ့သည်။
.
ရှမ်းပြည်နယ်အတွင်း COVID-19 ရောဂါဖြစ်ပွားရာမှ သေဆုံးသူ ၂ ဦး ရှိလာပြီဖြစ်ပြီး တစ်ဦးမှာ တောင်ကြီးမြို့နေ အသက် ၆၇
နှစ်အရွယ် အမျိုးသား ဖြစ်သည့် လူနာအမှတ်(၆၉၁၆) ဖြစ်ကာ စက်တင်ဘာလ ၂၀ ရက်တွင်
စဝ်စံထွန်းဆေးရုံ၌ ဆေးကုသမှုခံယူနေစဉ် သေဆုံးခဲ့ခြင်း ဖြစ်ကြောင်း သိရသည်။
.
